ການຮ່ວມມືຈີນ-ອາຊຽນ2012
(GMT+08:00) 2012-11-23 10:14:33 cri
ການກວດກາຄຸນນະພາບ
ວັນທີ 19 ຫາວັນທີ 21 ກັນຍາ 2012, ກອງປະຊຸມລັດຖະມົນຕີກວດກາຄຸນນະພາບຈີນ-ອາຊຽນຫຼືການຮ່ວມມືSPSຄັ້ງທີ 3 ໄດ້ຈັດຂຶ້ນຢູ່ນະຄອນນານນິງເຂດກວາງຊີຂອງຈີນ. ຫົວຂໍຕົ້ນຕໍຂອງກອງປະຊຸມເທື່ອນີ້ແມ່ນ"ເພີ່ມທະວີການຮ່ວມມື, ໃຫ້ການບໍລິການແກ່ການກໍ່ສ້າງເຂດການຄ້າເສລີຈີນ-ອາຊຽນ". ກອງປະຊຸມໄດ້ພິຈາລະນາແລະອະນຸມັດ"ແຜນການປະຕິບັດບົດບັນທຶກຄວາມເຂົ້າໃຈການຮ່ວມມືSPSຈີນ-ອາຊຽນສາກົນ 2013 - 2014", ໄດ້ຕົກລົງໂຄງການຮ່ວມມືທີ່ສຳຄັນໃນຂົງເຂດSPSລະຫວ່າງຈີນກັບອາຊຽນໃນສອງປີຕໍ່ໜ້າ, ແລະໄດ້ປະກາດ"ຖະແຫຼງການຮ່ວມກອງປະຊຸມລັດຖະມົນຕີການກວດກາຄຸນນະພາບຈີນ-ອາຊຽນຄັ້ງທີ 3"
ວັນທີ 20 ກັນຍາ, ເວັບໄຊSPSທີ່ຈີນ-ອາຊຽນຮ່ວມມືພັດທະນາໄດ້ເລີ່ມເປີດບໍລິການຢ່າງເປັນທາງການ, ເນື້ອໃນຕົ້ນຕໍລວມທັງສູນຖະແຫຼງຂ່າວ, ກອງປະຊຸມລັດຖະມົນຕີ, ກົນໄກປະສານງານຂອງSPS, ຄວາມຮູ້ກ່ຽວກັບ, ມາດຖານກົດໝາຍຂໍ້ກຳນົດຂອງSPS, ຊີວະນາໆພັນທີ່ມີຜົນຮ້າຍ, ການຮ່ວມມືແລະແລກປ່ຽນ, ສັນຍາທີ່ກ່ຽວຂ້ອງກັບSPSແລະອື່ນໆ.
ແປດ, ການພັດທະນາອະນຸພາກພື້ນແມ່ນ້ຳຂອງ
ການຄ້າແລະການລົງທຶນ
ຈີນຕັ້ງໜ້າເຂົ້າຮ່ວມແລະອອກແຮງຊຸກຍູ້ການກໍ່ສ້າງແລວທາງເສດຖະກິດGMS. ໃນເວທີປຶກສາຫາລືແລວທາງເສດຖະກິດຄັ້ງທີ 4 ທີ່ຈັດຂຶ້ນຢູ່ມັນດະເລຂອງມຽນມາໃນວັນທີ 28 ມິຖຸນາ 2012, ຈີນໄດ້ສະເໜີຄວາມເຫັນຕ່າງໆກ່ຽວກັບການກໍ່ສ້າງແລວທາງເສດຖະກິດ, ລວມທັງຊຸກຍູ້ການກໍ່ສ້າງແລວທາງຄົມມະນາຄົມ, ທາງລົດໄຟຜ່ານອາຊີ, ສວນອຸດສາຫະກຳ, ເຂດຮ່ວມມືຢູ່ຊາຍແດນ, ເຮັດໃຫ້ການຄ້າຫັນເປັນແບບສະດວກແລະການກໍ່ສ້າງທາງດ່ວນທາງດ້ານຂໍ້ມູນຂ່າວສານ, ເພື່ອບັນລຸການຕິດຕໍ່ພົວພັນກັນຢ່າງຮອບດ້ານ, ເພີ່ມການກໍ່ສ້າງຄວາມສາມາດຂອງການຮ່ວມມືແລວທາງເສດຖະກິດ. ໃນຕົ້ນປີ 2012, ຈີນໄດ້ຈັດຊຸດອົບຮົມຊຸດໜຶ່ງໃຫ້ເຈົ້າໜ້າທີ່ປະເທດອະນຸພາກພື້ນແມ່ນ້ຳຂອງກ່ຽວກັບການເຮັດໃຫ້ການຄ້າຫັນເປັນແບບສະດວກ, ແລະມີແຜນຈະອົບຮົມຜູ້ມີຄວາມຮູ້ຄວາມສາມາດວິຊາສະເພາະ 1500 ຄົນໃຫ້ແກ່ບັນດາປະເທດອະນຸພາກພື້ນແມ່ນ້ຳຂອງໃນ 3 ປີຕໍ່ໜ້າ.
