ໄຊຊະນະອັນຍິ່ງໃຫຍ່ທີ່ພັກກອມມູນິດຈີນນຳພາປະຊາຊົນຈີນນັ້ນ ເຮັດໃຫ້ປະຊາຊາດຈີນທີ່ມີຄວາມສີວິໄລແລະປະຫວັດສາດ 5 ພັນກວ່າປີນັ້ນກ້າວໄປສູ່ຄວາມເປັນທັນສະໄໝຢ່າງຮອບດ້ານ ເຮັດໃຫ້ຄວາມສີວິໄລຂອງຈີນເປັ່ງປະກາຍຄວາມຮຸ່ງເຮືອງ ແລະມີຊີວິດຊີວາໃໝ່ໃນຂະບວນການຫັນເປັນທັນສະໄໝ; ເຮັດໃຫ້ທັດສະນະກ່ຽວກັບສັງຄົມນິຍົມທີ່ມີປະຫວັດສາດ 500 ປີນັ້ນໄດ້ສ້າງເສັ້ນທາງຖືກຕ້ອງທີ່ມີລັກສະນະຕົວຈິງແລະ ເປັນໄປໄດ້ຢູ່ປະເທດທີ່ມີປະຊາກອນຈຳນວນຫຼາຍທີ່ສຸດໃນໂລກ, ເຮັດໃຫ້ລັດທິສັງຄົມນິຍົມວິທະຍາສາດໃນສັດຕະວັດທີ 21 ມີຊີວິດຊີວາຄືນໃໝ່; ເຮັດໃຫ້ປະເທດຈີນໃໝ່ທີ່ມີປະຫວັດ 60 ກວ່າປີນັ້ນໄດ້ຮັບຜົນງານເປັນທີ່ປະຈັກຕາຂອງຊາວໂລກ, ປະເທດຈີນເປັນປະເທດພວມພັດທະນາ ໃຫຍ່ທີ່ສຸດໃນໂລກໄດ້ຫຼຸດພົ້ນອອກຈາກຄວາມທຸກຍາກກ້າວຂຶ້ນເປັນກຸ່ມເສດຖະກິດໃຫຍ່ທີ 2 ໃນໂລກໂດຍໃຊ້ເວລາສັ້ນໆພຽງແຕ່ 30 ປີ, ໄດ້ພົ້ນອອກຈາກຄວາມອັນຕະລາຍທີ່ຈະຫຼ້າຫຼັງໃນໂລກ, ໄດ້ສ້າງຄວາມມະຫັດສະຈັນໃນການພັດທະນາຂອງສັງຄົມມະນຸດ ເຮັດໃຫ້ປະຊາຊາດຈີນມີຊີວິດຊີວາຮຸ່ງເຮືອງເຫຼືອງເຫຼື້ອມ.
ປະຫວັດສາດບອກໃຫ້ພວກເຮົາຮູ້ວ່າ, ຖ້າບໍ່ມີການຊີ້ນຳຈາກທິດສະດີທີ່ກ້າວໜ້າ, ບໍ່ມີການນຳພາຈາກພັກການເມືອງກ້າວໜ້າທີ່ຍຶດຖືທິດສະດີທີ່ກ້າວໜ້າ, ບໍ່ມີພັກການເມືອງກ້າວໜ້າທີ່ໄປຕາມປ່ອງລ່ອງຕາມແປວແຫ່ງປະຫວັດສາດ, ມີຄວາມກ້າຫານໃນການຮັບໜ້າທີ່ປະຫວັດສາດ ແລະກ້າເສຍສະຫຼະຢ່າງສູງສົ່ງ, ປະຊາຊົນຈີນກໍບໍ່ສາມາດເອົາຊະນະພັກຝ່າຍປະຕິການຕ່າງໆ, ປະຊາຊາດຈີນກໍບໍ່ສາມາດປ່ຽນແປງຊາຕາກຳທີ່ຖືກກົດຂີ່ຂູດຮີດແລະ ເປັນຂ້ອຍຂ້າ, ປະເທດພວກເຮົາກໍບໍ່ສາມາດສາມັກຄີແລະເປັນເອກະພາບກັນ ແລະກໍບໍ່ສາມາດກ້າວໄປສູ່ຄວາມຈະເລີນຮຸ່ງເຮືອງ ແລະມັ່ງຄັ່ງເຂັ້ມແຂງບົນເສັ້ນທາງສັງຄົມນິຍົມ.
