|
ຈັນທີ ເດືອນສະຫວັນ
ຢູ່ໆ ມື້ໜຶ່ງຂອງປີ2004 ຄອບຄົວຂອງບົວແກ້ວ ຈະເລີນລັງສີ ໄດ້ຕ້ອນຮັບແຂກພິເສດຄົນໜຶ່ງ ທີ່ເດີນທາງມາຈາກປະເທດຈີນ.ແຂກຄົນນັ້ນຊື່ ທ້າວ ຫຼີວ້ານຫົງອາຍຸປະມານ 30 ປີ ບິນມາຈາກຄຸນໝິງ ເພື່ອຕາມຫາຊື່ ບົວແກ້ວ ຈະເລີນລັງສີແລະຄອບຄົວ.ທ້າວ ຫີຼ ຢູ່ບ້ານ ຫຼູຊວນ ເມືອງຫົງເຫີ ແຂວງຢຸນນານ ປະເທດຈີນ.
ບົວແກ້ວເອງກໍ່ເຄີຍຮູ້ຜ່ານຈາກການເລົ່າຂອງແມ່ໃນອະດີດວ່າ ພໍ່ມີພັນລະຍາຫຼວງຄົນໜຶ່ງຢູ່ປະເທດຈີນ ແຕ່ເນື່ອງຈາກເວລານັ້ນ ບົວແກ້ວຍັງນ້ອຍ ຈິ່ງບໍ່ທັນຮູ້
ເລື່ອງຂອງພໍ່.
ຊຸມປີ 1930,ມີພໍ່ຄ້າຊາວຈີນຈຳນວນໜຶ່ງຢູ່ທາງພາກໃຕ້ແຂວງຢຸນນານ ແລະ ແຂວງກວາງຕູ້ງ ເດີນທາງມາທາງພາກເໜືອຂອງລາວ ແລະຫວຽດນາມເພື່ອທຳການຄ້າຂາຍ ດ້ວຍຂະບວນມ້າຫຼາຍຮ້ອຍໂຕ.ພວກພໍ່ຄ້າດັ່ງກ່າວສ່ວນຫຼາຍແມ່ນລົງມາຕັ້ງຖິ່ນຖານຢູ່ແຂວງຊຽງຂວາງ,ຜົ້ງສາລີ,ຊຳເໜືອແລະເຂດຊາຍແດນລາວ-ຫວຽດນາມ ແຂວງເງອານ.ຂະບວນມ້າທີ່ຕ່າງສິນຄ້າຫຼັງໄຫຼລົງມານັ້ນ ຈະເຕັມໄປດ້ວຍຜ້າແພຫຼາຍຊະນິດ ຫຼາຍນີ ສຽງຊຸກດັນມ້າດັງ"ຫໍ້ ຫໍ້ ຫໍ້"ໄດ້ເຮັດໃຫ້ຊາວບ້ານພື້ນເມືອງທີ່ພວກເຂົາຜ່ານໄປກໍ່ເລີຍຕັ້ງຊື່ໃຫ້ພວກຊາວພໍ່ຄ້າມ້າດັ່ງກ່າວວ່າ"ພວກຫໍ້".
ຮ່ວມຢູ່ໃນພວກພໍ່ຄ້າດັ່ງກ່າວມີຫຼໍກົ້ວຢົງ ເປັນພໍ່ຄ້າຜູ້ມີຖານະດີສົມຄວນ ມີມ້າຈຳນວນຫຼາຍຮ້ອຍໂຕ.ຫໍຼກົ້ວຢົງໄດ້ມາຕັ້ງຖິ່ນຖານຢູ່ບ້ານບານ ເມືອງຄຳແຂວງຊຽງຂວາງ,ເຂົາໄດ້ທຳການຄ້າຂາຍລະຫວ່າງເຂດຊາຍແດນຫວຽດນາມກັບ ເມືອງໜອງແຮດ ອັນເປັນເຂດທີ່ມີຝິ່ນຫຼາຍ.ຕໍ່ມາ ຫຼໍກົ້ວຢົງໄດ້ສ້າງຄອບຄົວກັບຍິງສາວເຊື້ອຊາດຈີນຄົນໜຶ່ງທີ່ເມືອງແສນ ໄດ້ມີລູກຮ່ວມກັນ ເຖິງ3ຄົນ,ບົວແກ້ວ ເປັນລູກຊາຍຫຼ້າ.ເມື່ອພວກລູກເຕີບໃຫຍ່ຂຶ້ນມາ ພໍ່ຈິ່ງເລົ່າໃຫ້ຟັງວ່າ ຢ່າງທາງເມືອງຈີນ ພໍ່ຍັງມີເມຍຫຼວງອີກຄົນໜຶ່ງ ພ້ອມດ້ວຍລູກ 2 ຄົນ ຍິງ 1 ຊາຍ 1.
ໂຊກບໍ່ດີ ຕໍ່ມາບໍ່ດົນ ພໍ່ໄດ້ເສຍຊີວິດຢູ່ບ້ານພະແຄະ ເມືອງໜອງແຮດ ບົນເສັ້ນທາງໄປຄ້າຂາຍ ຍ້ອນໄສ້ຕິ່ງ.ພາຍຫຼັງພໍ່ເສຍແລ້ວ,ແມ່ຂອງບົວແກ້ວ ໄດ້ຕິດຕໍ່ພົວພັນກັບແມ່ຫຼວງ.ເມື່ອຮູ້ທີ່ຢູ່ຄັກແນ່ແລ້ວ ຜູ້ເປັນພົນລະຍານ້ອຍກໍ່ຝາກເງິນຫຼຽນຫົວໜາມໄປໃຫ້ພັນລະຍາຫຼວງຢູ່ທາງເມືອງຈີນ ເປັນຈຳນວນ 800ກວ່າຫຼຽນ.ເງິນກ້ອນນັ້ນໄດ້ປະກອບສ່ວນຊຸບລ້ຽງພວກລູກຂອງເມຍຫຼວງຢູ່ທາງເມືອງຈີນຈົນເຕີບໃຫຍ່ ລູກສາວກົກຂອງເມຍຫຼວງຍັງຊົງຈຳເລື່ອງດັ່ງກ່າວໄດ້ດີ.
1 2 3 4 5 6 7
|
