ກົດລະບຽບຂອງພັກກອມມູນິດຈີນ
(GMT+08:00) 2012-11-16 16:56:32 cri
3. ຍຶດໝັ້ນສຸມຈິດສຸມໃຈຮັບໃຊ້ປະຊາຊົນ. ນອກຈາກຜົນປະໂຫຍດຂອງຊົນຊັ້ນກຳມະກອນແລະຂອງປະຊາຊົນອັນກວ້າງໃຫຍ່ໄພສານທີ່ສຸດແລ້ວ, ພັກກອມມູນິດຈີນບໍ່ມີຜົນປະໂຫຍດອັນພິເສດຂອງຕົນ. ບໍ່ວ່າໃນເວລາໃດ, ພັກກໍຖືເອົາຜົນປະໂຫຍດຂອງປະຊາຊົນໄວ້ຢູ່ອັນດັບໜຶ່ງ, ຮ່ວມທຸກຮ່ວມສຸກນຳກັນກັບປະຊາຊົນ, ຮັກສາການພົວພັນກັບປະຊາຊົນຢ່າງສະໜິດແໜ້ນທີ່ສຸດ, ຍຶດໝັ້ນການປົກຄອງເພື່ອປະຊາຊົນ, ເປັນຫ່ວງໄຍນຳສະພາບຄວາມເປັນຢູ່ຂອງປະຊາຊົນ ແລະສະແຫວງຫາຜົນປະໂຫຍດເພື່ອປະຊາຊົນ, ຫ້າມບໍ່ໃຫ້ສະມາຊິກພັກບໍ່ວ່າຜູ້ໃດເຫີນຫ່າງອອກຈາກປະຊາຊົນ ຫຼືຢູ່ເໜືອປະຊາຊົນ. ໃນວຽກງານຂອງຕົນ, ພັກດຳເນີນແນວທາງມະຫາຊົນ, ເພື່ອປະຊາຊົນ, ອີງໃສ່ປະຊາຊົນ, ມາຈາກປະຊາຊົນ, ລົງໄປຮອດໄປເຖິງປະຊາຊົນ, ເຮັດໃຫ້ເຈດຈຳນົງອັນຖືກຕ້ອງຂອງພັກກາຍເປັນການກະທຳທີ່ເປັນ ເຈົ້າການຂອງປະຊາຊົນ. ທ່າແຮງດ້ານການເມືອງທີ່ໃຫຍ່ທີ່ສຸດຂອງພັກແມ່ນຕິດພັນກັບປະຊາຊົນຢ່າງແໜ້ນແຟ້ນ, ໄພອັນຕະລາຍທີ່ໃຫຍ່ທີ່ສຸດຂອງພັກຫຼັງກຳອຳນາດແມ່ນແຍກຕົວອອກ ຫ່າງຈາກປະຊາຊົນ. ບັນຫາແບບແຜນຂອງພັກ ແລະ ບັນຫາທີ່ພັກພົວພັນກັບປະຊາຊົນຢ່າງສະໜິດ ແໜ້ນນັ້ນ ແມ່ນບັນຫາສຳຄັນທີ່ກ່ຽວພັນເຖິງການຄົງຕົວຂອງພັກ. ພັກຍຶດໝັ້ນທິດທາງທີ່ແກ້ໄຂບັນຫາທັງຕົ້ນເຫດແລະປາຍເຫດ, ຄຸ້ມຄອງໂດຍສັງລວມ, ການປະຕິບັດວິໄນພັກກັບການປ້ອງກັນດຳເນີນໄປພ້ອມແຕ່ຕົ້ນຕໍແມ່ນສຸມໃສ່ການປ້ອງກັນ, ສ້າງແລະປັບປຸງລະບົບການປະຕິບັດວິໄນພັກແລະການປ້ອງກັນການເສຍທາດຂາດຄຸນ, ຍຶດໝັ້ນຕໍ່ຕ້ານກັບການເສຍທາດຂາດຄຸນຢ່າງບໍ່ລົດລະ, ເພີ່ມທະວີການກໍ່ສ້າງດ້ານແບບແຜນຂອງພັກແລະປອດໃສຂາວສະອາດ.