ປະຫວັດສາດບອກໃຫ້ພວກເຮົາຮູ້ວ່າ, ຕະຫຼອດ 95 ປີຜ່ານມາ, ປະສົບການທີ່ຈີນຜ່ານຜ່າ ກໍຄືປະສົບການທີ່ປະຊາຊົນຈີນ ແລະປະຊາຊາດຈີນໄດ້ຜ່ານຜ່ານັ້ນ ແມ່ນພັກກອມມູນິດຈີນ ແລະປະຊາຊົນຈີນແລກມາໄດ້ດ້ວຍເລືອດເນື້ອເຫື່ອແຮງແລະນ້ຳຕາ, ແມ່ນເຕັມໄປດ້ວຍຄວາມທຸກທໍລະມານແລະຄວາມຮຸ່ງເຮືອງເຫຼືອງເຫຼື້ອມ, ຄວາມລະອິລະອ້ຽວແລະໄຊຊະນະ, ມີການອຸທິດແລະການໄດ້ຮັບ, ນີ້ແມ່ນປະສົບການທີ່ສະຫງ່າງາມໃນປະຫວັດສາດພັດທະນາຂອງປະຊາຊາດຈີນທີ່ບໍ່ສາມາດຫຼົງລືມແລະປະຕິເສດບໍ່ໄດ້, ແລະກໍແມ່ນພື້ນຖານທີ່ເຮັດໃຫ້ປະຊາຊົນຈີນ ກໍຄືປະຊາຊາດຈີນສືບຕໍ່ບຸກໜ້າບືນຕົວ.
ປະຫວັດສາດຍັງບອກໃຫ້ພວກກເຮົາຮູ້ວ່າ, ປະຫວັດສາດ ແລະປະຊາຊົນໄດ້ເລືອກເອົາພັກກອມມູນິດຈີນເປັນຜູ້ນຳພາພາລະກິດສ້າງປະຊາຊາດຈີນໃຫ້ຈະເລີນນັ້ນແມ່ນຖືກຕ້ອງ, ຕ້ອງຍຶດໝັ້ນເປັນເວລາຍາວນານ ແລະບໍ່ໃຫ້ຫວັ່ນໄຫວຄອນແຄນ; ພັກກອມມູນິດຈີນນຳພາປະຊາຊົນຈີນເດີນຕາມເສັ້ນທາງສັງຄົມນິຍົມທີ່ມີສີສັນພິເສດຂອງຈີນແມ່ນຖືກຕ້ອງ, ຕ້ອງຍຶດໝັ້ນເປັນເວລາຍາວນານ ແລະບໍ່ໃຫ້ຫວັ່ນໄຫວຄອນແຄນ; ພັກກອມມູນິດຈີນ ແລະປະຊາຊົນຈີນດຳລົງຄົງຕົວຢູ່ບົນແຜ່ນດິນຜືນນີ້, ຖອດຖອນເອົາໝາກຜົນທີ່ດີເດັ່ນແຫ່ງຄວາມສີວິໄລຂອງມວນມະນຸດ ແລະຕັ້ງຍຸດທະສາດພັດທະນາປະເທດຢ່າງເປັນເອກະລາດແລະເປັນເຈົ້າຕົນເອງນັ້ນແມ່ນຖືກຕ້ອງ, ຕ້ອງຍຶດໝັ້ນເປັນເວລາຍາວນານ ແລະບໍ່ໃຫ້ຫວັ່ນໄຫວຄອນແຄນ.
