ກົດລະບຽບຂອງພັກກອມມູນິດຈີນ
(GMT+08:00) 2012-11-16 16:56:32 cri
ພັກກອມມູນິດຈີນຍຶດໝັ້ນນະໂຍບາຍການຕ່າງປະເທດສັນຕິພາບທີ່ຕັ້ງຕົວເປັນເອກະລາດແລະເປັນເຈົ້າຕົນເອງ, ຍຶດໝັ້ນເດີນໄປຕາມເສັ້ນທາງການພັດທະນາໂດຍສັນຕິ, ຍຶດໝັ້ນຍຸດທະສາດການໄຂປະຕູສູ່ພາຍນອກແບບຕ່າງຝ່າຍຕ່າງມີຜົນປະໂຫຍດ, ວາງແຜນສະພາບລວມທັງພາຍໃນປະເທດແລະສາກົນຢ່າງເປັນເອກະພາບ, ຕັ້ງໜ້າຂະຫຍາຍການພົວພັນກັບຕ່າງປະເທດ, ພະຍາຍາມສ້າງສະພາບແວດລ້ອມສາກົນທີ່ມີຜົນດີຕໍ່ການປະຕິຮູບໄຂປະຕູສູ່ພາຍນອກແລະການສ້າງສາທັນສະໄໝຂອງປະເທດ. ໃນວຽກງານສາກົນ, ປົກປັກຮັກສາຄວາມເປັນເອກະລາດແລະອະທິປະໄຕຂອງປະເທດຊາດ, ຄັດຄ້ານລັດທິເຈົ້າໂລກແລະການເມືອງມະຫາອຳນາດ, ປົກປັກຮັກສາສັນຕິພາບຂອງໂລກ, ຊຸກຍູ້ຄວາມກ້າວ ໜ້າຂອງມະນຸດ, ພະຍາຍາມຊຸກຍູ້ການສ້າງໂລກກົມກຽວກັນທີ່ມີສັນຕິພາບຖາວອນແລະຈະເລີນຮຸ່ງເຮືອງຮ່ວມກັນ. ຂະຫຍາຍການພົວພັນລະຫວ່າງຈີນກັບປະເທດຕ່າງໆໃນໂລກບົນພື້ນຖານຫຼັກການປັນຈະສີລາເພື່ອຢູ່ຮ່ວມກັນໂດຍສັນຕິ ຄື: ເຄົາລົບອະທິປະໄຕແລະຜືນແຜ່ນດິນອັນຄົບຖ້ວນເຊິ່ງກັນແລະກັນ, ບໍ່ລ່ວງລ້ຳເຊິ່ງກັນແລະກັນ, ບໍ່ແຊກແຊງວຽກງານພາຍໃນຂອງກັນແລະກັນ, ສະເໝີພາບແລະຕ່າງຝ່າຍຕ່າງມີຜົນປະໂຫຍດ, ຢູ່ຮ່ວມກັນໂດຍສັນຕິ. ຂະຫຍາຍການພົວພັນໄມຕີຈິດມິດຕະພາບຖານບ້ານໃກ້ເຮືອນຄຽງທີ່ດີຕໍ່ກັນລະຫວ່າງຈີນກັບປະເທດອ້ອມຂ້າງຢ່າງບໍ່ຢຸດຢັ້ງ, ເພີ່ມທະວີຄວາມສາມັກຄີແລະການຮ່ວມມືກັບປະເທດທີ່ກຳລັງພັດທະນາ. ຂະຫຍາຍການພົວພັນລະຫວ່າງພັກກອມມູນິດຈີນກັບພັກກອມມູນິດແລະພັກການເມືອງອື່ນໆຂອງປະເທດຕ່າງໆ ໂດຍອິງຕາມຫຼັກ ການທີ່ເປັນເອກະລາດແລະເປັນເຈົ້າຕົນເອງ, ສະເໝີພາບຢ່າງສົມບູນ, ເຄົາລົບເຊິ່ງກັນແລະກັນ ແລະ ບໍ່ແຊກແຊງວຽກງານພາຍໃນຂອງກັນແລະກັນ.