4. ຍຶດໝັ້ນລະບອບລວມສູນປະຊາທິປະໄຕ. ລະບອບລວມສູນປະຊາທິປະໄຕແມ່ນການປະສານສົມທົບກັນລະຫວ່າງການລວມສູນບົນພື້ນຖານປະຊາທິປະໄຕແລະປະຊາທິປະໄຕພາຍໃຕ້ການລວມ ສູນຊີ້ນຳ. ມັນແມ່ນຫຼັກການຈັດຕັ້ງພື້ນຖານຂອງພັກ, ກໍແມ່ນການປະຕິບັດແນວທາງມະຫາຊົນໃນຊີວິດຂອງພັກ. ຕ້ອງເສີມຂະຫຍາຍປະຊາທິປະໄຕພາຍໃນພັກຢ່າງເຕັມທີ່, ເຄົາລົບຖານະຕົ້ນຕໍຂອງສະມາຊິກພັກ, ຮັບປະກັນສິດປະຊາທິປະໄຕຂອງສະມາຊິກພັກ, ເສີມຂະຫຍາຍຄວາມຂະຫຍັນຫ້າວຫັນແລະການປະດິດສ້າງຂອງອົງການພັກທຸກຂັ້ນແລະສະມາຊິກພັກອັນໄພສານ. ຕ້ອງດຳເນີນການລວມສູນຢ່າງຖືກຕ້ອງ, ຮັບປະກັນໃຫ້ທົ່ວພັກສາມັກຄີເປັນເອກະພາບແລະການເຄື່ອນໄຫວເປັນເອກະພາບ, ຮັບປະກັນໃຫ້ການຕົກລົງຂອງພັກໄດ້ຮັບການຜັນຂະຫຍາຍແລະປະຕິບັດຢ່າງວ່ອງໄວແລະມີປະສິດທິຜົນ. ເພີ່ມທະວີລັກສະນະຈັດຕັ້ງແລະລັກສະນະລະບຽບວິໄນ, ທຸກໆຄົນຕ້ອງສະເໝີພາບກັນຢູ່ພາຍໃຕ້ລະບຽບວິໄນຂອງພັກ. ເພີ່ມທະວີການຕິດຕາມກວດກາຕໍ່ອົງການການນຳຂອງພັກແລະພະນັກງານການນຳພັກ, ໂດຍສະເພາະແມ່ນພະນັກງານການນຳຜູ້ສຳຄັນ, ປັບປຸງລະບົບການຕິດຕາມກວດກາພາຍໃນພັກໃຫ້ສົມບູນຢ່າງບໍ່ຢຸດຢັ້ງ. ພັກດຳເນີນການຕຳນິຕິຊົມກັນແລະຕຳນິຕົນເອງຢ່າງຖືກຕ້ອງໃນຊີວິດການເມືອງຂອງຕົນ, ດຳເນີນການຕໍ່ສູ້ແນວຄິດໃນບັນຫາຫຼັກການ, ຍຶດໝັ້ນສັດ ຈະທຳ, ແກ້ໄຂອັນຜິດພາດ. ພະຍາຍາມສ້າງໃຫ້ກາຍເປັນສະພາບການເມືອງທີ່ເຕັມໄປດ້ວຍຄວາມຊີ ວິດຊີວາ, ມີການລວມສູນກໍມີປະຊາທິປະໄຕ, ມີລະບຽບວິໄນກໍມີເສລີພາບ, ມີຈິດໃຈທີ່ເປັນເອກະພາບກໍເຮັດໃຫ້ຄົນຮູ້ສຶກສະບາຍອົກສະບາຍໃຈ.
