----ຍຶດໝັ້ນການບໍ່ລືມຈຸດປະສົງແຕ່ຫົວທີ, ສືບຕໍ່ກ້າວໄປທາງໜ້າ, ກໍຕ້ອງຈື່ຈຳ ໄວ້ວ່ານັບແຕ່ພັກເຮົາສ້າງຕັ້ງຂຶ້ນກໍຖືການສູ້ຮົບ ເພື່ອລັດທິກອມມູນິດ ແລະ ລັດທິສັງຄົມນິຍົມເປັນໂຄງການຂອງຕົນ, ຍຶດໝັ້ນອຸດົມຄະຕິລັດທິກອມມູນິດອັນສູງສົ່ງ ແລະອຸດົມຄະຕິຮ່ວມລັດທິສັງຄົມນິຍົມທີ່ມີສີສັນພິເສດຂອງຈີນ, ຊຸກຍູ້ພຶດຕິກຳອັນຍິ່ງໃຫຍ່ທີ່ສູ້ຮົບເພື່ອອຸດົມຄະຕິອັນສູງສົ່ງນັ້ນກ້າວໄປໜ້າຢ່າງບໍ່ຢຸດຢັ້ງ.
ອຸດົມຄະຕິແຫ່ງການປະຕິວັດສູງກວ່າຟ້າ. ພັກກອມມູນິດຈີນຕັ້ງຊື່ວ່າພັກກອມມູນິດກໍ່ຍ້ອນວ່າ: ນັບແຕ່ມື້ພັກສ້າງຕັ້ງຂຶ້ນ ກໍຖືລັດທິກອມມູນິດເປັນອຸດົມຄະຕິຍາວໄກ. ພັກເຮົາສາມາດກໍ່ຮ່າງສ້າງຕົວຂຶ້ນເລື້ອຍໆຫຼັງຈາກໄດ້ປະສົບກັບ ຄວາມເສຍໄຊຫຼາຍໆເທື່ອ ເຊິ່ງສາເຫດພື້ນຖານກໍແມ່ນຍ້ອນວ່າພັກເຮົາມີອຸດົມຄະຕິຍາວໄກ ແລະ ຄວາມໝຸ່ງຫວັງອັນສູງສົ່ງ;
"ບໍ່ຕັ້ງຄວາມມຸ່ງມາດປາຖະໜາ ເຮັດເລື່ອງໃດກໍເອົາໄຊບໍ່ໄດ້." ຄວາມຄອນແຄນດ້ານອຸດົມຄະຕິ ແລະຄວາມເຊື່ອຖືແມ່ນຄວາມສັ້ນຄອນທີ່ອັນຕະລາຍທີ່ສຸດ, ການຊຸດໂຊມລົງດ້ານອຸດົມຄະຕິ ແລະ ຄວາມເຊື່ອຖືແມ່ນການຊຸດໂຊມລົງທີ່ອັນຕະລາຍທີ່ສຸດ. ການຊຸດໂຊມລົງຂອງພັກການເມືອງໃດໜຶ່ງຕາມທຳມະດາແລ້ວກໍເລີ່ມແຕ່ການເສຍ ຫຼື ການຂາດອຸດົມຄະຕິແລະຄວາມເຊື່ອຖື. ພັກຂອງເຮົາມີຄວາມເຂັ້ມແຂງຫຼືບໍ່, ບໍ່ພຽງແຕ່ຕ້ອງ ເບິ່ງວ່າທົ່ວພັກມີຄວາມໜຽວແໜ້ນໃນດ້ານອຸດົມຄະຕິ ແລະຄວາມເຊື່ອ ຖືຫຼືບໍ່, ຍິ່ງຕ້ອງເບິ່ງວ່າສະມາຊິກພັກທຸກຄົນມີຄວາມໜຽວແໜ້ນໃນດ້ານອຸດົມຄະຕິ ແລະຄວາມ ເຊື່ອຖືຫຼືບໍ່. ຕະຫຼອດ 95 