ພັກກອມມູນິດຈີນຕ້ອງນຳພາປະຊາຊົນບັນດາເຜົ່າໃນທົ່ວປະເທດ ບັນລຸເປົ້າໝາຍຍິ່ງໃຫຍ່ຂອງສັງຄົມນິຍົມແບບທັນສະໄໝ, ຕ້ອງປິ່ນອ້ອມແນວທາງພື້ນຖານຂອງພັກຢ່າງແໜ້ນແຟ້ນ, ເພີ່ມທະວີການກໍ່ສ້າງຄວາມສາມາດການປົກຄອງ, ການກໍ່ສ້າງລັກສະນະກ້າວໜ້າແລະຄວາມບໍລິສຸດຜຸດຜ່ອງ ຂອງພັກ, ຊຸກຍູ້ການກໍ່ສ້າງໂຄງການໃໝ່ທີ່ຍິ່ງໃຫຍ່ຂອງພັກຢ່າງຮອບດ້ານດ້ວຍຈິດໃຈປະຕິຮູບແລະປະດິດສ້າງ, ຊຸກຍູ້ການກໍ່ສ້າງແນວຄິດ, ການກໍ່ສ້າງດ້ານການຈັດຕັ້ງ, ການກໍ່ສ້າງແບບແຜນ, ການກໍ່ສ້າງຕ້ານການສໍ້ລາດບັງຫຼວງແລະລິເລີ່ມຄວາມປອດໃສຂາວສະອາດ, ການກໍ່ສ້າງລະບຽບການ, ຍົກລະດັບການກໍ່ສ້າງຂອງພັກຕາມຫຼັກວິທະຍາສາດໃຫ້ສູງຂຶ້ນຢ່າງຮອບດ້ານ, ຍຶດໝັ້ນການຕັ້ງພັກເພື່ອມະຫາຊົນ, ການປົກຄອງເພື່ອປະຊາຊົນ, ຍຶດໝັ້ນພັກຕ້ອງຄຸ້ມຄອງພັກແລະຄຸ້ມຄອງຢ່າງເຂັ້ມງວດ, ສົ່ງເສີມມູນເຊື້ອແລະແບບແຜນວິທີອັນດີງາມຂອງພັກ, ຍົກລະດັບການນຳພາແລະລະດັບການປົກ ຄອງຂອງພັກໃຫ້ສູງຂຶ້ນຢ່າງບໍ່ຢຸດຢັ້ງ, ຍົກສູງຄວາມສາມາດ ແລະປ້ອງກັນການເສຍທາດຂາດຄຸນ ແລະຄວາມສາມາດການຕ້ານກັບຄວາມສ່ຽງ, ສ້າງພື້ນຖານຊົນຊັ້ນຂອງພັກໃຫ້ໜັກແໜ້ນແລະເປີດກວ້າງພື້ນຖານມະຫາຊົນຂອງພັກຢ່າງບໍ່ຢຸດຢັ້ງ, ຍົກຄວາມສາມາດປະດິດສ້າງ, ກຳລັງຂອງຄວາມສາ ມັກຄີແລະກຳລັງສູ້ຮົບຂອງພັກໃຫ້ສູງຂຶ້ນຢ່າງບໍ່ຢຸດຢັ້ງ, ກໍ່ສ້າງພັກກຳອຳນາດລັດທິມາກທີ່ມັກຮ່ຳຮຽນ, ຮັບໃຊ້ປະຊາຊົນ ແລະ ມີຫົວຄິດປະດິດສ້າງ, ເຮັດໃຫ້ພັກກ້າວເດີນຢູ່ແຖວໜ້າຂອງຍຸກສະໄໝຢ່າງສະເໝີຕົ້ນສະເໝີປາຍ, ກາຍເປັນໃຈກາງທີ່ເຂັ້ມແຂງແຮງກ້າໃນການນຳພາປະຊາຊົນທົ່ວປະເທດກ້າວເດີນໄປຕາມເສັ້ນທາງສັງຄົມນິຍົມທີ່ມີສີສັນພິເສດຂອງຈີນຢ່າງບໍ່ຢຸດຢັ້ງ. ການກໍ່ສ້າງພັກຕ້ອງບັນລຸຄວາມຮຽກຮ້ອງຕ້ອງການພື້ນຖານ 4 ດ້ານຢ່າງເດັດດ່ຽວ ຄື:
1. ຍຶດໝັ້ນແນວທາງພື້ນຖານຂອງພັກ. ທົ່ວພັກຕ້ອງສ້າງແນວຄິດໃຫ້ເປັນເອກະພາບດ້ວຍແນວຄິດເຕິງສຽວຜິງ, ແນວຄິດສຳຄັນ"ສາມຕົວແທນ", ທັດສະນະພັດທະນາແບບວິທະຍາສາດ ແລະແນວທາງພື້ນຖານຂອງພັກ, ດຳເນີນການເຄື່ອນໄຫວຢ່າງເປັນເອກະພາບ, ແລະຍຶດໝັ້ນຕໍ່ໄປຈົນເທົ່າໃດໆແລະບໍ່ງໍ້ງ່ຽງຄອນແຄນ. ຕ້ອງໃຫ້ການປະຕິຮູບແລະໄຂປະຕູສູ່ພາຍນອກເປັນເອກະພາບກັນກັບສີ່ຫຼັກການພື້ນຖານ, ຈັດຕັ້ງປະຕິບັດແນວທາງພື້ນຖານຂອງພັກຢ່າງຮອບດ້ານ, ປະຕິບັດໂຄງຮ່າງພື້ນຖານໃນໄລຍະສັງຄົມນິຍົມເບື້ອງຕົ້ນຂອງພັກຢ່າງຮອບດ້ານ, ຄັດຄ້ານທ່າອ່ຽງອັນຜິດພາດທັງໝົດບໍ່ວ່າ "ອ່ຽງຊ້າຍ" ຫຼືອ່ຽງຂວາ, ຕ້ອງລະວັງຕົວຕໍ່ອ່ຽງຂວາ, ແຕ່ຕົ້ນຕໍແມ່ນປ້ອງກັນ"ອ່ຽງຊ້າຍ". ເພີ່ມທະວີການກໍ່ສ້າງຄະນະນຳທຸກຂັ້ນ, ຄັດເລືອກແລະນຳໃຊ້ພະນັກງານທີ່ສ້າງຜົນງານພົ້ນເດັ່ນແລະປະຊາຊົນເຊື່ອຖືໃນການປະຕິຮູບໄຂປະຕູສູ່ພາຍນອກແລະການສ້າງສາສັງຄົມນິຍົມແບບທັນສະໄໝ, ອົບຮົມສ້າງຜູ້ສືບທອດພາລະກິດສັງຄົມນິຍົມເປັນພັນເປັນໝື່ນຄົນ, ຮັບປະກັນໃຫ້ທິດສະດີພື້ນຖານ, ແນວທາງພື້ນຖານ, ໂຄງຮ່າງພື້ນຖານ ແລະບົດຮຽນພື້ນຖານຂອງພັກໄດ້ຮັບການຜັນຂະຫຍາຍແລະຈັດຕັ້ງປະຕິບັດ.
2. ຍຶດໝັ້ນປົດປ່ອຍແນວຄິດ, ສະແຫວງຫາສັດຈະທຳຈາກຄວາມເປັນຈິງ, ກ້າວເດີນໄປຕາມຍຸກສະໄໝ, ກ້າຄົ້ນຄວ້າແລະກ້າລົງພາກປະຕິບັດຕົວຈິງ. ແນວທາງແນວຄິດຂອງພັກແມ່ນເລີ່ມຈາກຄວາມເປັນຈິງທັງໝົດ, ທິດສະດີຕິດພັນກັບຄວາມເປັນຈິງ, ສະແຫວງຫາສັດຈະທຳຈາກຄວາມເປັນຈິງ, ກວດສອບແລະພັດທະນາສັດຈະທຳໃນພຶດຕິກຳ. ທົ່ວພັກຕ້ອງຍຶດໝັ້ນແນວທາງແນວຄິດນີ້, ຕັ້ງໜ້າຄົ້ນຄວ້າ, ກ້າດຳເນີນການທົດລອງ, ບຸກເບີກແລະປະດິດສ້າງ, ດຳເນີນວຽກງານຢ່າງມີລັກສະນະປະດິດສ້າງ, ສຶກສາຄົ້ນຄວ້າສະພາບການໃໝ່ແລະສະຫຼຸບບົດຮຽນໃໝ່ຢ່າງບໍ່ຢຸດຢັ້ງ, ແກ້ໄຂບັນຫາໃໝ່, ພັດທະນາລັດທິມາກ-ເລນິນແລະເພີ່ມຕື່ມເນື້ອໃນໃຫ້ອຸດົມສົມບູນກວ່າເກົ່າໃນພຶດຕິກຳ, ຊຸກຍູ້ລັດທິມາກ-ເລນິນຫັນເປັນແບບຈີນ.
