ກົດລະບຽບຂອງພັກກອມມູນິດຈີນ
(GMT+08:00) 2012-11-16 16:56:32 cri
ນັບແຕ່ກອງປະຊຸມຄົບຄະນະຄັ້ງທີ 4 ຂອງຄະນະກຳມະການສູນກາງພັກກອມມູນິດຈີນສະໄໝທີ 13 ເປັນຕົ້ນມາ, ໃນພຶດຕິກຳແຫ່ງການສ້າງສາສັງຄົມນິຍົມທີ່ມີສີສັນພິເສດຂອງຈີນ, ຊາວກອມມູນິດຈີນເຊິ່ງແມ່ນສະຫາຍຈຽງເຈີໝິນ ເປັນຕົວແທນທີ່ສຳຄັນ ໄດ້ລົງເລິກຮັບຮູ້ຕໍ່ອັນທີ່ວ່າສັງຄົມນິຍົມແມ່ນຫຍັງ, ການສ້າງສາສັງຄົມນິຍົມຕ້ອງເຮັດແນວໃດ, ກໍ່ສ້າງພັກເປັນຄືແນວໃດ ແລະ ເຮັດແນວໃດໃນການກໍ່ສ້າງພັກ, ໄດ້ສະສົມບົດຮຽນລ້ຳຄ່າອັນໃໝ່ໃນການກໍ່ສ້າງພັກແລະການປົກຄອງປະເທດ, ແລະກໍ່ຕົວເປັນແນວຄິດ"ສາມຕົວແທນ"ທີ່ສຳຄັນ. ແນວຄິດ"ສາມຕົວແທນ"ທີ່ສຳຄັນແມ່ນເປັນການສືບທອດແລະພັດທະນາລັດທິມາກ-ເລນິນ, ແນວຄິດເໝົາເຈີຕົງ ແລະ ທິດສະດີເຕິງສຽວຜິງ, ໄດ້ສ່ອງແສງໃຫ້ເຫັນເຖິງຄວາມຮຽກຮ້ອງຕ້ອງການໃໝ່ທີ່ມີຕໍ່ວຽກງານຂອງພັກແລະລັດ ໃນການພັດທະນາປ່ຽນແປງຂອງໂລກແລະຈີນໃນຍຸກປັດຈຸບັນ, ແມ່ນອາວຸດທິດສະດີທີ່ເຂັ້ມແຂງໃນການເພີ່ມທະວີແລະປັບປຸງການກໍ່ສ້າງພັກ ແລະຊຸກຍູ້ໃຫ້ສັງຄົມນິຍົມຂອງຈີນໄດ້ປັບປຸງຕົນເອງໃຫ້ສົມບູນແລະໄດ້ຮັບການພັດ ທະນາ, ແມ່ນຜົນງານອັນລ້ຳເລີດຂອງສະຕິປັນຍາລວມໝູ່ຂອງພັກກອມມູນິດຈີນ, ແມ່ນແນວຄິດຊີ້ນຳທີ່ພັກຕ້ອງຍຶດໝັ້ນໃນໄລຍະຍາວນານ. ການປະຕິບັດຕາມແນວຄິດ "ສາມຕົວແທນ" ຢ່າງສະເໝີຕົ້ນສະເໝີປາຍ, ແມ່ນພື້ນຖານຂອງການຕັ້ງພັກ, ພື້ນຖານຂອງການກຳອຳນາດ ແລະເປັນເຫງົ້າພະລັງ ສຳລັບພັກກອມມູນິດຈີນ.