ປີມານີ້, ອຸດົມຄະຕິທີ່ສູງສົ່ງຂອງລັດທິກອມມູນິດໄດ້ກະຕຸກຊຸກຍູ້ສະມາຊິກພັກກອມມູນິດຫຼາຍໆຮຸ່ນສູ້ຮົບຢ່າງຫ້າວຫັນ, ສະຫາຍຈຳນວນຫຼວງຫຼາຍເສຍຊີວິດເພື່ອອຸດົມຄະຕິນີ້. "ບໍ່ຢ້ານຖືກຕັດຫົວ, ຂໍພຽງແຕ່ລັດທິເຮົາເປັນຈິງ", "ສັດຕູພຽງ ແຕ່ຕັດຫົວເຮົາໄປໄດ້, ແຕ່ບໍ່ສາມາດເຮັດໃຫ້ຄວາມເຊື່ອຖືຂອງເຮົາຫວັ່ນໄຫວຄອນແຄນ". ຄຳປະຕິຍານທີ່ອົງອາດກ້າຫານ ແລະ ສະຫງ່າຜ່າເຜີຍຕໍ່ຄວາມເປັນທຳເຫຼົ່ານີ້ໄດ້ສະແດງເຖິງຄວາມບໍລິສຸດຜຸດຜ່ອງຂອງສະມາຊິກພັກກອມມູນິດຕໍ່ອຸດົມຄະຕິທີ່ສູງສົ່ງ. ແສງສະຫວ່າງແຫ່ງອຸດົມຄະຕິບໍ່ດັບມອບ, ແສງແຫ່ງຄວາມເຊື່ອໝັ້ນບໍ່ດັບສູນ. ພວກເຮົາຕ້ອງຈື່ຈຳຄວາມປາຖະໜາຂອງບັນດາສະຫາຍ ທີ່ໄດ້ເສຍຊີວິດ, ບໍ່ລືມອຸດົມຄະຕິອັນຍິ່ງໃຫຍ່ທີ່ພວກສະຫາຍເສຍຊີວິດເພື່ອບັນລຸເປົ້າໝາຍນັ້ນຕະຫຼອດໄປ.
ເປັນຫຍັງຈິ່ງເອີ້ນວ່າ ອຸດົມຄະຕິກໍຍ້ອນວ່າມັນເປັນເປົ້າໝາຍຍາວໄກ, ເປັນຫຍັງຈິ່ງເອີ້ນວ່າຄວາມເຊື່ອໝັ້ນກໍຍ້ອນວ່າຍັງມີແນວຄິດຈົງຮັກພັກດີ. ພວກເຮົາຕ້ອງຖືເອົາການເຊື່ອມຊຶມດ້ານອຸດົມຄະຕິ ແລະການເຊື່ອໝັ້ນເປັນໜ້າທີ່ຍຸດທະສາດໃນການສ້າງສັນແນວຄິດ, ຮັກສາຄວາມຍຶດໝັ້ນທາງການເມືອງໃນການສະແຫວງຫາອຸດົມການຂອງທົ່ວພັກ, ເປັນເຈົ້າສ້າງຕົນເອງໃຫ້ກາຍເປັນຜູ້ເຊື່ອໝັ້ນທີ່ໜັກແໜ້ນ ແລະເປັນຜູ້ປະ ຕິບັດທີ່ຊື່ສັດຕໍ່ອຸດົມ ຄະຕິທີ່ສູງສົ່ງຂອງລັດທິກອມມູນິດແລະອຸດົມຄະຕິຮ່ວມດ້ານສັງຄົມ ນິຍົມທີ່ມີສີສັນພິເສດຂອງຈີນ. ເສີມຂະຫຍາຍບົດບາດຄວາມເປັນແບບຢ່າງຢ່າງເຕັມທີ່ໃນຂະບວນການສ້າງສັງຄົມອີ່ມໜຳສຳລານຢ່າງຮອບດ້ານ ແລະ ບັນລຸຄວາມມຸ່ງຫວັງຂອງຈີນທີ່ຟື້ນຟູຄວາມຈະເລີນອັນຍິ່ງໃຫຍ່ຂອງປະຊາຊາດຈີນ.
