ກົດລະບຽບຂອງພັກກອມມູນິດຈີນ
(GMT+08:00) 2012-11-16 16:56:32 cri
ພັກກອມມູນິດຈີນນຳພາປະຊາຊົນສ້າງສັງຄົມສັງຄົມນິຍົມທີ່ສາມັກຄີປອງດອງກັນ. ອີງຕາມຄວາມຮຽກຮ້ອງຕ້ອງການທີ່ມີປະຊາທິປະໄຕແລະປົກຄອງຕາມລະບຽບກົດໝາຍ, ສະເໝີພາບແລະມີຄວາມເປັນທຳ, ຊື່ສັດແລະມີມິດໄມຕີຕໍ່ກັນ, ເຕັມໄປດ້ວຍພະລັງຊີວິດຊີວາ, ມີຄວາມສະຫງົບຮຽບຮ້ອຍ, ມະນຸດກັບທຳມະຊາດຢູ່ຮ່ວມກັນໄດ້ຢ່າງກົມກຽວກັນ ແລະ ຫຼັກການທີ່ສ້າງສາຮ່ວມກັນຊົມໃຊ້ຮ່ວມກັນ, ຖືການຮັບປະກັນແລະປັບປຸງຊີວິດການເປັນຢູ່ຂອງປະຊາຊົນເປັນຈຸດສຸມ, ແກ້ໄຂບັນຫາຜົນປະໂຫຍດທີ່ປະຊາຊົນມີຄວາມສົນໃຈທີ່ສຸດ, ໂດຍກົງທີ່ສຸດ ແລະ ຕິດແທດກັບຕົວຈິງຫຼາຍທີ່ສຸດ, ພະຍາຍາມສ້າງສະພາບທີ່ປະຊາຊົນທຸກຖ້ວນໜ້າສາມາດສົ່ງເສີມຄວາມສາມາດຂອງຕົນຢ່າງສຸດຂີດ, ຕ່າງຄົນຕ່າງໄດ້ຮັບການປະຕິບັດຢ່າງເໝາະສົມແລະຢູ່ຮ່ວມກັນຢ່າງສາມັກຄີປອງດອງກັນ. ຈຳແນກ ຢ່າງເດັດຂາດແລະແກ້ໄຂຢ່າງຖືກຕ້ອງກ່ຽວກັບຄວາມຂັດແຍ່ງກັນລະຫວ່າງຝ່າຍເຮົາກັບຝ່າຍສັດຕູ ແລະ ຄວາມຂັດແຍ່ງພາຍໃນປະຊາຊົນ ເຊິ່ງເປັນຄວາມຂັດແຍ່ງສອງຢ່າງທີ່ມີລັກສະນະແຕກຕ່າງກັນ. ເພີ່ມທະວີການຄຸ້ມຄອງຄວາມສະຫງົບຮຽບຮ້ອຍທາງສັງຄົມທົ່ວໄປ, ເດັດດ່ຽວປະຕິບັດຕາມກົດໝາຍເພື່ອຕ້ານກັບການກະທຳຜິດ ແລະພວກກະທຳຜິດປະເພດຕ່າງໆທີ່ສ້າງຄວາມອັນຕະລາຍຕໍ່ຄວາມປອດໄພແລະຜົນປະໂຫຍດແຫ່ງຊາດ, ສົ່ງຜົນສະທ້ອນທີ່ອັນຕະລາຍເຖິງຄວາມສະຫງົບແລະຄວາມເປັນລະບຽບຮຽບຮ້ອຍຂອງສັງຄົມ ແລະການພັດທະນາເສດຖະກິດ, ເພື່ອຮັກສາໃຫ້ສັງຄົມມີຄວາມສະຫງົບຮຽບຮ້ອຍເປັນໄລຍະຍາວນານ.
ພັກກອມມູນິດຈີນນຳພາປະຊາຊົນຈີນສ້າງສາອາລິຍະທຳຊີວະພາບສັງຄົມນິຍົມ. ສ້າງຕັ້ງທັດສະ ນະອາລິຍະທຳຊີວະພາບ ທີ່ເຄົາລົບທຳມະຊາດ, ໄປຕາມກົດເກນທຳມະຊາດແລະປົກປັກຮັກສາທຳມະຊາດ, ຍຶດໝັ້ນນະໂຍບາຍພື້ນຖານຂອງລັດ ທີ່ປະຢັດຊັບພະຍາກອນທຳມະຊາດແລະອະນຸລັກສິ່ງແວດລ້ອມ, ຍຶດໝັ້ນທິດທາງທີ່ປະຢັດໄວ້ກ່ອນ, ຮັກສາໄວ້ກ່ອນ, ຟື້ນຟູຕາມທຳມະຊາດເປັນຕົ້ນຕໍ, ຍຶດໝັ້ນເດີນໄປຕາມເສັ້ນທາງພັດທະນາແບບອາລິຍະທຳ ທີ່ພັດທະນາການຜະລິດ, ສ້າງຊີວິດທີ່ຮັ່ງມີ ແລະ ສະພາບຊີວະພາບທີ່ດີງາມ. ສຸມໃສ່ສ້າງສາສັງຄົມທີ່ປະຢັດຊັບພະຍາກອນທຳມະຊາດແລະເປັນມິດກັບສິ່ງແວດລ້ອມ, ກໍ່ຕົວເປັນສະຖານະການ, ອົງປະກອບອຸດສາຫະກຳ, ວິທີການຜະລິດແລະວິຖີຊີວິດ ທີ່ປະຢັດຊັບພະຍາກອນທຳມະຊາດແລະອະນຸລັກສິ່ງແວດລ້ອມທຳມະຊາດ, ສ້າງສະພາບແວດລ້ອມການຜະລິດແລະການດຳລົງຊີວິດທີ່ດີງາມເພື່ອປະຊາຊົນ, ບັນລຸໃຫ້ປະຊາຊາດຈີນມີການ ພັດທະນາຢ່າງຕໍ່ເນື່ອງຈົນເທົ່າໃດໆ.
