ການຮ່ວມມືຈີນ-ອາຊຽນ2012
(GMT+08:00) 2012-11-23 10:14:33 cri
ຫົກ: ວັດທະນະທຳ ການສຶກສາແລະການທ່ອງທ່ຽວ
ວັດທະນະທຳ
ວັນທີ25 ພຶດສະພາ2012,ກອງປະຊຸມລັດຖະມົນຕີວັດທະນະທຳຈີນອາຊຽນຄັ້ງທຳອິດໄດ້ຈັດຂຶ້ນຢູ່ສິງກະໂປ.ຜູ້ແທນຝ່າຍທີ່ຮ່ວມປະຊຸມໄດ້ຕົກລົງການສ້າງຕັ້ງກົນໄກກອງປະຊຸມລັດຖະມົນຕີວັດທະນະທຳຈີນອາຊຽນ,ແລະເປິກສາຫາລືກ່ຽວກັບເລື່ອງຕ່າງໆເຊັ່ນ:ການປະຕິບດກົນໄກດັ່ງກ່າວ ການຮ່ວມມືລະຫວ່າງສອງຝ່າຍໃນຂົງເຂດວັດທະນະທຳໃນໄລຍະຕໍ່ຫນ້າພ້ອມດ້ວຍ"ແຜນການປະຕິບັດງານກ່ຽວກັບການຮ່ວມມືທາງດ້ານວັດທະນະທຳລະຫວ່າງຈີນກັບອາຊຽນ"ເປັນຕົ້ນ.
ເລີ່ມແຕ່ປີ 2006 ມານີ້, ສອງຝ່າຍໄດ້ຈັດ"ເວທີປຶກສາຫາລຶຂະແໜງການວັດທະນະທຳຈີນ-ອາຊຽນ"ສຳເລັດຜົນ 6 ເທື່ອຢ່າງ, ອັນໄດ້ປະກອບສ່ວນຢ່າງຕັ້ງໜ້າເພື່ອຊຸກຍູ້ການແບ່ງປັນຊັບພະຍາກອນແລະການຮ່ວມມືຢ່າງແທ້ຈິງໃນການແລກປ່ຽນວັດທະນະທຳຂອງພາກພື້ນແລະລົງເລິກການພົວພັນລະຫວ່າງຈີນກັບອາຊຽນ. ປີ 2012, ເວທີປຶກສາຫາລືດັ່ງກ່າວປ່ຽນຊື່ວ່າ "ເວທີປຶກສາຫາລືວັດທະນະທຳຈີນ-ອາຊຽນ", ແລະໄດ້ຈັດຂຶ້ນຢູ່ນະຄອນນານນິງເຂດກວາງຊີຂອງຈີນແຕ່ວັນທີ 10 ຫາວັນທີ 14 ກັນຍາຜ່ານມາ.
ການສຶກສາ
---- ສັບປະດາແລກປ່ຽນການສຶກສາຈີນ-ອາຊຽນ
ວັນທີ 17 ຫາວັນທີ 20 ກັນຍາ, ສັບປະດາແລກປ່ຽນການສຶກສາຈີນ-ອາຊຽນຄັ້ງທີ 5 ໄດ້ຈັດຂຶ້ນຢູ່ແຂວງກຸ້ຍໂຈ່ວຂອງຈີນ. ກິດຈະກຳເທື່ອນີ້ມີຫົວຂໍ້ວ່າ"ການປະດິດສ້າງແບບເປີດປະຕູ, ການຮ່ວມມືຢ່າງແທ້ຈິງ", ໃນໄລຍະດັ່ງກ່າວໄດ້ຈັດ"ເວທີປຶກສາຫາລືອະທິການບໍດີມະຫາວິທະຍາໄລຈີນອາຊຽນ", "ງານວັດທະນະທຳດ້ານອາຫານຈີນ-ອາຊຽນ", "ກອງປະຊຸມສຳມະນາກ່ຽວກັບການພັດທະນາຂະແໜງການວັດທະນະທຳຈີນ-ອາຊຽນ", ແລະ"ເວທີປຶກສາຫາລືການສຶກສາແພດສາດຈີນ-ອາຊຽນ"ເປັນຕົ້ນ, ມີເຈົ້າໜ້າທີ່ 600 ກວ່າຄົນທີ່ມາຈາກພາກສ່ວນສຶກສາທິການຂອງປະເທດອາຊຽນ, ໂຮງຮຽນຊັ້ນສູງທີ່ກ່ຽວຂ້ອງ, ສະຖານທູດອາຊຽນປະຈຳຈີນ, ສູນຈີນ-ອາຊຽນ, ກອງເຂລາອາຊຽນ, ສະຫະພັນມະຫາວິທະຍາໄລອາຊຽນພ້ອມດ້ວຍຜູ້ແທນຂອງໂຮງຮຽນຊັ້ນສູງຈຳນວນໜຶ່ງຂອງຈີນເຂົ້າຮ່ວມ.
