---- ຍຶດໝັ້ນການບໍ່ລືມຈຸດປະສົງແຕ່ຫົວທີ,ສືບຕໍ່ກ້າວໄປທາງໜ້າ ກໍຕ້ອງເດີນຕາມເສັ້ນທາງພັດທະນາໂດຍສັນຕິແລະປະຕິບັດຍຸດທະສາດເປີດປະຕູສູ່ພາຍນອກແບບຕ່າງຝ່າຍຕ່າງມີຜົນປະໂຫຍດຢ່າງສະເໝີຕົ້ນສະເໝີປາຍ, ເພີ່ມທະວີການໄປມາຫາສູ່ກັນຢ່າງມີໄມຕີຈິດມິດຕະພາບກັບບັນດາປະເທດ, ຮ່ວມກັບປະຊາຊົນບັນດາປະເທດຊຸກຍູ້ພາລະ ກິດອັນສູງສົ່ງແຫ່ງສັນຕິພາບແລະການພັດທະນາຂອງມະນຸດໃຫ້ຂະຫຍາຍຕົວກ້າວໄປທາງໜ້າຢ່າງບໍ່ຢຸດຢັ້ງ.
ການທີ່ປະກອບສ່ວນອັນໃໝ່ເພື່ອມວນມະນຸດໃຫ້ຫຼາຍກວ່າເກົ່ານັ້ນເປັນຄຳໝັ້ນສັນ ຍາອັນໜັກແໜ້ນຂອງພັກກອມມູນິດຈີນແລະປະຊາຊົນຈີນທີ່ໄດ້ໃຫ້ໄວ້ມາແຕ່ດົນແລ້ວ. ພັກກອມມູນິດຈີນແລະປະຊາຊົນຈີນໄດ້ຜ່ານຜ່າຄວາມທຸກທໍລະມານຈາກສົງຄາມ,ດ້ວຍເຫດນີ້ຈິ່ງຮູ້ດີເຖິງຄວາມປະເສີດຂອງສັນຕິພາບ, ຄຸນຄ່າຂອງການພັດທະນາຈິ່ງຖືການສົ່ງເສີມສັນຕິພາບແລະການພັດທະນາຂອງໂລກເປັນພາລະໜ້າທີ່ອັນສູງສົ່ງຂອງຕົນ.
ມະນຸດໃນສູ່ມື້ນີ້ມີເງື່ອນໄຂດີກວ່າເວລາໃດໝົດເພື່ອພ້ອມກັນມຸ່ງໜ້າໄປສູ່ການບັນລຸເປົ້າໝາຍສັນຕິພາບແລະການພັດທະນາ. ຈີນມີຈຸດຢືນໃຫ້ປະຊາຊົນບັນດາປະເທດຮ່ວມແຮງຮ່ວມໃຈກັນ, ຫັນການກົດໜີບປ່ຽນມາເປັນກຳລັງແຮງຊຸກຍູ້, ຫັນວິກິດການໃຫ້ເປັນໂອກາດລອດຕົວ,ເອົາການຮ່ວມມືແທນການເປັນປໍລະປັກກັນ, ເອົາການທີ່ຕ່າງຝ່າຍຕ່າງໄດ້ຮັບຜົນປະໂຫຍດແທນການຍຶດຄອງແຕ່ຜູ້ດຽວ.ລະບຽບສາກົນແລະລະບົບຄຸ້ມຄອງໂລກແນວໃດຈິ່ງຈະດີຕໍ່ໂລກແລະດີຕໍ່ປະຊາຊົນບັນດາປະເທດໃນໂລກນັ້ນ, ຄວນໃຫ້ປະ ຊາຊົນບັນດາປະເທດປຶກສາຫາລືກັນ, ບໍ່ຄວນໃຫ້ຝ່າຍໃດໜຶ່ງເປັນຜູ້ຕັດສິນແລະບໍ່ຄວນໃຫ້ຄົນສ່ວນໜ້ອຍເປັນຜູ້ຕັດສິນ. ຈີນຈະຕັ້ງໜ້າເຂົ້າຮ່ວມການກໍ່ສ້າງລະບົບຄຸ້ມຄອງທົ່ວໂລກ,ພະຍາຍາມປະກອບສ່ວນສະຕິປັນຍາຂອງຕົນເພື່ອປັບປຸງການຄຸ້ມຄອງທົ່ວໂລກໃຫ້ດີຂຶ້ນທັງຮ່ວມກັບປະຊາຊົນບັນດາປະເທດໃນໂລກຊຸກຍູ້ໃຫ້ລະບຽບສາກົນແລະລະບົບຄຸ້ມຄອງທົ່ວໂລກໃຫ້ຂະຫຍາຍຕົວໄປຕາມທິດທາງທີ່ທ່ຽງທຳແລະສົມເຫດສົມຜົນກວ່າເກົ່າ.