ການນຳພາຂອງພັກຕົ້ນຕໍແມ່ນການນຳພາດ້ານການເມືອງ, ແນວຄິດ ແລະ ການຈັດຕັ້ງ. ພັກຕ້ອງສອດຄ່ອງກັບຄວາມຮຽກຮ້ອງຕ້ອງການຂອງການປະຕິຮູບໄຂປະຕູສູ່ພາຍນອກ ແລະການສ້າງສາສັງ ຄົມນິຍົມແບບທັນສະໄໝ, ຍຶດໝັ້ນການປົກຄອງທີ່ວິທະຍາສາດ, ການປົກຄອງແບບປະຊາທິປະໄຕ ແລະ ການປົກຄອງຕາມກົດໝາຍ, ເພີ່ມທະວີແລະປັບປຸງການນຳພາຂອງພັກ. ພັກຕ້ອງເສີມຂະຫຍາຍບົດບາດເປັນແກນນຳໃນອົງການຈັດຕັ້ງຕ່າງໆທີ່ເທົ່າທຽມກັນ ໂດຍອີງຕາມຫຼັກການທີ່ຄວບຄຸມສະ ພາບຮອບດ້ານ ແລະ ປະສານງານບັນດາຝ່າຍ. ພັກຕ້ອງເຕົ້າໂຮມກຳລັງວັງຊາເພື່ອນຳພາການສ້າງ ສາເສດຖະກິດ, ຈັດຕັ້ງແລະປະສານງານກຳລັງດ້ານຕ່າງໆ, ຮ່ວມແຮງຮ່ວມໃຈກັນ, ດຳເນີນວຽກງານໂດຍປິ່ນອ້ອມການສ້າງສາເສດຖະກິດ, ຊຸກຍູ້ໃຫ້ເສດຖະກິດ-ສັງຄົມມີການພັດທະນາຢ່າງຮອບດ້ານ. ພັກຕ້ອງດຳເນີນການຕົກລົງຢ່າງມີປະຊາທິປະໄຕແລະວິທະຍາສາດ, ວາງແລະປະຕິບັດແນວທາງ, ທິດທາງແລະນະໂຍບາຍທີ່ຖືກຕ້ອງ, ເຮັດວຽກງານການຈັດຕັ້ງແລະໂຄສະນາອົບຮົມຂອງພັກໃຫ້ດີ, ເສີມຂະຫຍາຍບົດບາດນຳໜ້າທີ່ເປັນແບບຢ່າງຂອງສະມາຊິກພັກທຸກຖ້ວນໜ້າ. ພັກຕ້ອງດຳເນີນການເຄື່ອນໄຫວໃນຂອບເຂດລັດຖະທຳມະນູນແລະກົດໝາຍ. ພັກຕ້ອງຮັບປະກັນໃຫ້ອົງການນິຕິບັນຍັດ, ອົງການຕຸລາການແລະອົງການບໍລິຫານຂອງລັດ, ອົງການຈັດຕັ້ງເສດຖະກິດ, ວັດທະນະທຳ ແລະ ອົງການຈັດຕັ້ງມະຫາຊົນເຮັດວຽກຢ່າງເປັນເຈົ້າການແລະຂະຫຍັນຫ້າວຫັນ, ຮັບຜິດຊອບຢ່າງເປັນເອກະລາດ ແລະປະສານງານເປັນເອກະພາບ. ພັກຕ້ອງເພີ່ມທະວີການນຳພາອົງການຈັດຕັ້ງມະຫາ ຊົນ, ເປັນຕົ້ນແມ່ນກຳມະບານ, ຄະນະຊາວໜຸ່ມກອມມູນິດ, ສະຫະພັນແມ່ຍິງແລະອື່ນໆ, ໃຫ້ເຂົາເຈົ້າສາມາດເສີມຂະຫຍາຍບົດບາດຂອງຕົນຢ່າງເຕັມທີ່. ພັກຕ້ອງສອດຄ່ອງກັບການຂະຫຍາຍຕົວຂອງສະຖານະການແລະການຜັນແປຂອງສະພາບການ, ປັບປຸງໂຄງປະກອບການນຳພາໃຫ້ສົມບູນ, ປັບປຸງວິທີການນຳພາ, ເພີ່ມຄວາມສາມາດການປົກຄອງ. ສະມາຊິກພັກຕ້ອງຮ່ວມມືກັບມະຫາຊົນທີ່ຢູ່ນອກພັກຢ່າງສະໜິດແໜ້ນ, ຮ່ວມກັນບາກບັ່ນສູ້ຊົນເພື່ອສ້າງສາສັງຄົມນິຍົມທີ່ມີສັນສີພິເສດຂອງຈີນ.
