ກົດລະບຽບຂອງພັກກອມມູນິດຈີນ
(GMT+08:00) 2012-11-16 16:56:32 cri
ຈີນກຳລັງຢູ່ໃນແລະຈະຢູ່ໃນໄລຍະສັງຄົມນິຍົມເບື້ອງຕົ້ນເປັນເວລາຍາວນານ. ນີ້ແມ່ນໄລຍະປະຫວັດສາດທີ່ຂ້າມຜ່ານບໍ່ໄດ້ ໃນການສ້າງສາສັງຄົມນິຍົມແບບທັນສະໄໝຂອງຈີນທີ່ເປັນປະເທດເສດຖະກິດແລະວັດທະນະທຳຫຼ້າຫຼັງ, ໄລຍະນີ້ອາດຈະຕ້ອງການເວລານັບຮ້ອຍປີ. ການສ້າງສາສັງຄົມນິຍົມຂອງຈີນ, ຕ້ອງເລີ່ມຈາກສະພາບແຫ່ງຊາດຈີນ ແລະ ເດີນໄປຕາມເສັ້ນທາງສັງຄົມນິຍົມທີ່ມີສີສັນພິເສດຂອງຈີນ. ໃນໄລຍະປັດຈຸບັນ, ຄວາມຂັດແຍ່ງຕົ້ນຕໍໃນສັງຄົມປະເທດຈີນແມ່ນຄວາມຂັດແຍ່ງລະຫວ່າງຄວາມຕ້ອງການຂອງປະຊາຊົນດ້ານວັດຖຸແລະວັດທະນະທຳທີ່ນັບມື້ນັບເພີ່ມຂຶ້ນ ກັບສັງຄົມການຜະລິດທີ່ຫຼ້າຫຼັງ. ເນື່ອງຈາກປັດໄຈພາຍໃນປະເທດແລະຜົນສະທ້ອນຈາກສາກົນ, ການຕໍ່ສູ້ຊົນຊັ້ນຍັງຈະມີຢູ່ໃນຂອບເຂດໃດໜຶ່ງເປັນໄລຍະຍາວນານ, ແລະຍັງອາດຈະດຸເດືອດຂຶ້ນອີກພາຍໃຕ້ເງື່ອນໄຂໃດໜຶ່ງ, ແຕ່ນີ້ບໍ່ແມ່ນຄວາມຂັດແຍ່ງຕົ້ນຕໍແລ້ວ. ໜ້າທີ່ຕົ້ນຕໍຂອງການສ້າງສາສັງຄົມນິຍົມຂອງຈີນແມ່ນປົດປ່ອຍກຳລັງການຜະລິດຕື່ມອີກ, ພັດທະນາກຳລັງການຜະລິດ, ບັນລຸສັງຄົມນິຍົມແບບທັນສະໄໝເປັນກ້າວໆ, ແລະດຳເນີນການປະຕິຮູບດ້ານຕ່າງໆແລະຂອດຕ່າງໆໃນການພົວພັນດ້ານການຜະລິດແລະໂຄງບົນທີ່ບໍ່ສອດຄ່ອງກັບການພັດທະນາກຳລັງການຜະລິດ ເພື່ອບັນລຸໜ້າທີ່ຕົ້ນຕໍດັ່ງກ່າວ. ຕ້ອງຍຶດໝັ້ນແລະປັບປຸງລະບອບເສດຖະກິດພື້ນຖານທີ່ຖືກຳມະສິດສ່ວນລວມເປັນຕົ້ນ ຕໍ ແລະ ເສດຖະກິດກຳມະສິດທຸກຮູບແບບທີ່ພັດທະນາຮ່ວມກັນ, ຕ້ອງຍຶດໝັ້ນປັບປຸງລະບົບການແບ່ງ ປັນທີ່ຖືການແບ່ງປັນຕາມການອອກແຮງງານເປັນຕົ້ນຕໍ ແລະ ມີຫຼາຍຮູບແບບການແບ່ງປັນທີ່ດຳເນີນໄປພ້ອມກັນ, ປຸກລະດົມໃຫ້ເຂດແຄວ້ນສ່ວນໜຶ່ງແລະຄົນຈຳນວນໜຶ່ງຮັ່ງມີຂຶ້ນມາກ່ອນ, ລົບລ້າງຄວາມທຸກຍາກເປັນກ້າວໆ, ແລະບັນລຸຄວາມຮັ່ງມີຮ່ວມກັນໃນທີ່ສຸດ. ຕອບສະໜອງຄວາມຕ້ອງການ ຂອງປະຊາຊົນດ້ານວັດຖຸແລະວັດທະນະທຳທີ່ນັບມື້ນັບເພີ່ມຂຶ້ນນັ້ນ ຢ່າງບໍ່ຢຸດຢັ້ງ ບົນພື້ນຖານການຜະລິດທີ່ໄດ້ຮັບການພັດທະນາແລະຊັບສິນຂອງສັງຄົມໄດ້ເພີ່ມຂຶ້ນ, ຊຸກຍູ້ການພັດທະນາຄົນຢ່າງຮອບ ດ້ານ. ການພັດທະນາແມ່ນໜ້າທີ່ສຳຄັນອັນດັບໜຶ່ງຂອງພັກໃນການປົກຄອງແລະສ້າງສາໃຫ້ປະເທດຈະເລີນຮຸ່ງເຮືອງ. ວຽກງານຕ່າງໆລ້ວນແຕ່ຕ້ອງຖືເອົາການມີຜົນດີຕໍ່ການພັດທະນາກຳລັງການຜະລິດຂອງສັງຄົມສັງຄົມນິຍົມ, ມີຜົນດີຕໍ່ການເພີ່ມຂຶ້ນກຳລັງແຮງສັງລວມຂອງປະເທດສັງຄົມນິຍົມ ແລະ ມີຜົນດີຕໍ່ການຍົກສູງລະດັບຊີວິດການເປັນຢູ່ຂອງປະຊາຊົນ ເປັນຈຸດເລີ່ມຕົ້ນລວມແລະມາດຕະຖານການກວດສອບ, ເຄົາລົບການອອກແຮງງານ, ເຄົາລົບຄວາມຮູ້, ເຄົາລົບຜູ້ມີຄວາມຮູ້ຄວາມສາມາດ, ເຄົາລົບການປະດິດສ້າງ, ພັດທະນາເພື່ອປະຊາຊົນ, ພັດທະນາອີງໃສ່ປະຊາຊົນ ແລະ ໝາກຜົນການພັດທະນາໃຫ້ປະຊາຊົນຊົມໃຊ້ຮ່ວມກັນ. ຫຼັງຈາກເຂົ້າສູ່ສະຕະວັດໃໝ່, ຈີນກໍເຂົ້າສູ່ໄລຍະພັດທະນາ ໃໝ່ທີ່ສ້າງສາສັງຄົມອິ່ມໜຳສຳລານຢ່າງຮອບດ້ານ ແລະ ເລັ່ງລັດຊຸກຍູ້ສັງຄົມນິຍົມແບບທັນສະໄໝ. ຕ້ອງຊຸກຍູ້ການສ້າງສາດ້ານເສດຖະກິດ, ການເມືອງ, ວັດທະນະທຳ, ສັງຄົມ ແລະ ອາລິຍະທຳຊີວະພາບຢ່າງຮອບດ້ານ ໂດຍອີງຕາມການຈັດວາງສັງລວມດ້ານພາລະກິດສັງຄົມນິຍົມທີ່ມີສີສັນພິເສດຂອງຈີນ. ໃນໄລຍະໃໝ່ແຫ່ງສະຕະວັດໃໝ່, ເປົ້າໝາຍຍຸດທະສາດຂອງການພັດທະນາເສດຖະກິດ-ສັງຄົມແມ່ນປັບປຸງແລະພັດທະນາສັງຄົມອິ່ມໜຳສຳລານທີ່ໄດ້ບັນລຸຜົນສຳເລັດໃນເບື້ອງຕົ້ນ, ສ້າງສັງຄົມອິ່ມໜຳສຳລານທີ່ມີລະດັບສູງກວ່າເກົ່ານັ້ນຂຶ້ນມາ ແລະສ້າງຜົນປະໂຫຍດແກ່ປະຊາກອນ ຈຳນວນ 1 ຕື້ກວ່າຄົນເມື່ອຮອດການສ້າງຕັ້ງພັກຄົບຮອບ 100 ປີ, ຍອດຜະລິດຕະພັນພາຍໃນສະເລ່ຍຕໍ່ຫົວຄົນບັນລຸລະດັບຂອງປະເທດພັດທະນາລະດັບປານກາງ ແລະບັນລຸທັນສະໄໝໂດຍພື້ນຖານ ເມື່ອຮອດການສ້າງຕັ້ງສາທາລະນະລັດປະຊາຊົນຈີນຄົບຮອບ 100 ປີ.