ສິ່ງແວດລ້ອມ
ຈີນໃຫ້ຄວາມສຳຄັນໃນລະດັບສູງຕໍ່ການຮ່ວມມືແລະແລກປ່ຽນກັບປະເທດອະນຸ ພາກພື້ນແມ່ນ້ຳຂອງໃນດ້ານສິ່ງແວດລ້ອມ. ຕັ້ງໜ້າເຂົ້າຮ່ວມການຄົ້ນຄວ້າແລະຮ່າງເອກະສານຂອບໄລຍະສອງແລະແຜນການດຳເນີນງານ2012-2016ຂອງແຜນການແລວທາງເສດຖະກິດຂອງຊີວະນາໆພັນຫຼື(CEP-BCI), ເຊິ່ງເປັນໂຄງການສິ່ງແວດລ້ອມຕົ້ນຕໍ. ໃນເດືອນພຶດສະພາປີນີ້, ກອງປະຊຸມປະຈຳປີຄັ້ງທີ 18 ຂອງໜ່ວຍງານສິ່ງແວດລ້ອມອະນຸພາກພື້ນແມ່ນ້ຳຂອງທີ່ຈັດຂຶ້ນຢູ່ນະຄອນຊຽງຮຸ່ງແຂວງຢຸນນານປະເທດຈີນໄດ້ພິຈາລະນາຮັບຮອງແຜນການເຄື່ອນໄຫວລວມຂອງໂຄງການສິ່ງແວດລ້ອມຕົ້ນຕໍໄລຍະທີ 2. ປະຈຸບັນ, ໂຄງການດັ່ງກ່າວໄດ້ເຂົ້າສູ່ໄລຍະເລີ່ມປະຕິບັດແລ້ວ.
ຄົມມະນາຄົມ
ຂົວແຫ່ງທີສາມ(ຂົວຊຽງຂົງ-ຫວຍໄຊ)ທີ່ຂ້າມແມ່ນ້ຳຂອງແລະເຊື່ອມຕໍ່ລາວກັບໄທຂອງສາຍຕາເວັນຕົກຂອງແລວທາງເສດຖະກິດເໜືອໃຕ້ (ທາງຫຼວງຄຸນມິງ-ລາວ-ບາງກອກ), ແມ່ນລັດຖະບານຈີນແລະໄທຮ່ວມກັນຄົນທະເຄິ່ງລົງທຶນສ້າງຂຶ້ນ, ແລະເລີ່ມສ້າງຢ່າງເປັນທາງການໃນເດືອນກຸມພາປີ 2012, ຄາດວ່າຈະສ້າງສຳເລັດແລະເປີດການບໍລິການໃນເດືອນມິຖຸນາປີ 2013. ທາງຫຼວງຕອນຢູ່ຈີນປະມານ 407 ກິໂລແມັດຂອງສາຍກາງຂອງແລວທາງເສດຖະກິດເໜືອໃຕ້ (ນະຄອນຄຸນມິງ-ຮາໂນ້ຍ-ຮາຍຟ໋ອງ) ໄດ້ປັບປຸງເປັນທາງດ່ວນໝົດແລ້ວ. ສາຍຕາເວັນອອກຂອງແລວເສດຖະກິດເໜືອໃຕ້(ຄຸນມິງ-ນານນິງ-ຮາໂນ້ຍ)ມີຄວາມຍາວທັງໝົດ 1208 ກິໂລແມັດ, ຕອນຢູ່ຈີນທີ່ມີຄວາມຍາວ 179 ກິໂລແມັດນັ້ນໄດ້ປັບປຸງເປັນທາງດ່ວນແລ້ວ.