ຈຸດປະສົງຂອງນະໂຍບາຍການຕ່າງປະເທດຂອງຈີນຄືເພື່ອປົກປັກຮັກສາສັນຕິພາບຂອງໂລກແລະສົ່ງເສີມການພັດທະນາຮ່ວມກັນ. ຈີນເປັນຜູ້ກໍ່ສ້າງສັນຕິພາບຂອງໂລກ, ເປັນຜູ້ປະກອບສ່ວນເພື່ອການພັດທະນາຂອງທົ່ວໂລກ, ເປັນຜູ້ປົກປັກຮັກສາລະບຽບສາກົນຢ່າງສະເໝີຕົ້ນສະເໝີປາຍ, ຈີນຍິນດີເປີດກວ້າງຈຸດຮ່ວມຜົນປະໂຫຍດກັບບັນດາປະເທດ,ຊຸກຍູ້ການສ້າງສາຍພົວພັນສາກົນແບບໃໝ່ໂດຍຖືການຮ່ວມມືແບບຕ່າງຝ່າຍຕ່າງມີຜົນປະໂຫຍດເປັນໃຈກາງ, ຊຸກຍູ້ປະຊາຄົມຮ່ວມຊາຕາກຳແລະປະຊາຄົມຜົນປະໂຫຍດຂອງມະນຸດໃຫ້ເກີດຂຶ້ນ.
ຈີນຍຶດໝັ້ນນະໂຍບາຍການຕ່າງປະເທດສັນຕິພາບທີ່ເປັນເອກະລາດແລະເປັນເຈົ້າຕົນເອງ, ເສີມຂະຫຍາຍມິດຕະພາບແລະການຮ່ວມມືກັບທຸກປະເທດບົນພື້ນຖານຫຼັກ 5 ປະການຢູ່ຮ່ວມກັນໂດຍສັນຕິ.ຈີນເດັດດ່ຽວປະຕິບັດນະໂຍບາຍພື້ນຖານແຫ່ງຊາດໃນການເປີດປະຕູສູ່ພາຍນອກຢ່າງໝັ້ນໜຽວບໍ່ປ່ຽນແປງ, ຍຶດໝັ້ນເປີດປະຕູເພື່ອດຳເນີນການກໍ່ສ້າງ, ປະດິດສ້າງສະພາບການເປີດປະຕູສູ່ພາຍນອກທີ່ຮອບດ້ານ,ລົງສູ່ລວງເລິກແລະມີຮູບແບບຫຼາຍກວ່າເກົ່າໃນຂະນະດຳເນີນໂຄງການຮ່ວມມືສາກົນສຳຄັນຕ່າງໆເຊັ່ນ "ໜຶ່ງແລວທາງໜຶ່ງເສັ້ນທາງ".
ປະຊາຊົນຈີນຮູ້ດີແລ້ວວ່າການພັດທະນາປະເທດຈີນໄດ້ຮັບຜົນປະໂຫຍດຈາກປະ ຊາຄົມໂລກ, ຈີນຍິນດີຖືຜົນສຳເລັດໃນການພັດທະນາຂອງຕົນປະກອບສ່ວນເຂົ້າໃນການພັດທະນາຂອງໂລກ. ຈີນປະຕິບັດນະໂຍບາຍເປີດປະຕູສູ່ພາຍນອກບໍ່ແມ່ນຫວັງຈະເຮັດພຽງຜູ້ດຽວ, ຫາກແຕ່ຍິນດີຕ້ອນຮັບບັນດາຝ່າຍມີສ່ວນຮ່ວມນຳກັນ;ບໍ່ແມ່ນຢາກສະແຫວງ ຫາຂອບເຂດອິດທິພົນ, ຫາກແມ່ນຢາກສະໜັບສະໜູນໃຫ້ບັນດາປະເທດພັດທະນາຮ່ວມກັນ; ບໍ່ແມ່ນຢາກສ້າງ "ເດີ່ນເຮືອນ"ຂອງຕົນ, ຫາກເພື່ອສ້າງສວນດອກໄມ້ນາໆພັນເພື່ອໃຫ້ບັນດາປະເທດຮ່ວມກັນຊົມໃຊ້.
