ການຮ່ວມມືຈີນ-ອາຊຽນ2012
(GMT+08:00) 2012-11-23 10:14:33 cri
ການປ້ອງກັນຊາດແລະປ້ອງກັນຄວາມສະຫງົບ
ວັນທີ29 ພຶດສະພາປີນີ້,ຢູ່ທີ່ນະຄອນຫຼວງພະນົມເປັນກຳປູເຈຍ, ພົນເອກລຽງກວ່າງເລ້ຍ,ທີ່ປຶກສາແຫ່ງລັດທັງເປັນລັດຖະມົນຕີວ່າການກະຊວງປ້ອງກັນປະເທດຈີນໄດ້ເຂົ້າຮ່ວມການປຶກສາຫາລືລະຫວ່າງລັດຖະມົນຕີກະຊວງປ້ອງກັນປະເທດຈີນກັບບັນດາປະເທດອາຊຽນເປັນເທື່ອທຳອິດ,ຝ່າຍຕ່າງໆໄດ້ແລກປ່ຽນຄວາມຄິດຄວາມເຫັນກ່ຽວກັບບັນຫາສະຖານະການຄວາມຫມັ້ນຄົງພຽງໃນພາກພື້ນພ້ອມດ້ວຍການລົງເລິກການຮ່ວມມືທີ່ໄວ້ເນື້ອເຊື່ອໃຈກັນແລະບັນຫາອື່ນໆ.
ເດືອນພຶດສະພາ,ຕຳຫຼວດຈີນໄດ້ຮ່ວມມືກັບຕຳຫຼວດຂອງ 7 ປະເທດອາຊຽນເຊັ່ນ:ໄທ,ມະເລເຊຍ, ກຳປູເຈຍ ,ອິນໂດເນເຊຍ, ຟິລິບປິນເປັນຕົ້ນເພື່ອດຳເນີນການເຄື່ອນໄຫວຢ່າງເປັນເອກະພາບກັນ,ໂດຍໄດ້ມ້າງກຸ່ມທີ່ດຳເນີນການທີ່ຜິດກົດໝາຍໃນການນຳໃຊ້ສື່ອີເລັກໂທຼນິກການຫຼອກຕົ້ມຜ່ານທາງໂທລະຄົມທີ່ໃຫຍ່ທີ່ສຸດ, ເຊິ່ງຄະດີດັ່ງກ່າວເກີດຂຶ້ນໃນວັນທີ29 ພະຈິກ2011ຢ່າງສຳເລັດຜົນ,ຈັບຕົວຜູ່ຖືກສົງໄສ482 ຄົນ,ໄດ້ສະກັດກັ້ນທ່າອຽງທີ່ເກີດການກະທຳດັ່ງກ່າວນີ້ຢ່າງບັງເກີດຜົນ.
ໂດຍຜ່ານກອງປະຊຸມສຳມະນາແລະການຊຸດສຳມະນາຕ່າງໆ ,ພາກສ່ວນຮັກສາຄວາມສະຫງົບຂອງສອງຝ່າຍໄດ້ແລກປ່ຽນຄວາມຄິດຄວາມເຫັນແລະຕິດຕໍ່ພົວພັນກັນຢ່າງໃກ້ຊິດ. ເດືອນພຶດສະພາປີນີ້,ລັດຖະບານຈີນໄດ້ສົ່ງຄະນະຜູ່ແທນເຂົ້າຮ່ວມກອງປະຊຸມຫົວຫນ້າຕຳຫຼວດຂອງປະເທດອາຊຽນຄັ້ງທີ32ທີ່ຈັດຂຶ້ນຢູ່ນະຄອນຫຼວງເນປີດໍຂອງມຽນມາ.ເດືອນມິຖຸນາ,ຊຸດສຳມະນາຂອງເຈົ້າຫນ້າທີ່ຕຳຫຼວດລະດັບສູງຂອງອົງການຕຳຫຼວດຈີນອາຊຽນໄດ້ຈັດຂຶ້ນຢູ່ແຂວງເຈີ້ຈ່ຽງຂອງຈີນ.ນັບແຕ່ເດືອນມິຖຸນາຮອດເດືອນສິງຫາ,ໂຄງການອົບຮົມເຕັກນິກການສືບສວນທາງອາຍາຈີນ-ອາຊຽນຊຸດທີ9ໄດ້ຈັດຂຶ້ນຢູ່ທີ່ນະຄອນຫຼວງປັກກິ່ງ.ນອກນີ້,ຈີນຍັງຈະຈັດການຊຸດສຳມະນາເຈົ້າຫນ້າທີ່ປະຕິດບັດກົດຫມາຍລະດັບສູງໃນທ້າຍປີນີ້,ເພື່ອເຊື້ອເຊີນເຈົ້າຫນ້າທີ່ການປະຕິບັດຕາມກົດຫມາຍຂອງປະເທດສະມາຊິກອາຊຽນເຂົ້າຮ່ວມ.
