ດາວໂຫຼດ App CRI-FM93 ລະບົບ IOS
ດາວໂຫຼດ App CRI-FM93 ລະບົບ Android
ວັນທີ 6 ຕຸລານີ້ຕາມເວລາທ້ອງຖິ່ນ, ທ່ານຢ໋າງເຈຍສື ກຳມະການກົມການເມືອງສູງກາງພັກກອມມູນິດຈີນ, ຫົວໜ້າຫ້ອງການຄະນະກຳມະການວຽກງານການຕ່າງປະເທດສູນກາງຈີນ ແລະ ທ່ານເຈກ ຊູລີວັນ ຜູ້ຊ່ວຍວຽກງານຄວາມໝັ້ນຄົງແຫ່ງຊາດຂອງປະທານາທິບໍດີອາເມຣິກາໄດ້ພົບປະກັນຢູ່ນະຄອນຊູຣິກປະເທດສະວິສ. ສອງຝ່າຍໄດ້ລົງເລິກແລກປ່ຽນຄວາມເຫັນກ່ຽວກັບການພົວພັນຈີນ-ອາເມຣິກາ, ບັນຫາສາກົນແລະພາກພື້ນທີ່ສົນໃຈຮ່ວມກັນຢ່າງຮອບດ້ານແລະກົງໄປກົງມາ.
ທ່ານຢ໋າງເຈຍສືຊີ້ອອກວ່າ: ຝ່າຍອາເມຣິກາຄວນຮັບຮູ້ຢ່າງເລິກເຊິ່ງຕໍ່ທາດແທ້ຂອງການພົວພັນລະຫວ່າງສອງປະເທດແມ່ນຕ່າງຝ່າຍຕ່າງມີຜົນປະໂຫຍດ, ຈີນຄັດຄ້ານໃຊ້ຄຳສັບ “ແຂ່ງຂັນ” ມາກຳນົດຄວາມໝາຍຂອງການພົວພັນຈີນແລະອາເມຣິກາ.
ທ່ານຢ໋າງເຈຍສືກ່າວຕື່ມວ່າ: ຈີນໃຫ້ຄວາມສຳຄັນຢ່າງສູງຕໍ່ການສະແດງທ່າທີໃນຫວ່າງມໍ່ໆມານີ້ຂອງທ່ານປະທານາທິບໍດີໂຈ ໄບເດັນທີ່ວ່າ: ອາເມຣິກາບໍ່ມີເຈດຈຳນົງກີດກັ້ນການພັດທະນາຂອງຈີນ ແລະ ບໍ່ເຮັດ “ສົງຄາມເຢັນຄັ້ງໃໝ່”. ຫວັງວ່າ: ຝ່າຍອາເມຣິກາຈະປະຕິບັດນະໂຍບາຍຕໍ່ຈີນທີ່ເປັນໄປຢ່າງມີເຫດຜົນ ແລະ ຕິດແທດຕົວຈິງ, ເດີນຕາມເສັ້ນທາງທີ່ສອງປະເທດຈີນແລະອາເມຣິກາເຄົາລົບເຊິ່ງກັນແລະກັນ, ຢູ່ຮ່ວມກັນໂດຍສັນຕິ ແລະ ຮ່ວມມືກັນແບບຕ່າງຝ່າຍຕ່າງມີຜົນປະໂຫຍດ.
ສອງຝ່າຍຍັງໄດ້ແລກປ່ຽນຄວາມເຫັນກ່ຽວກັບການປ່ຽນແປງຂອງດິນຟ້າອາກາດ ແລະ ບັນຫາພາກພື້ນທີ່ສົນໃຈຮ່ວມກັນ ແລະ ເຫັນດີຈະຮັກສາການສົນທະນາແລະແລກປ່ຽນກັນເປັນປະຈຳຕໍ່ບັນຫາສຳຄັນຕ່າງໆ.
ຄຳເຫັນ
0