ຈີນສົ່ງເສີມຈິດໃຈກ່ຽວກັບປະຊາຄົມຮ່ວມຊາຕາກຳຂອງມະນຸດ, ຄັດຄ້ານແນວຄິດສົງຄາມເຢັນແລະການແຂ່ງຂັນແບບ "ເຈົ້າໄດ້ຂ້ອຍເສຍ"ຢ່າງເດັດດ່ຽວ. ຈີນຍຶດໝັ້ນວ່າ ທຸກປະເທດບໍ່ວ່ານ້ອຍໃຫຍ່, ເຂັ້ມແຂງຫຼືອ່ອນແອ,ທຸກຍາກຫຼືຮັ່ງມີ ລ້ວນແຕ່ສະເໝີພາບກັນ, ຈີນເຄົາລົບປະຊາຊົນບັນດາປະເທດມີສິດເປັນເຈົ້າຕົນເອງໃນການເລືອກເສັ້ນທາງການພັດທະນາ, ປົກປັກຮັກສາຄວາມທ່ຽງທຳຍຸຕິທຳສາກົນ, ຄັດຄ້ານການຖືແນວຄິດຈິດໃຈຂອງຕົນບັງຄັບໃຫ້ຜູ້ອື່ນຮັບ, ຄັດຄ້ານການແຊກແຊງເຂົ້າໃນວຽກງານພາຍໃນຂອງປະເທດອື່ນ, ຄັດຄ້ານການຂົ່ມເຫັງປະເທດດ້ອຍພັດທະນາດ້ວຍຄວາມເຂັ້ມແຂງຂອງຕົນ. ຈີນບໍ່ຫວັງຍຶດຜົນປະໂຫຍດຂອງປະເທດອື່ນ, ບໍ່ອິດສາການພັດທະນາຂອງປະເທດອື່ນ, ແຕ່ກໍເດັດຂາດບໍ່ປ່ອຍປະສິດຜົນປະໂຫຍດອັນຊອບທຳຂອງຕົນ. ປະຊາຊົນຈີນບໍ່ເຊື່ອໃນກຳລັງຊົ່ວຮ້າຍແລະກໍບໍ່ຢ້ານສິ່ງຂົ່ມຂູ່, ບໍ່ເປັນເຈົ້າການທ້າທາຍເກາະຜິດແຕ່ກໍບໍ່ຢ້ານກົວຕໍ່ສິ່ງທີ່ບໍ່ດີໃດໆທີ່ຈະເກີດຂຶ້ນ, ຕ່າງປະເທດບໍ່ວ່າປະເທດໃດກໍຕາມຢ່າຄິດວ່າຈີນຈະເອົາຜົນປະໂຫຍດໃຈກາງຂອງຕົນໄປແລກປ່ຽນ, ຢ່າຫວັງວ່າຈີນຈະຍອມຮັບເອົາຜົນຮ້າຍຍ້ອນການສ້າງຜົນເສຍຫາຍໃຫ້ແກ່ອຳນາດອະທິປະໄຕ,ຄວາມໝັ້ນຄົງແລະຜົນປະໂຫຍດໃນການພັດທະນາຂອງປະເທດຕົນ.
ພັກກອມມູນິດຈີນຈະເສີມຂະຫຍາຍການແລກປ່ຽນແລະຮ່ວມມືກັບພັກການເມືອງແລະອົງການຈັດຕັ້ງການເມືອງຂອງບັນດາປະເທດແລະເຂດແຄວ້ນເພື່ອຊຸກຍູ້ການພັດ ທະນາຂອງການພົວພັນລະຫວ່າງຊາດຢູ່ບົນພື້ນຖານຫຼັກການທີ່ "ເອກະລາດ,ເປັນເຈົ້າຕົນເອງ,ສະເໝີພາບຢ່າງສົມບູນ, ເຄົາລົບເຊິ່ງກັນແລະກັນ, ບໍ່ແຊກແຊງເຂົ້າໃນວຽກງານພາຍໃນຂອງກັນ."
