ບັນດາສະຫາຍ ແລະເພື່ອນມິດ!
ຊາວໜຸ່ມເປັນອະນາຄົດຂອງປະເທດຊາດ, ເປັນຄວາມຫວັງຂອງຊົນຊາດແລະກໍເປັນອະນາຄົດແລະຄວາມຫວັງຂອງພັກຄອມມູນິດຈີນພວກເຮົາ.ສະຫາຍລີຕ້າຈ່າວ ໜຶ່ງໃນບັນດາຜູ້ສ້າງຕັ້ງພັກກອມມູນິດຈີນເຄີຍກ່າວວ່າ, ຊາວໜຸ່ມຄວນ"ຊຸກຍູ້ຄວາມສິວິໄລຂອງໂລກ, ສ້າງຄວາມຜາສຸກໃຫ້ແກ່ມວນມະນຸດ,ໃຊ້ຄວາມເປັນໄວໜຸ່ມຂອງພວກເຮົາ, ສ້າງຄອບຄົວແຫ່ງຄວາມເປັນໄວໜຸ່ມ, ປະເທດແຫ່ງຄວາມເປັນໄວໜຸ່ມ, ຊົນຊາດແຫ່ງຄວາມເປັນໄວໜຸ່່ມ,ມວນມະນຸດແຫ່ງຄວາມເປັນໄວໜຸ່່ມ,ໜ່ວຍໂລກແຫ່ງຄວາມເປັນໄວໜຸ່່ມ,ຈັກກະວານແຫ່ງຄວາມເປັນໄວໜຸ່່ມ ເພື່ອສ້າງຄວາມມ່ວນຊື່ນໃຫ້ແກ່ຊີວິດທີ່ບໍ່ມີການຈຳກັດ." ຕະຫຼອດ 95 ປີຜ່ານມາ, ຜົນງານທັງໝົດທີ່ພັກພວກເຮົາຍາດມາໄດ້ນັ້ນລ້ວນແຕ່ໄດ້ເຕົ້າໂຮມຄວາມກະຕືລືລົ້ນແລະການປະກອບສ່ວນຂອງຊາວໜຸ່ມ. ທົ່ວພັກຄວນເອົາໃຈໃສ່, ສົນໃຈແລະຮັກແພງຊາວໜຸ່ມ, ຕັ້ງໃຈຟັງຄວາມໃນໃຈຂອງຊາວໜຸ່ມ,ເປັນຜູ້ຮູ້ໃຈເພື່ອນມິດຊາວໜຸ່ມ, ຜູ້ເອົາໃຈໃສ່ວຽກງານຊາວໜຸ່ມ,ແລະເປັນຜູ້ນຳທາງຂອງຊາວໜຸ່ມ.
ຊາວໜຸ່ມທີ່ມີຢ່າງມະຫາສານໃນທົ່ວປະເທດຕ້ອງຮັບຮູ້ປະຫວັດສາດອັນຊົງກຽດແລະຂະບວນການອັນຍິ່ງໃຫຍ່ຂອງປະຊາຊົນຈີນແລະປະຊາຊາດຈີນແຕ່ຊຸມປີ1840ເປັນຕົ້ນມາ, ກ້າວໄປຕາມທິດຊີ້ນຳຂອງພັກກອມມູນິດຈີນຢ່າງບໍ່ຫວັ່ນໄຫວຄອນແຄນ, ມີຄວາມກ້າຫານໃນການເປັນຜູ້ບຸກລະລຸ, ຜູ້ບຸກເບີກແລະຜູ້ອຸທິດຢູ່ແຖວໜ້າຂອງຍຸກສະໄໝ ເຮັດໃຫ້ຄວາມເປັນໄວໜຸ່ມເປັ່ງລັດສະໝີອັນສົດໃສໃນການປະກອບສ່ວນເຂົ້າໃນການພັດທະນາປະເທດຊາດ, ປະຊາຊົນແລະຊົນຊາດ.
ບັນດາສະຫາຍແລະເພື່ອນມິດ!
