ກົດລະບຽບຂອງພັກກອມມູນິດຈີນ
(GMT+08:00) 2012-11-16 16:56:32 cri
ການຍຶດໝັ້ນການປະຕິຮູບແລະໄຂປະຕູສູ່ພາຍນອກ ແມ່ນເສັ້ນທາງຂອງພວກເຮົາໃນການສ້າງ ສາໃຫ້ປະເທດຈະເລີນເຂັ້ມແຂງ. ມີແຕ່ດຳເນີນການປະຕິຮູບໄຂປະຕູສູ່ພາຍນອກເທົ່ານັ້ນ ຈຶ່ງສາມາດພັດທະນາຈີນ, ພັດທະນາສັງຄົມນິຍົມແລະລັດທິມາກໄດ້. ຕ້ອງດຳເນີນການປະຕິຮູບຢ່າງເຖິງຖອງຕໍ່ໂຄງປະກອບເສດຖະກິດທີ່ຈຳກັດການພັດທະນາກຳລັງການຜະລິດ, ຍຶດໝັ້ນແລະປັບປຸງໂຄງປະກອບເສດຖະກິດຕະຫຼາດສັງຄົມນິຍົມ; ເພື່ອໃຫ້ສອດຄ່ອງກັບການປະຕິຮູບດັ່ງກ່າວ, ກໍຕ້ອງດຳເນີນການປະຕິຮູບໂຄງປະກອບການເມືອງ ແລະຂົງເຂດອື່ນໆ. ຕ້ອງຍຶດໝັ້ນນະໂຍບາຍພື້ນຖານແຫ່ງຊາດທີ່ໄຂປະຕູສູ່ພາຍນອກ, ສະຫຼຸບຖອດຖອນໝາກຜົນອາລິຍະທຳທັງໝົດທີ່ສັງຄົມມະນຸດປະດິດສ້າງ. ການປະຕິຮູບແລະໄຂປະຕູສູ່ພາຍນອກຕ້ອງກ້າຄົ້ນຄວ້າ, ກ້າບຸກເບີກ, ຍົກລະດັບວິທະຍາສາດໃນການວາງແຜນການປະຕິຮູບ, ເພີ່ມທະວີການປະສານງານໃນມາດຕະການການປະຕິຮູບ, ສ້າງແບບແຜນໃໝ່ໃນພຶດຕິກຳຕົວຈິງ.
ພັກກອມມູນິດຈີນນຳພາປະຊາຊົນພັດທະນາເສດຖະກິດຕະຫຼາດສັງຄົມນິຍົມ. ປັບປຸງແລະພັດ ທະນາເສດຖະກິດກຳມະສິດສ່ວນລວມຢ່າງເດັດຂາດ, ສົ່ງເສີມ, ສະໜັບສະໜູນແລະຊີ້ນຳການພັດທະ ນາເສດຖະກິດກຳມະສິດເອກະຊົນຢ່າງເດັດຂາດ. ເສີມຂະຫຍາຍບົດບາດລັກສະນະພື້ນຖານຂອງຕະຫຼາດໃນການຈັດສັນຊັບພະຍາກອນ, ສ້າງລະບົບການຄວບຄຸມທາງມະຫາພາກໃຫ້ສົມບູນ. ວາງແຜນລວມຂອງການພັດທະນາຕົວເມືອງແລະຊົນນະບົດ, ການພັດທະນາເຂດແຄວ້ນ, ການພັດທະນາເສດຖະກິດ-ສັງຄົມ, ການພັດທະນາແບບມະນຸດກັບທຳມະຊາດສາມາດຢູ່ຮ່ວມກັນແລະກົມກຽວກັນ, ການພັດທະນາພາຍໃນປະເທດກັບການໄຂປະຕູສູ່ພາຍນອກ. ປັບປຸງໂຄງປະກອບເສດຖະກິດ, ຫັນ ປ່ຽນຮູບແບບການພັດທະນາດ້ານເສດຖະກິດ. ຊຸກຍູ້ໃຫ້ການຫັນເປັນອຸດສາຫະກຳ, ການຫັນເປັນຂໍ້ມູນຂ່າວສານ, ການຫັນເປັນຕົວເມືອງ ແລະ ກະສິກຳແບບທັນສະໄໝ ໄດ້ຮັບການພັດທະນາຄູ່ກັນ, ສ້າງ ສາຊົນນະບົດໃໝ່ຂອງສັງຄົມນິຍົມ, ເດີນໄປຕາມເສັ້ນທາງພັດທະນາອຸດສາຫະກຳແບບໃໝ່ທີ່ມີສີສັນພິເສດຂອງຈີນ, ສ້າງສາປະເທດໃຫ້ມີການປະດິດສ້າງ.