ສອງ:ເສດຖະກິດການຄ້າແລະການລົງທຶນ
ປີ2011,ຍອດມູນຄ່າການຄ້າສອງຝ່າຍຈີນອາຊຽນໄດ້ສູງເຖິງ362 ຕື້850 ລ້ານໂດລາສະຫະລັດ,ເພີ່ມຂຶ້ນຫຼາຍກວ່າໄລຍະດຽວກັນຂອງປີ2010 23,9%,ອາຊຽນໄດ້ກາຍເປັນຄູ່ການຄ້າໃຫຍ່ອັນດັບທີສາມ,ຕະຫຼາດການສົ່ງອອກສິນຄ້າໃຫຍ່ອັນດັບທີ4ແລະແຫຼ່ງການນຳເຂົ້າສິນຄ້າໃຫຍ່ອັນດັບທີສອງຂອງຈີນ.ຈີນໄດ້ເປັນປະເທດຄູ່ການຄ້າໃຫຍ່ອັນດັບຫນຶ່ງຂອງອາຊຽນໃນ 3 ປີລຽນຕິດ,ຮອດທ້າຍເດືອນກັນຍາປີ2012,ຍອດມູນຄ່າການຄ້າຂອງສອງຝ່າຍໄດ້ບັນລຸເຖິງ288 ຕື້890 ລ້ານໂດລາສະຫະລັດ.
ການລົງທຶນສອງຝ່າຍລະຫວ່າງຈີນກັບອາຊຽນໄດ້ເປີດກວ້າງຢ່າງບໍ່ຢຸດຢັ້ງ,ຮອດທ້າຍເດືອນກັນຍາປີນີ້,ການລົງທຶນລະຫວ່າງສອງຝ່າຍໄດ້ມີ 94ຕື້ໂດລາສະຫະລັດ.ນັບແຕ່ປີ2006 ເປັນຕົ້ນມາ,ນັກທຸລະກິດຈີນໄດ້ສ້າງຕັ້ງເຂດການຮ່ວມມືທາງດ້ານເສດຖະກິດການຄ້າ 5 ແຫ່ງຢູ່ກຳປູເຈຍ, ໄທ, ຫວຽດນາມແລະອິນໂດເນເຊຍ,ເນື້ອທີ່ທີ່ມີແຜນການລວມທັງຫມົດມີ 31 ກິໂລຕາແມັດ.ຮອດທ້າຍເດືອນກໍລະກົດ2012,ໄດ້ສຳເລັດການລົງທຶນທີ່ມີມູນຄ່າທັງຫມົດ934 ລ້ານໂດລາສະຫະລັດ,ມີວິສາຫະກິດ 91ແຫ່ງໄດ້ຕັ້ງຢູ່ຂົງເຂດແຫ່ງນີ້,ສຳເລັດມູນຄ່າການຜະລິດເຖິງ 1 ຕື້ 450 ລ້ານໂດລາສະຫະລັດ,ຊຸກຍູ້ໃຫ້ມີປະຊາຊົນທ້ອງຖິ່ນມີການປະກອບວຽກເຮັດງານທຳເກືອບ8000 ຄົນ.