ນັບແຕ່ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 16 ຂອງພັກກອມມູນິດຈີນເປັນຕົ້ນມາ, ຊາວກອມມູນິດຈີນເຊິ່ງແມ່ນທ່ານຮູຈິນທາວເປັນຕົວແທນທີ່ສຳຄັນໄດ້ຍຶດໝັ້ນແລະຖືເອົາທິດສະດີເຕິງສຽວຜິງ ແລະແນວຄິດ "ສາມຕົວແທນ" ທີ່ສຳຄັນເປັນການຊີ້ນຳ, ອີງຕາມຄວາມຮຽກຮ້ອງຕ້ອງການໃໝ່ຂອງການພັດທະນາ, ໄດ້ຮັບຮູ້ຢ່າງເລິກເຊິ່ງແລະໃຫ້ຄຳຕອບຕໍ່ບັນຫາສຳຄັນຕ່າງໆ, ເປັນຕົ້ນແມ່ນຈະບັນລຸການພັດທະນາແບບໃດ, ຈະພັດທະນາເປັນແນວໃດ ແລະອື່ນໆ, ແລະກາຍເປັນທັດສະນະພັດທະນາແບບວິທະຍາສາດເຊິ່ງຖືຄົນເປັນກົກ ແລະ ການພັດທະນາແບບຍືນຍົງທີ່ປະສານກົມກຽວກັນ ຢ່າງຮອບດ້ານ. ທັດສະນະພັດທະນາແບບວິທະຍາສາດແມ່ນທິດສະດີວິທະຍາສາດທີ່ຖ່າຍທອດມາຈາກລັດທິມາກ-ເລນິນ, ແນວຄິດເໝົາເຈີຕົງ, ທິດສະດີເຕິງສຽວຜິງ, ແນວຄິດສຳຄັນ "ສາມຕົວແທນ" ທີ່ກ້າວເດີນໄປຕາມຍຸກສະໄໝ, ໄດ້ລວມສູນສະແດງເຖິິງໂລກກະທັດແລະທິດສະດີວ່າດ້ວຍວິທີທີ່ມີການພັດທະນາຂອງລັດທິມາກ-ເລນິນ, ແມ່ນໝາກຜົນຫຼ້າສຸດຂອງລັດທິມາກ-ເລນິນຫັນເປັນແບບຈີນ, ແມ່ນຜົນງານອັນລ້ຳເລີດຂອງສະຕິປັນຍາລວມໝູ່ຂອງພັກກອມມູນິດຈີນ, ແມ່ນແນວຄິດຊີ້ນຳທີ່ສຳຄັນທີ່ຕ້ອງຍຶດໝັ້ນແລະຜັນຂະຫຍາຍໃນການພັດທະນາສັງຄົມນິຍົມທີ່ມີສີສັນພິເສດຂອງຈີນ.
ນັບແຕ່ໄດ້ດຳເນີນການປະຕິຮູບແລະໄຂປະຕູສູ່ພາຍນອກເປັນຕົ້ນມາ, ພວກເຮົາສາມາດຍາດໄດ້ຜົນງານຢ່າງຫຼວງຫຼາຍແລະມີຄວາມກ້າວໜ້າ, ສາເຫດຕົ້ນຕໍທີ່ຍາດໄດ້ຜົນງານອັນໃຫຍ່ຫຼວງນັ້ນ ແມ່ນ: ໄດ້ເປີດທາງສັງຄົມນິຍົມທີ່ມີສີສັນພິເສດຂອງຈີນ, ໄດ້ກໍ່ຕົວເປັນລະບົບທິດສະດີສັງຄົມນິຍົມທີ່ມີສີສັນພິເສດຂອງຈີນ, ໄດ້ຕົກລົງລະບອບສັງຄົມນິຍົມທີ່ມີສີສັນພິເສດຂອງຈີນ. ທຸກສະຫາຍພາຍໃນພັກຕ້ອງຖະໜຸຖະໜອມ ທັງຍຶດໝັ້ນແລະພັດທະນາເສັ້ນທາງທີ່ພັກໄດ້ສ້າງຂຶ້ນໂດຍໄດ້ປະສົບກັບຄວາມ ທຸກຍາກລຳບາກ ແລະ ຍຶດໝັ້ນແລະພັດທະນາລະບົບທິດສະດີຂອງພັກແລະລະບອບສັງຄົມນິຍົມທີ່ມີສີສັນພິເສດຂອງຈີນ ຢ່າງບໍ່ຢຸດຢັ້ງ, ຍົກສູງຄັນທຸງທີ່ຍິ່ງໃຫຍ່ແຫ່ງສັງຄົມນິຍົມທີ່ມີສີສັນພິເສດຂອງຈີນ, ບຸກບືນສູ້ຊົນເພື່ອບັນລຸສາມໜ້າທີ່ປະຫວັດສາດທີ່ສຳຄັນ ຄື: ຊຸກຍູ້ການສ້າງສາທັນສະໄໝ, ສຳເລັດ ການເຕົ້າໂຮມປະເທດຊາດເຂົ້າເປັນເອກະພາບກັນ, ປົກປັກຮັກສາສັນຕິພາບຂອງໂລກແລະຊຸກຍູ້ການພັດທະນາຮ່ວມກັນ.
