ຫວ່າງກ່ອນນີ້,ບໍ່ດົນ, ນັກບູຮານນະຄະດີຈີນໄດ້ຮັບຮູ້ໃນເບື້ອງຕົ້ນວ່າ,ຂຸມຝັງສົບແຫ່ງຫນຶ່ງທີ່ສ້າງຂຶ້ນໃນສັດຕະວັດທີ 3 ທີ່ຖືກຄົ້ນພົບຢູ່ແຂວງເຫີຫນານທາງພາກກາງຂອງຈີນນັ້ນກໍ່ແມ່ນຂຸມຝັງສົບຂອງໂຈ້ໂສທີ່ຄົນຈີນຊອກຫາມາເປັນເວລາພັນກວ່າປີ.ການຄົ້ນພົບເທື່ອນີ້ຖືກສະຖາບັນບູຮານນະຄະດີຂອງສະພາບັນດິດວິທະຍາສາດສັງຄົມຈີນຈັດເປັນຫນຶ່ງໃນ 6 ການຄົ້ນພົບທາງດ້ານບູຮານນະຄະດີໃຫຍ່ໃນປີ 2009.ເມື່ອຂໍ້ສະຫລຸບດັ່ງກ່າວຖືກເຜີຍແຜ່ອອກແລ້ວ, ກໍ່ເຮັດໃຫ້ປະຊາຊົນຈີນສົນໃຈທີ່ສຸດ,ບາງຄົນຍັງສົງໃສວ່າຜູ່ທີ່ຝັງຢູ່ໃນຂຸມນັ້ນແມ່ນໂຈ້ໂສແທ້ຫລືບໍ່.ກ່ຽວກັບບັນຫານີ້, ນັກບູຮານນະຄະດີກ່າວວ່າ, ຍັງຕ້ອງຂຸດຄົ້ນແລະວິເຄາະຕໍ່ເອກະສານຂໍ້ມູນທີ່ມີຢູ່ໃນປັດຈຸບັນຕໍ່ໄປ.
ໂຈໂສແມ່ນນັກການເມືອງ, ນັກການທະຫານແລະນັກວັນນະຄະດີທີ່ມີຊື່ສຽງໃນສະໄຫມບູຮານຂອງຈີນ.ຂຸມຝັງສົບຂອງໂຈໂສຕັ້ງຢູ່ທິດໃຕ້ຂອງບ້ານຊີກ່າວເຊ້ຍຕາແສງອ່ານເຟີ່ງເມືອງອ່ານຢາງຂອງແຂວງເຫີນານ,ປັດຈຸບັນ, ບ້ານຊີກ່າວເຊ້ຍພຽງແຕ່ແມ່ນບ້ານນ້ອຍທີ່ບໍ່ມີຊື່ສຽງບ້ານຫນຶ່ງຢູ່ພາກກາງຂອງຈີນ,ຊາວບ້ານຢູ່ແຫ່ງນີ້ອາໄສເຮັດໄຮ່ເຮັດນາຫລືໄປເຮັດວຽກຢູ່ຖິ່ນອື່ນລ້ຽງຊີບ.ບາງຄົນກໍ່ອາດຈະຂຸດພົບເຄື່ອງບູຮານຈຳນວນຫນຶ່ງໃນເວລາເຮັດໄຮ່ເຮັດນາຫລືປຸກເຮືອນ,ບາງຄົນກໍ່ມັກສະສົມເຄື່ອງທີ່ແຕກເປັນແຜ່ນເຫລົ່ານີ້ໄວ້ເພື່ອເປັນເຄື່ອງຫລິ້ນ,ແລະກໍ່ມີບາງຄົນລັກຂຸດຂຸມສົບຊອກເອົາເຄື່ອງບູຮານໄປຂາຍເອົາເງິນຄຳທີ່ບໍ່ຖືກກົດຫມາຍ.ສ່ວນຂຸມສົບຂອງໂຈໂສກໍ່ແມ່ນຖືກຄົ້ນພົບໃນທ່າມກາງການຕໍ່ສູ້ລະຫວ່າງນັກບູຮານນະຄະດີກັບພວກລັກຂຸດຂຸມສົບເຫລົ່ານັ້ນ.
1 2 3 4 5 
