|
ເຮົາກັບບົວແກ້ວເບິ່ງໜ້າກັນ,ຂ້າພະເຈົ້າເວົ້າກັບບົວແກ້ວວ່າ"ລອງຊິມເບິ່ງນໍ"ບົວແກ້ວງຶກຫົວເຫັນດີ.ບໍ່ເຖິງ 10 ນາທີ,ທາງຮ້ານອາຫານໄດ້ຍໍຖ້ວຍ ແລະຈານອາຫານທີ່ມີເນື້ອມ້າ ແລະ ໝາໄປ"ໝາປ່າ"ທີ່ສົ່ງອາຍຮ້ອນທ່ວນໆ.ອາກາດໜາວ ກ່ອນຈະລົງມືຄີບຕ່ອນເນື້ອເຂົ້າປາກ ພວກເຮົາຕ່າງຕຳຈອກເຫຼົ້າປຸກສາກ່ອນ.ເທື່ອນີ້ ເປັນຄັ້ງທຳອິດໃນຊີວິດ ທີ່ໄດ້ຊິມຫຼົດຊາດຂອງເນື້ອມ້າ ກິນແລ້ວຮູ້ສຶກວ່າແຊບແທ້ ເຕັມທີແຕ່ຢູ່ບ້ານເຮົາບໍ່ມີຮ້ານອາຫານ"ຊິ້ນມ້າ".ຊິ້ນໝາໄນກໍ່ເຊັ່ນກັນ ຢູ່ລາວເຮົາກໍ່ບໍ່ເຄີຍເຫັນ. ນອກຈາກຈານເນື້ອມ້າ,ໝາປ່າແລ້ວ ຍັງມີໄກ່ດຳຕົ້ມເປັນຕ່ອນໃຫຍ່,ຂົ້ວຮາກຜັກຄາວທອງ,ຂົ້ວໂຕດ້ວງແມ້ອີກນຳ… ຍິ່ງກິນ ກໍ່ຍິ່ງແຊບ ຖອກເຫຼົ້າມາເທື່ອໃດກໍ່ກ້ຽງພ້ອມກັບພາສາຈີນທີ່ວ່າ"ກ້ານເປ"ຖ້ວຍແກງຕົ້ມດ້ວຍເນື້ອໄກ່ດຳພູເຂົາ ເຫຼືອງອ່ອຍຮ່ອຍ ແຕ່ບໍ່ມີບ່ວງຊົດ,ຖາມຫາບ່ວງ ທາງຮ້ານອາຫານກໍເລີຍເອົາຈອງຕັກແກງມາໃຫ້.ເມື່ອຖາມຫາກົກສາຍປານເຫດ ຈິ່ງຮູ້ວ່າ ຄົນທ້ອງຖິ່ນດັ່ງກ່າວບໍ່ເຄີຍໃຊ້ບ່ວງຊົດແກງ ມີແຕ່ຍໍຖ້ວຍແກງຂຶ້ນມາໃສ່ປາກຮຸບເອົາ.ກິນເຂົ້າປຸ້ນຈຳໂບ້ຂອງມື້ເຊົ້າກໍ່ເຊັ່ນກັນ ບໍ່ມີບ່ວງ.
ສຽງສົນທະນາ ສຽງຫົວໃນຍາມຮ່ວມຮັບປະທານອາຫານ ແລະ ຮ່ວມດື່ມເຫຼົ້າ ເປັນຍາມທີ່ມີບັນຍາກາດລືນເລິງກວ່າຍາມອື່ນ ເພາະນາຍພາສາມາດເຮັດໃຫ້ຄົນສອງຊາດເຂົ້າອົກເຂົ້າໃຈຊື່ງກັນແລະກັນ.ການສົນທະນາໃນຕອນບ່າຍຂອງມື້ນີ້ ເຮັດໃຫ້ຂ້າພະເຈົ້າມີບົດຮຽນ ແລະ ເພິ່ງພໍໃຈທີ່ສຸດ.ໂດຍສະເພາະຕອນເວົ້າເຖິງບົດຮຽນທາງດ້ານການປົກຄອງ ຫຼືວຽກບ້ານການເມືອງ,ການທີ່ປະເທດຈີນມີການປ່ຽນແປງຈາກໜ້າມື ເຕີບໃຫຍ່ເຂັ້ມແຂງຄືສູ່ມື້ນີ້ແມ່ນຍ້ອນການນຳອັນສະຫຼາດສ່ອງໃສຂອງພັກກອມມູນິດ ແລະ ລັດຖະບານຈີນຂອງຍຸກສະໄໝໃໝ່ ຜູ້ໃດກໍ່ຕາມ ທີ່ຈະໄຕ່ເຕົ້າຂຶ້ນມາເປັນຜູ້ນຳລະດັບຊາດຫຼືລະດັບທ້ອງຖິ່ນ,ຕ້ອງເປັນຄົນທີ່ມີຄວາມຮູ້ ຄວາມສາມາດ ມີຄຸນສົມບັດ,ມີຄວາມສັດຊື່ບໍລິສຸດຕໍ່ຊາດ,ຕໍ່ປະຊາຊົນ ແລະ ຕໍ່ພາລະກິດ,ຍົກຕົວຢ່າງ ຜູ້ທີ່ຈະມາເປັນເຈົ້າເມືອງ ຫຼືເປັນນາຍບ້ານ ເປັນຫົວໜ້າຕາແສງ ຕ້ອງຜ່ານການເລືອກຕັ້ງຈາກປະຊາຊົນ,ເມື່ອມາເປັນຜູ້ນຳແລ້ວ ຜ່ານການເຮັດວຽກໜຶ່ງ ຫຼື ສອງປີຕ້ອງໃຫ້ມີຜົນງານອອກມາປະກົດໃຫ້ປະຊາຊົນເຫັນ ຖ້າຫາກເຮັດວຽກບໍ່ເຂົ້າ ບໍ່ອອກ ບໍ່ມີຜົນງານອັນຊັດເຈນ ຜູ້ນັ້ນຕ້ອງຖືກປົກອອກຈາກຕຳແໜ່ງ ແລະ ໜ້າທີ່ການ ຄັດເລືອກເອົາຜູ້ອື່ນເຂົ້າມາແທນ.ຜູ້ໃດຫາກມີພຶດຕິກຳບໍ່ສັດຊື່ ກິນສິນບົນສໍ້ລາດບັງຫຼວງ,ສໍ້ຫຼວງບັງລາດ ຈະຖືກນຳຂຶ້ນສານຕັດສິນປະຫານຊີວິດ.ຍົກຕົວຢ່າງ ໃນຊຸມປີ 2000 ຫາ 2003 ທ່ານເຂົ້າແຂວງຢຸນນານ ໄດ້ຖືກສານຕັດສິນປະຫານຊີວິດ ທັງໆ ທີ່ທ່ານຄົນນີ້ມີຜົນງານໃຫຍ່ຫຼວງ ເປັນຜູ້ວາງແຜນບູລະນະນະຄອນຄຸນໝິງ ແລະ ແຂວງຢຸນນານໃຫ້ກາຍເປັນແຂວງທີ່ຈະເລີນຮຸ່ງເຮືອງແຕ່ຍ້ອນວ່າ ລູກຊາຍໄດ້ຮັບບູລິມະສິດ ໃນການປະມູນວຽກກໍ່ສ້າງ ກໍ່ຄືດ້ານທຸລະກິດຂາເຂົ້າຂາອອກ ເປັນຜູ້ທີ່ຢາກສວຍໃຊ້ບາລະມີຂອງພໍ່ ເພື່ອຜົນປະໂຫຍດສ່ວນຕົວ,ທ່ານເຈົ້າແຂວງເອງກໍ່ຫົຼງກົນ ກິນສິນບົນຂອງພວກບໍລິສັດໃຫຍ່ຈຳນວນໜຶ່ງ ຍ້ອນແນວນັນ ທ່ານຈິ່ງຫຼີກບໍ່ມົ້ມຈາກກົດໝາຍ.ໃນທີ່ສຸດ ຄອບຄົວຂອງເຈົ້າແຂວງຢຸນນານ ກໍ່ຖືກດັບມອດ.ລູກຊາຍກໍ່ຖືກປະຫານເຊັ່ນກັນ ກົດໝາຍເປັນກົດໝາຍ ເມື່ອວາງອອກມາແລ້ວ ຈະບໍ່ມີຄຳວ່າ"ນະໂຍບາຍ ຫືຼ ປະນິປະນອມ".ກົດໝາຍວາງອອກມາ ແມ່ນເພື່ອໝົດທຸກຄົນໃນຊາດ ບໍ່ມີເທວະດາອົງໃດຢູ່ເໜືອກົດໝາຍ.
ພັກກອມມູນິດ ແລະ ລັດຖະບານຈີນ ໄດ້ເອົາໃຈໃສ່ສເຖິງພະນັກງານ ແລະປະຊາຊົນທາງດ້ານຊີວິດການເປັນຢູ່,ສະຖານທີ່ພັກຜ່ອນເຮືອນຢູ່,ພາຫານະ ແລະ ອື່ນໆ ພະນັກງານ ທະຫານມີເຮືອນຫຼວງໃຫ້ຢູ່ໃນອັດຕາຊື້ລາຄາຖືກ ຜູ້ໃດມີອາຍຸການປະຕິວັດຫຼາຍ ກໍ່ຈະມີນະໂຍບາຍເສຍຄ່າຊື້ເຮືອນນ້ອຍກວ່າຜູ້ທີ່ມີຜົນງານນ້ອຍ ຫຼື ເຂົ້າລຸນ.
1 2 3 4 5 6 7
|