ຮອດທ້າຍເດືອນກໍລະກົດ2012, ວິສາຫະກິດຈີນໄດ້ເຊັນສັນຍາກໍ່ສ້າງໂຄງການຮັບເຫມົາກໍ່ສ້າງໃນປະເທດອາຊຽນທີ່ມີມູນຄ່າທັງຫມົດ134 ຕື້ 900 ລ້ານໂດລາສະຫະລັດ,ສຳເລັດມູນຄ່າການດຳເນີນທຸລະກິດເຖິງ 87 ຕື້ໂດລາສະຫະລັດ.
ງານວາງສະແດງສິນຄ້າຈີນ-ອາຊຽນຄັ້ງທີ9
ນັບແຕ່ວັນທີ21ຮອດວັນທີ25ກັນຍາ2012,ງານວາງສະແດງສິນຄ້າຈີນ-ອາຊຽນຄັ້ງທີ9ໄດ້ຈັດຂຶ້ນຢູ່ເມືອງນານນິງຂອງເຂດກວາງຊີ. ທ່ານສີຈິ້ນຜິງ,ຮອງປະທານປະເທດຈີນ,ທ່ານເທັນເຊັນ,ປະທານາທິບໍດີມຽນມາເຊິ່ງເປັນປະເທດກຽດຕິຍົດຂອງງານວາງສະແດງສິນຄ້າຄັ້ງນີ້,ທ່ານທອງສິງ ທຳມະວົງ,ນາຍົກລັດຖະມົນຕີລາວ,ທ່ານຫງວຽນເຕີນຢຸງ,ນາຍົກລັດຖະມົນຕີຫວຽດນາມ,ທ່ານມູຊິນເຕັງ,ຮອງນາຍົກລັດຖະມົນ ຕີມະເລເຊຍ ທ່ານກິດຕິຣັດ ນະຣະນອງ,ຮອງນາຍົກລັດຖະມົນຕີໄທ,ທ່ານໂລຮັສ,ທູດພິເສດຂອງປະທານາທິບໍດີຟິລິບປິນ,ທ່ານລິນຄ່າງຊ້ຽນ,ຮອງເລຂາທິການໃຫຍ່ກອງເລຂາອາຊຽນ,ທ່ານສຸພະໄຊ ພານິດສະພັກ ເລຂາທິການໃຫຍ່ປະຊຸມການຄ້າແລະການພັດທະນາຂອງອົງການສະຫະປະຊາຊາດແລະທ່ານອື່ນໆເຂົ້າຮ່ວມ.
ໃນໄລຍະດຽວກັນ,ກອງປະຊຸມສຸດຍອດການຄ້າແລະການລົງທຶນແລະເວທີປຶກສາຫາລືເຂດການຄ້າເສລີຈີນ-ອາຊຽນຄັ້ງທີ9ໄດ້ຈັດຂຶ້ນຢ່າງ ສຳເລັດຜົນຢູ່ເມືອງນານນິງ.ຫົວຂໍ້ຫຼັກຂອງກອງປະຊຸມສຸດຍອດຄັ້ງນີ້ແມ່ນ"ຕິດຕໍ່ພົວພັນແລະເຊື່ອມໂຍງເຂົ້າກັນແລະຮ່ວມມືໄດ້ຮັບຜົນປະໂຫຍດ".ທ່ານສີຈີ້ນຜິງ,ຮອງປະທານປະເທດຈີນໄດ້ເຂົ້າຮ່ວມພິທີໄຂປະຊຸມແລະກ່າວຄຳປາໄສທີ່ມີຫົວຂໍ້ວ່າ:"ຮ່ວມກັນຊຸກຍູ້ການຮ່ວມມືລົງສູ່ລວງເລິກເພື່ອຮ່ວມກັນບັນລຸການພັດທະນາແບບຍືນຍົງ".ທ່ານເທັນເຊັນ,ປະທານາທິບໍດີມຽນມ້າກໍ່ໄດ້ເຂົ້າຮ່ວມພິທີໄຂປະຊຸມແລະກ່າວຄຳປາໄສເຊັ່ນກັນ.