ພັກກອມມູນິດຈີນນຳພາປະຊາຊົນພັດທະນາການເມືອງປະຊາທິປະໄຕສັງຄົມນິຍົມ. ຍຶດໝັ້ນ ການນຳພາຂອງພັກ, ປະຊາຊົນເປັນເຈົ້າຂອງປະເທດຊາດ ແລະປົກຄອງປະເທດດ້ວຍກົດໝາຍຢ່າງເປັນເອກະພາບກັນ, ເດີນໄປຕາມເສັ້ນທາງການພັດທະນາການເມືອງສັງຄົມນິຍົມທີ່ມີສີສັນພິເສດຂອງຈີນ, ເປີດກວ້າງປະຊາທິປະໄຕສັງຄົມນິຍົມ, ປັບປຸງລະບຽບກົດໝາຍສັງຄົມນິຍົມໃຫ້ສົມບູນຄົບຖ້ວນ, ສ້າງສາປະເທດສັງຄົມນິຍົມທີ່ປົກຄອງດ້ວຍກົດໝາຍ, ປັບປຸງຜະເດັດການປະຊາທິປະໄຕປະຊາຊົນ, ສ້າງອາລິຍະທຳການເມືອງສັງຄົມນິຍົມ. ຍຶດໝັ້ນແລະປັບປຸງລະບົບສະພາປະຊາຊົນ, ລະບົບສະພາປຶກສາການເມືອງແລະການຮ່ວມມືລະຫວ່າງຫຼາຍພັກເຊິ່ງນຳພາໂດຍພັກກອມມູນິດຈີນ, ລະບົບເຂດຊົນເຜົ່າສ່ວນໜ້ອຍປົກຄອງຕົນເອງ ແລະ ລະບົບມວນຊົນພື້ນຖານປົກຄອງຕົນເອງ. ພັດທະນາປະຊາທິປະໄຕໃຫ້ກວ້າງຂວາງກວ່າເກົ່າ, ເຕັມສ່ວນກວ່າເກົ່າແລະສົມບູນກວ່າເກົ່າ, ຮັບປະກັນສິດທິຂອງປະຊາຊົນໃນການຄຸ້ມຄອງວຽກງານຂອງລັດແລະວຽກງານທາງສັງຄົມ, ແລະໃນການຄຸ້ມຄອງວຽກງານທາງດ້ານເສດຖະກິດແລະວັດທະນະທຳ. ເຄົາລົບແລະຮັບປະກັນສິດທິມະນຸດ. ພະຍາຍາມສ້າງເງື່ອນໄຂປະກອບຄຳຄິດຄຳເຫັນໃຫ້ຂັ້ນລຸ່ມ, ສ້າງແລະປັບປຸງລະບົບແລະລະບຽບການເລືອກຕັ້ງປະຊາທິປະໄຕ, ການຕັດສິນປະຊາທິປະໄຕ, ການຄຸ້ມຄອງປະຊາທິປະໄຕ ແລະ ການຕິດຕາມກວດກາປະຊາທິປະໄຕ. ບູລະນະລະບົບກົດໝາຍສັງຄົມນິຍົມທີ່ມີສີສັນພິເສດຂອງຈີນໃຫ້ສົມບູນຂຶ້ນ, ເພີ່ມທະວີວຽກງານປະຕິບັດກົດໝາຍ, ບັນລຸໃຫ້ວຽກງານຕ່າງໆຂອງປະເທດດຳເນີນໄປຕາມລະບຽບກົດໝາຍ.