ພັກກອມມູນິດຈີນຍຶດໝັ້ນເປັນຜູ້ນຳພາກອງທັບປົດປ່ອຍປະຊາຊົນຈີນ ແລະ ກອງກຳລັງປະກອບອາວຸດປະຊາຊົນກອງອື່ນໆ, ເພີ່ມທະວີການກໍ່ສ້າງກອງທັບປົດປ່ອຍປະຊາຊົນ, ຮັບປະກັນໃຫ້ກອງທັບປົດປ່ອຍປະຊາຊົນປະຕິບັດພາລະກຳປະຫວັດສາດຂອງກອງທັບໃນໄລຍະໃໝ່ໃນສະຕະວັດໃໝ່ຢ່າງແທ້ຈິງ, ເສີມຂະຫຍາຍບົດບາດຂອງກອງທັບປົດປ່ອຍປະຊາຊົນຢ່າງເຕັມທີ່ໃນການປັບປຸງວຽກງານປ້ອງກັນຊາດ, ການປົກປັກຮັກສາປະເທດຊາດ ແລະ ເຂົ້າຮ່ວມການສ້າງສາສັງຄົມນິຍົມແບບທັນສະໄໝ.
ພັກກອມມູນິດຈີນປົກປ້ອງແລະຂະຫຍາຍການພົວພັນຊົນເຜົ່າສັງຄົມນິຍົມທີ່ສະເໝີພາບ, ສາມັກຄີ, ຊ່ວຍເຫຼືອເຊິ່ງກັນແລະກັນແລະກົມກຽວກັນ, ຕັ້ງໜ້າອົມຮົບສ້າງແລະຄັດເລືອກພະນັກງານຊົນເຜົ່າສ່ວນໜ້ອຍ, ຊ່ວຍເຫຼືອຊົນເຜົ່າສ່ວນໜ້ອຍ ແລະ ເຂດຊົນເຜົ່າສ່ວນໜ້ອຍພັດທະນາພາລະກິດດ້ານເສດຖະກິດ, ວັດທະນະທຳແລະສັງຄົມ, ບັນລຸໃຫ້ບັນດາຊົນເຜົ່າຕ່າງໆສາມັກຄີສູ້ຊົນຮ່ວມກັນ ແລະພັດ ທະນາຈະເລີນຮຸ່ງເຮືອງຮ່ວມກັນ. ຜັນຂະຫຍາຍທິດທາງພື້ນຖານຂອງວຽກງານດ້ານສາສະໜາຂອງພັກຢ່າງຮອບດ້ານ, ສາມັກຄີກັບມະຫາຊົນທີ່ເຊື່ອຖືສາສະໜາເພື່ອປະກອບສ່ວນເຂົ້າໃນການພັດທະ ນາເສດຖະກິດ-ສັງຄົມ.
ພັກກອມມູນິດຈີນສາມັກຄີກັບກຳມະກອນ, ຊາວກະສິກອນ ແລະ ປັນຍາຊົນຂອງຊົນເຜົ່າຕ່າງໆໃນທົ່ວປະເທດ, ສາມັກຄີກັບບັນດາພັກປະຊາທິປະໄຕ, ບຸກຄົນທີ່ບໍ່ສັງກັດພັກຝ່າຍໃດ ແລະກ້ອນກຳລັງທີ່ຮັກຊາດຂອງຊົນເຜົ່າຕ່າງໆ, ຂະຫຍາຍແລະເສີມສ້າງແນວໂຮມຮັກຊາດເອກະພາບທີ່ກວ້າງ ຂວາງທີ່ສຸດທີ່ປະກອບດ້ວຍຊາວຜູ້ອອກແຮງງານສັງຄົມນິຍົມທຸກຖ້ວນໜ້າ, ຜູ້ສ້າງສາພາລະກິດສັງ ຄົມນິຍົມ, ຜູ້ຮັກຊາດທີ່ສະໜັບສະໜູນສັງຄົມນິຍົມ ແລະ ຜູ້ຮັກຊາດທີ່ສະໜັບສະໜູນການໂຮມປະເທດຊາດເຂົ້າເປັນເອກະພາບກັນ. ຮັດແໜ້ນຄວາມສາມັກຄີປະຊາຊົນທົ່ວປະເທດຢ່າງບໍ່ຢຸດຢັ້ງ, ເຊິ່ງລວມ ທັງພີ່ນ້ອງຮ່ວມຊາດເຂດບໍລິຫານພິເສດຮົງກົງ, ພີ່ນ້ອງຮ່ວມຊາດເຂດບໍລິຫານພິເສດມາເກົ໋າ, ພີ່ນ້ອງຮ່ວມຊາດໄຕ້ຫວັນ ແລະ ຊາວຈີນທີ່ອາໄສຢູ່ຕ່າງປະເທດ. ອີງຕາມທິດທາງທີ່ "ປະເທດດຽວສອງລະ ບອບ", ຊຸກຍູ້ໃຫ້ເຂດພິເສດຮົງກົງແລະເຂດພິເສດມາເກົ໋າຈະເລີນຮຸ່ງເຮືອງແລະມີສະຖຽນລະພາບຖາວອນ, ສຳເລັດພາລະກິດການໂຮມປະເທດຊາດເຂົ້າເປັນເອກະພາບກັນ.