ເມື່ອ 95 ປີກ່ອນ, ປະຊາຊົນຈີນມີຄວາມປາຖະໜາຢ່າງແຮງກ້າໃນການຍາດແຍ່ງຄວາມເປັນເອກະລາດຂອງຊາດ, ປົດປ່ອຍປະຊາຊົນ, ບັນລຸຄວາມຮັ່ງມີເຂັ້ມແຂງຂອງປະເທດ ແລະຄວາມຜາສຸກຂອງປະຊາຊົນ,ແຕ່ຜະເຊີນກັບຄວາມຫຍຸ້ງຍາກອັນໃຫຍ່ຫຼວງ. ມື້ນີ້,ພວກເຮົາໄດ້ຫຍັບເຂົ້າໃກ້ເປົ້າໝາຍທີ່ຟື້ນຟູຄວາມຈະເລີນອັນຍິ່ງໃຫຍ່ຂອງປະຊາຊາດຈີນ ເຊິ່ງໃກ້ກວ່າທຸກໄລຍະທີ່ຜ່ານມາໃນປະຫວັດສາດ, ພວກເຮົາກໍມີຄວາມໝັ້ນໃຈແລະຄວາມສາມາດໃນການບັນລຸເປົ້າໝາຍດັ່ງກ່າວ ເຊິ່ງຫຼາຍກວ່າທຸກໄລຍະໃນປະຫວັດສາດ. ພວກເຮົາສາມາດເວົ້າໄດ້ວ່າ,ຄວາມຝັນຂອງຈີນທີ່ຟື້ນຟູຄວາມຈະເລີນອັນຍິ່ງໃຫຍ່ຂອງປະຊາຊາດຈີນຕ້ອງບັນລຸຜົນເປັນຈິງ ແລະກໍສາມາດບັນລຸຜົນເປັນຈິງໄດ້ຢ່າງແນ່ນອນ.
ຕອນເຊົ້າວັນທີ23ມີນາປີ1949,ສູນກາງພັກໄດ້ເດີນທາງຈາກຊີ່ໄບໂພ່ໄປສູ່ປັກກິ່ງ,ສະຫາຍເໝົາເຈີຕຸງ ກ່າວວ່າ, "ມື້ນີ້ເປັນວັນທີ່ໄປສອບເສັງຢູ່ປັກກິ່ງ." ພຶດຕິກຳ 60 ກວ່າປີຜ່ານມາຢືນຢັນວ່າ,ພັກພວກເຮົາໄດ້ຮັບຄະແນນທີ່ດີເດັ່ນໃນການສອບເສັງຄັ້ງປະຫວັດສາດເທື່ອນີ້. ພ້ອມກັນນັ້ນ, ການສອບເສັງເທື່ອນີ້ຍັງບໍ່ທັນສໍາເລັດ, ແລະກຳລັງດຳເນີນຢູ່. ມື້ນີ້,ພັກພວກເຮົານຳພາປະຊາຊົນເຮັດວຽກທຸກຢ່າງ, ແລະກໍເປັນການສືບຕໍ່ຂອງການສອບເສັງດັ່ງກ່າວ.
"ເສັ້ນທາງຍາວໄກ, ເຮົາຈະພະຍາຍາມສະແຫວງຫາສັດຈະທຳ." ສະຫາຍທົ່ວພັກຕ້ອງບໍ່ລືມຈຸດປະສົງແຕ່ຫົວທີ, ສືບຕໍ່ກ້າວໄປທາງໜ້າ, ຮັກສາແບບແຜນທີ່ຖ່ອມຕົວ, ສຸຂຸມຮອບຄອບ, ບໍ່ອວດອົ່ງ ແລະໃຈເຢັນຕະຫຼອດໄປ, ຮັກສາແບບແຜນທີ່ບຸກບືນສູ້ຊົນດ້ວຍຄວາມທໍລະຫົດອົດທົນຕະຫຼອດໄປ,ມີຄວາມກ້າຫານໃນການປ່ຽນແປງໃໝ່ແລະປະດິດສ້າງໃໝ່, ບໍ່ຕາຍໂຕແລະບໍ່ຢຸດສະງັກຈັກເທື່ອ, ສືບຕໍ່ທົນທານຕໍ່ການທົດສອບໃນການສອບເສັງຄັ້ງປະຫວັດສາດຮອບນີ້,ພະຍາຍາມເສັງໄດ້ຄະແນນທີ່ດີກວ່າເກົ່າໃຫ້ແກ່ປະຫວັດສາດແລະປະຊາຊົນ!
