|
ພາຍຫຼັງບ້ານເມືອງມີຄວາມສະຫງົບ ບົວແກ້ວໄດ້ເພິ່ງທາງສະມາຄົມຊາວຈີນຕ່າງດ້າວທີ່ນະຄອນຫຼວງວຽງຈັນ ໂດຍມີລຸງຮ່ວາຊ່ວຍສືບທາວຫາ.ຈາກນັ້ນບໍ່ເທົ່າໃດປີ ກໍ່ສາມາດຕິດຕໍ່ພົວພັນກັບພີ່ເອື້ອຍ ອັນເປັນລູກສາວກົກຂອງພັນລະຍາຫຼວງຢູ່ແຂວງຢູນນານ.ປັດຈຸບັນເອື້ອຍຂອງບົວແກ້ວມີອາຍຸ 80 ກວ່າປີ ຊື່ ຫຼົວຈິເຟິນ,ເພິ່ນມີລູກ 3ຄົນ ຍິງ1 ຊາຍ2ຄົນ,ແຕ່ເອື້ອຍເປັນແມ່ໝ້າຍຫຼາຍປີແລ້ວ.
ພາຍຫຼັງລູກຊາຍຫຼ້າກັບຄືນຢຸນນານ ໄດ້ຮູ້ຂ່າວກ່ຽວກັບນ້ອງຊາຍຢູ່ທາງເມືອງລາວ ເອື້ອຍຫຼົວຈິເຟີນດີໃຈຫຼາຍຈົນນ້ຳຕາຊຶມເບົ້າ.ເອື້ອຍ ແລະຍາດຕິພີ່ນ້ອງຮ້ອງຂໍໃຫ້ບົວແກ້ວ ແລະ ຄອບຄົວໄປຢາມດ່ວນ ເພາະບໍ່ຮູ້ວ່າ ເອື້ອຍຍັງມີຊີວິດຕື່ມອີກຈັກມື້,ກ່ອນຈະອຳລາຈາກໂລກນີ້ໄປ ຂໍໃຫ້ໄດ້ເຫັນໜ້ານ້ອງຊາຍສາກ່ອນ.
ສາຍສຳພັນລະຫວ່າງປະເທດລາວ ກັບ ປະເທດຈີນ ພໍ່ພຽງແຕ່ຂັ້ນພັກຕໍ່ພັກລັດຖະບານຕໍ່ລັດຖະບານ ປະຊາຊົນຕໍ່ປະຊາຊົນ ແຕ່ສິ່ງທີ່ເລິກເຊິ່ງກວ່ານັ້ນ ລະຫວ່າງສອງຊາດ ຍັງມີສາຍເລືອດ ສາຍໃຈຮ່ວມກັນໃນອະດີດນັບເປັນພັນໆປີ ມາແລ້ວ.ຍ້ອນມີການປະຕິວັດຂອງ 2 ຊາດ,ມື້ນີ້,ຈິ່ງເຮັດໃຫ້ຄວາມປາຖະນາຂອງບົວແກ້ວ ແລະ ຂອງເອື້ອຍູ່ທາງເມືອງຈີນໄດ້ປະກົດເປັນຈິງ.ວັນທີ31 ຕຸລາ ປີ2005,ບົວແກ້ວ ຈະເລີນລັງສີ ພ້ອມລູກສາວແກ້ວວິພອນ ຈະເລີນລັງສີ ແລະ ຂ້າພະເຈົ້າ(ຜູ້ຂຽນ) ໄດ້ໂດຍສານຍົນ ໂບອິງ 737 ຂອງສາຍການບິນຈີນສາຍໃຕ້ທະຍານໄປສູ່ນະຄອນຄຸນໝີງ,ໃຊ້ເວລາພຽງ1ຊົ່ງໂມງກັບ15ນາທີກໍ່ເຖິງ.
ຢູ່ຫໍພັກຜູ້ໂດຍສານນະສະໜາມບິນຄຸນໝິງ ມີຄົນອອກມາຕ້ອນຮັບພວກເຮົາ ດ້ວຍສໍ້ດອກໄມ້ຜູ້ລະພົ້ວ.ໃນນັ້ນ ມີຫຼານຊາຍຫ້ຼາທີ່ເຄີຍໄປຢາມບົວແກ້ວທີ່ວຽວຈັນ,ຫຼານຊາຍລູກກົກຂອງພີ່ເອື້ອຍ,ຫຼາຍເຂີຍ ຊັ້ນຮອຍເອກຕຳຫຼວດຂອງເມືອງຫົງເຫີ.ມີນາງຕ້ວນແຢນຢຸນ ນາງສາວພະຍາບານທີ່ຖືກແຕ່ງຕັ້ງມາເປັນແພດປະຈຳພວກເຮົາ.ອີກສອງສະຫາຍທີ່ພວມຍິ້ມແຍ້ມຕໍ່ພວກເຮົາແມ່ນ ສະຫາຍ ພົງສະຫວັດ ພູມາວົງ ຫົວໜ້າກົງສູນໃຫຍ່ຂອງ ສ.ປ.ປ.ລາວປະຈຳຄຸນໝິງ ແລະ ນາງຈັນເພັງພັນລະຍາຂອງເພິ່ນ.
ເປັນເວລາເກືອບ 4 ໂມງແລງແລ້ວ,ຄິດວ່າຈະໄດ້ແວ່ພັກເຊົາທີ່ຄຸນໝິງຈັກຄືນໜຶ່ງ,ແຕ່ທັນໃດ ພວກຫຼານເຊີນໃຫ້ພວກເຮົາຂຶ້ນລົດ 2 ຄົນ ຍີຫໍ້ ແລນກຣູສເຊີ ປຣາໂດ.ບົວແກ້ວ ແລະ ນາງກູດ(ຊື່ນ້ອຍຂອງນາງແກ້ວວິພອນ)ນັ່ງຮ່ວມກັບພວກພີ່ນ້ອງຢູ່ລົດຄັນໄປກ່ອນ ສ່ວນຂ້າພະເຈົ້ານັ່ງຮ່ວມກັບນາງພະຍາບານຕ້ວນແຢ້ນຢຸນ ແລະ ນາຍຮ້ອຍເອກຕຳຫຼວດຫຼານຊາຍກົກ.ແຕ່ຄຸນໝິງໄປຫາບ້ານເກີດຂອງພີ່ເອື້ອຍມີຄວາມຍາວເຖິງ 800 ກິໂລແມັດ,ເປັນເຂດເມືອງທີ່ມີຊາຍແດນຕິດກັບແຂວງຜົ້ງສາລີຂອງລາວ ປະມານ 120 ກິໂລແມັດ.ໄຄແຕ່ວ່າ ເສັ້ນທາງທີ່ພວກເຮົາພວມໄປນັ້ນ ເປັນຖະໜົນສາຍດ່ວນ ລົດຕ້ອງແລ່ນໃນຄວາມໄວແຕ່100 ຫາ 120 ກິໂລແມັດຕໍ່ຊົ່ວໂມງ.
1 2 3 4 5 6 7
|