ພວກເຮົາມີຄວາມໂປ່ງໃສໃນດ້ານທິດສະດີ ຈິ່ງສາມາດມີຄວາມເດັດດ່ຽວ ໜຽວແໜ້ນໃນດ້ານການເມືອງໄດ້. ອຸດົມຄະຕິ ແລະ ການເຊື່ອໝັ້ນທີ່ໝັ້ນແກ່ນຕ້ອງສ້າງຂຶ້ນບົນພື້ນຖານຄວາມເຂົ້າໃຈລັດທິມາກຢ່າງເລິກເຊິ່ງ, ສ້າງຂຶ້ນບົນພື້ນຖານທີ່ກຳກັບກົດເກນປະຫວັດສາດຢ່າງເລິກເຊິ່ງ. ທົ່ວພັກຕ້ອງຮ່ຳຮຽນລັດທິມາກເລນີນ, ແນວຄິດເໝົາເຈີຕົ່ງ, ທິດສະດີເຕີ້ງສຽງພີງ, ແນວຄິດສຳຄັນ "3 ຕົວແທນ" ແລະ ທັດສະນະ ກ່ຽວກັບການ ພັດທະນາຕາມຫຼັກວິທະຍາສາດຢ່າງເລິກເຊິ່ງ, ລົງເລລິກຮຽນທິດສະດີໃໝ່, ແນວຄິດໃໝ່ ແລະຍຸດທະສາດໃໝ່ຂອງສູນກາງພັກໃນການປົກຄອງປະເທດນັບແຕ່ໄຂກອງປະຊຸມໃຫຍ່ຄັ້ງທີ 18 ຂອງພັກກອມມູນິດຈີນ ເປັນຕົ້ນມາ, ຍົກລະດັບຄວາມຮັບຮູ້ແລະລະດັບທິດສະດີດ້ານລັດທິມາກໃຫ້ສູງຂຶ້ນຢ່າງບໍ່ຢຸດຢັ້ງ ແລະຮັກສາຄວາມເຂົ້າໃຈທີ່ດີ ແລະຄວາມສະແຫວງຫາອັນເດັດດ່ຽວຕໍ່ອຸດົມຄະຕິທີ່ສູງສົ່ງແລະເປົ້າໝາຍສູ້ຮົບ.
ພວກເຮົາຕ້ອງສຶກສາແລະຊີ້ນຳສະມາຊິກພັກ ແລະພະນັກງານຂອງ ພັກໃຫ້ຫັນຜົນງານການຮຽນເປັນການບຳລຸງແນວຄິດຈິດໃຈ,ເຝິກຝົນຄຸນສົມບັດສິນທຳ ປະຕິວັດ ພ້ອມທັງຍົກລະດັບແນວຄິດ ແລະລະດັບຈັນຍາບັນ, ເຮັດເຖິງຂັ້ນທີ່ຮຽນ ຢ່າງແທ້ຈິງ, ເຂົ້າໃຈຢ່າງແທ້ຈິງ, ເຊື່ອໝັ້ນຢ່າງແທ້ຈິງ ແລະນຳໃຊ້ຢ່າງແທຈິງ, ຢູ່ຕໍ່ໜ້າໄຊຊະນະ ແລະສະພາບການດີຈະບໍ່ອວຍອົ່ງ ແລະບໍ່ໃຈຮ້ອນ, ໃນເວລາປະສົບກັບ ຄວາມຫຍຸ້ງຍາກ ແລະຢູ່ໃນສະພາບການທີ່ບໍ່ດີ ກໍບໍ່ທໍ້ຖອຍໃຈ ແລະບໍ່ຄອນແຄນ, ຍ້ດໝັ້ນຢືນຢູ່ເທິງຍອດສູງແຫ່ງຄວາມເປັນທຳ ເພື່ອຊຸກຍູ້ສັງຄົມມະນຸດກ້າວໄປໜ້າ ແລະບັນລຸຄວາມປາຖະໜາທີ່ດີງາມຂອງມະນຸດ.