ພັກກອມມູນິດຈີນນຳພາປະຊາຊົນພັດທະນາວັດທະນະທຳທີ່ກ້າວໜ້າຂອງສັງຄົມນິຍົມ. ກໍ່ສ້າງອາລິຍະທຳທາງດ້ານຈິດໃຈຂອງສັງຄົມນິຍົມ, ດຳເນີນການປົກຄອງລັດຕາມກົດໝາຍປະສານສົມທົບກັບການປົກຄອງລັດດ້ວຍຈະລິຍະທຳ, ຍົກສູງຄຸນນະພາບດ້ານແນວຄິດຄຸນສົມບັດແລະຄຸນນະພາບດ້ານວັດທະນະທຳທີ່ວິທະຍາສາດຂອງທົ່ວຊົນຊາດ, ເພື່ອສະໜອງຄວາມຮັບປະກັນດ້ານແນວຄິດ, ພະລັງດ້ານຈິດໃຈ ແລະ ສະຕິປັນຍາໃຫ້ແກ່ການປະຕິຮູບໄຂປະຕູສູ່ພາຍນອກ ແລະ ການສ້າງສາສັງຄົມນິຍົມແບບທັນສະໄໝຢ່າງແຂງແຮງ, ສ້າງສາປະເທດສັງຄົມນິຍົມທີ່ຈະເລີນເຂັ້ມແຂງດ້ານວັດທະນະທຳ. ເພີ່ມທະວີການກໍ່ສ້າງລະບົບທັດສະນະຄຸນຄ່າຕົ້ນຕໍຂອງສັງຄົມນິຍົມ. ຍຶດໝັ້ນແນວຄິດຊີ້ນຳຂອງລັດທິມາກ-ເລນິນ, ສ້າງອຸດົມການຮ່ວມຂອງສັງຄົມນິຍົມທີ່ມີສີສັນພິເສດຂອງຈີນ, ສົ່ງເສີມຈິດໃຈຊາດທີ່ຖືລັດທິຮັກຊາດເປັນໃຈກາງ ແລະ ຈິດໃຈຍຸກສະໄໝທີ່ຖືການປະຕິຮູບແລະການປະດິດສ້າງເປັນໃຈກາງ, ລິເລີ່ມທັດສະນະທີ່ສົ່ງເສີມສິ່ງຍອດຍິ່ງແລະຕີຕ້ານສິ່ງອັບປະຍົດຂອງສັງຄົມນິຍົມ, ສົ່ງເສີມຈິດໃຈຄວາມເປັນກຽດ, ຄວາມໝັ້ນໃຈແລະຄວາມມານະບາກບັ່ນຂອງຊາດ, ຕ້ານກັບການເຊື່ອມຖອຍຈາກແນວຄິດຊຸດໂຊມເປື່ອຍເຍື່ອຍຂອງທຶນນິຍົມແລະສັກດິນານິຍົມ, ລົບລ້າງປະກົດການຫຍໍ້ທໍ້ຕ່າງໆໃນສັງຄົມ, ພະຍາຍາມເຮັດໃຫ້ປະຊາຊົນທົ່ວປະເທດກາຍເປັນປະຊາຊົນທີ່ມີອຸດົມການ,ມີຄຸນສົມບັດ,ມີວັດທະນະທຳ ແລະມີລະບຽບວິໄນ. ຕ້ອງດຳເນີນການສຶກສາອົບຮົມອຸດົມການຍິ່ງໃຫຍ່ກອມມູນິດໃຫ້ແກ່ສະມາຊິກພັກ. ສຸມໃສ່ພັດທະນາພາລະກິດການສຶກສາວິທະຍາສາດ ແລະວັດທະ ນະທຳ, ສົ່ງເສີມວັດທະນະທຳມູນເຊື້ອອັນດີງາມຂອງຊາດ, ພັດທະນາວັດທະນະທຳສັງຄົມນິຍົມໃຫ້ຈະເລີນຮຸ່ງເຮືອງ.