ຈີນຮ່ວມມືກັບປະເທດອາຊຽນຕ່າງໆຢ່າງໃກ້ຊິດ. ເພື່ອສະໜອງຄວາມສະດວກໃຫ້ແກ່ການຂົນສົ່ງທາງບົກລະຫວ່າງດ່ານພາສີຂອງຈີນກັບຫວຽດນາມ, ສອງຝ່າຍໄດ້ເຊັນ"ສັນຍາກ່ຽວກັບການສ້າງລະບຽບການໃບອະນຸມັດການແລ່ນລົດ"ຢູ່ປັກກິ່ງໃນເດືອນພຶດສະພາປີ 2012, ໂດຍໄດ້ຕົກລົງເປີດທາງຂົນສົ່ງຜູ້ໂດຍສານ 4 ສາຍແລະທາງຂົນສົ່ງສິນຄ້າ 1 ສາຍຢູ່ 2 ຊ່ອງຂອງດ່ານພາສີຈີນກັບຫວຽດນາມ, ແລະໄດ້ຈັດພິທີເປີດບໍລິການໃນເດືອນສິງຫາປີນີ້.
ເກົ້າ, ການຫຼຸດຜ່ອນຄວາມທຸກຍາກແລະການພັດທະນາສັງຄົມ
ວັນທີ 26 ຫາວັນທີ 27 ກັນຍາ 2012, "ເວທີປຶກສາຫາລືການພັດທະນາສັງຄົມແລະຫຼຸດຜ່ອນຄວາມທຸກຍາກຈີນ-ອາຊຽນຄັ້ງທີ 6"ທີ່ມີຫົວຂໍ້ວ່າ"ຈີນກັບອາຊຽນ: ການພັດທະນາແບບລວມໝົດທຸກຢ່າງແລະຫຼຸດຜ່ອນຄວາມທຸກຍາກ"ໄດ້ຈັດຂຶ້ນຢູ່ເຂດກວາງຊີຂອງຈີນ.
ວັນທີ 13 ຫາວັນທີ 15 ກັນຍາ, "ກອງປະຊຸມເຈົ້າໜ້າທີ່ອາວຸໂສກ່ຽວກັບສະຫວັດດີການສັງຄົມແລະການພັດທະນາຈີນ-ອາຊຽນຄັ້ງທີ 7" ໄດ້ຈັດຂຶ້ນຢູ່ຮາໂນ້ຍຂອງຫວຽດນາມ, ຫົວຂໍ້ຂອງກອງປະຊຸມແມ່ນ"ຊຸກຍູ້ການບໍລິການແລະການປົກປ້ອງກຸ່ມຄົນທີ່ດ້ອຍໂອກາດໃນສັງຄົມ."
ຈີນຍັງຈະຈັດກອງປະຊຸມສຳມະນາກ່ຽວກັບການແບ່ງປັນຜະລິດຕະພັນຂໍ້ມູນຂ່າວສານໃນຂົງເຂດຫຼຸດຄວາມສ່ຽງໄພທຳມະຊາດຈີນ-ອາຊຽນໃນປີນີ້, ແລະຮ່ວມກັນກັບກອງເລຂາອາຊຽນຈັດກອງປະຊຸມສຳມະນາຊັ້ນສູງກ່ຽວກັບການຫັນການບໍລິການສາທາລະນະປະກັນໄພສັງຄົມໃຫ້ເປັນມາດຖານຈີນ-ອາຊຽນ, ເພື່ອຄົ້ນຄວ້າປຶກສາຫາລືແລະແລກປ່ຽນກ່ຽວກັບການອອກແບບແລະວິທີດຳເນີນງານຂອງການບໍລິການສາທາລະນະໃນດ້ານປະກັນສັງຄົມ.