----ສູນອົບຮົບອາຊີວະສຶກສາຈີນ-ອາຊຽນ 10 ແຫ່ງ
ໃນກອງປະຊຸມສຸດຍອດຈີນ-ອາຊຽນຄັ້ງທີ 14 ທີ່ຈັດຂຶ້ນໃນປີ 2011, ທ່ານເວີນເຈ່ຍປາວ, ນາຍົກລັດຖະມົນຕີຈີນໄດ້ສະເໜີຂໍ້ລິເລີ່ມທີ່"ສ້າງຕັ້ງສູນອົບຮົມອາຊີວະສຶກສາ 10 ແຫ່ງປະກອບສ່ວນໃຫ້ອາຊຽນ, ເພື່ອສະໜອງຊັບພະຍາກອນມະນຸດທີ່ຕ້ອງການໃນການພັດທະນາເສດຖະກິດສັງຄົມຂອງປະເທດອາຊຽນ." ປະຈຸບັນ, ສູນອົບຮົມອາຊີວະສຶກສາຈີນ-ອາຊຽນ 10 ແຫ່ງລ້ວນແຕ່ໄດ້ສ້າງຕັ້ງຂຶ້ນສຳເລັດແລ້ວ, ຕັ້ງຢູ່ເຂດປົກຄອງຕົນເອງເຜົ່າຈ້ວງກວາງຊີ, ແຂວງເສສວນ, ແຂວງຢຸນນານ, ແຂວງກຸ້ຍໂຈ່ວ, ແຂວງຝູຈ້ຽນແລະແຂວງເຮ່ຫົງຈ່ຽງເປັນຕົ້ນ, ເນື້ອໃນຂອງການອົບຮົມແມ່ນຢູ່ໃນຂົງເຂດການປະຊຸມແລະງານວາງສະແດງດ້ານການຄ້າ, ສິນລະປະວັດທະນະທຳ, ການສອນພາສາຈີນໃຫ້ຄົນຕ່າງປະເທດ, ການທະນາຄານແລະສ່ວຍສາອາກອນ, ແພດແຜນບູຮານ, ພະລັງງານໃໝ່ແລະອື່ນໆ.
"ແຜນການຮັບ-ສົ່ງນັກສຶກສາໄປຮຽນຢູ່ແຕ່ລະປະເທດຮ່ວມກັນຈຳນວນ 1 ແສນຄົນ"
ມາຮອດທ້າຍປີ 2011, ນັກສຶກສາຂອງ 10 ປະເທດອາຊຽນທີ່ຮຽນຢູ່ຈີນມີ 54,790 ຄົນ, ໃນນັ້ນລວມທັງນັກສຶກສາ 4,118 ຄົນທີ່ໄດ້ທຶນການສຶກສາຈາກລັດຖະບານຈີນ. ນັກສຶກສາປະເພດຕ່າງໆຂອງຈີນທີ່ໄປຮຽນຢູ່ປະເທດອາຊຽນມີ 101,039 ຄົນ. ປີ 2012, ຈີນໄດ້ສືບຕໍ່ເພີ່ມທຶນການສຶກສາຈາກລັດຖະບານຕໍ່ປະເທດອາຊຽນ, ຊຸກຍູ້ປະຕິບັດ"ແຜນການຮຽນຕໍ່ຢູ່ຈີນຂອງນັກສຶກສາຕ່າງປະເທດ", ເພື່ອດຶງດູດນັກສຶກສາຂອງປະເທດອາຊຽນມາຮຽນຢູ່ຈີນຫຼາຍກວ່າເກົ່າ, ແລະສົ່ງເສີມນັກສຶກສາຂອງຈີນແລະປະເທດອາຊຽນເພີ່ມທະວີການແລກປ່ຽນເຊິ່ງກັນແລະກັນ.
----ການສອນພາສາຈີນແລະຄົ້ນຄວ້າອາຊຽນ
ຈີນໃຫ້ຄວາມສຳຄັນໃນລະດັບສູງຕໍ່ການສອນພາສາຈີນຢູ່ບັນດາປະເທດອາຊຽນ. ປະຈຸບັນ, ຈີນໄດ້ຕັ້ງສະຖາບັນຂົງຈື້ 26 ແຫ່ງແລະຫ້ອງຮຽນຂົງຈື້ 14 ແຫ່ງຢູ່ກຳປູເຈຍ, ລາວ, ມາເລເຊຍ, ມຽນມາ, ອິນໂດເນເຊຍ, ຟີລິບປີນ, ສິງກະໂປແລະໄທ.
ພ້ອມກັນນັ້ນ, ຈີນຍັງໄດ້ເພີ່ມທະວີການຄົ້ນຄວ້າພາກພື້ນອາຊຽນແລະປະເທດອາຊຽນ. ມະຫາ ວິທະຍາໄລປັກກິ່ງ, ມະຫາວິທະຍາໄລພາສາຕ່າງປະເທດປັກກິ່ງ, ມະຫາວິທະຍາໄລເຊ້ຍເມີນ, ມະຫາວິທະຍາໄລກຸ້ຍໂຈ່ວ, ແລະມະຫາວິທະຍາໄລຢຸນນານເປັນຕົ້ນລ້ວນແຕ່ໄດ້ຕັ້ງສູນຄົ້ນຄວ້າປະເທດແລະພາກພື້ນອາຊຽນ. ໂຮງຮຽນຊັ້ນສູງຫຼາຍສິບແຫ່ງຂອງຈີນໄດ້ຕັ້ງຫຼັກສູດການສອນພາສາຂອງບັນດາປະເທດອາຊຽນ, ນັກສຶກສາຈີນທີ່ຮຽນພາສາຂອງປະເທດອາຊຽນນັບມື້ນັບຫຼາຍຂຶ້ນ, ການແລກປ່ຽນທາງດ້ານວິຊາການລະຫວ່າງໂຮງຮຽນຊັ້ນສູງຂອງຈີນກັບປະເທດອາຊຽນກໍ່ນັບມື້ນັບຫຼາຍຂຶ້ນ.