ແນວທາງພື້ນຖານຂອງພັກກອມມູນິດຈີນໃນໄລຍະຕົ້ນຂອງສັງຄົມນິຍົມນັ້ນແມ່ນ: ນຳພາແລະສາມັກຄີກັບປະຊາຊົນບັນດາເຜົ່າທົ່ວປະເທດ, ຖືການສ້າງສາເສດຖະກິດເປັນໃຈກາງ, ຍຶດໝັ້ນສີ່ຫຼັກການພື້ນຖານ, ຍຶດໝັ້ນການປະຕິຮູບແລະໄຂປະຕູສູ່ພາຍນອກ, ເພິ່ງກຳລັງຕົນເອງ, ສ້າງພາລະ ກິດຢ່າງທໍລະຫົດອົດທົນ, ບາກບັ່ນສູ້ຊົນເພື່ອສ້າງສາປະເທດຊາດໃຫ້ກາຍເປັນປະເທດສັງຄົມນິຍົມແບບທັນສະໄໝທີ່ມັ່ງຄັ່ງເຂັ້ມແຂງ, ປະຊາທິປະໄຕ, ມີອາລິຍະທຳ ແລະສາມັກຄີປອງດອງກັນ.
ໃນການນຳພາສ້າງສາພາລະກິດສັງຄົມນິຍົມ, ພັກກອມມູນິດຈີນຕ້ອງຍຶດໝັ້ນຖືການສ້າງສາເສດຖະກິດເປັນໃຈກາງ, ວຽກງານອື່ນໆລ້ວນແຕ່ປິ່ນອ້ອມແລະຮັບໃຊ້ໃຈກາງນີ້. ຕ້ອງກຳແໜ້ນໂອ ກາດ, ເລັ່ງລັດພັດທະນາ, ປະຕິບັດຍຸດທະສາດການສ້າງສາປະເທດໃຫ້ຈະເລີນຮຸ່ງເຮືອງດ້ວຍວິທະຍາ ສາດແລະການສຶກສາ, ຍຸດທະສາດການສ້າງສາປະເທດໃຫ້ເຂັ້ມແຂງດ້ວຍຜູ້ມີຄວາມຮູ້ຄວາມສາມາດ ແລະ ຍຸດທະສາດການພັດທະນາແບບຍືນຍົງ, ເສີມຂະຫຍາຍບົດບາດຂອງເຕັກນິກວິທະຍາສາດທີ່ເປັນກຳລັງການຜະລິດທີໜຶ່ງນັ້ນຢ່າງເຕັມສ່ວນ, ອາໄສຄວາມກ້າວໜ້າດ້ານເຕັກນິກວິທະຍາສາດ ໃນການຍົກສູງຄຸນນະພາບຂອງຜູ້ອອກແຮງງານ, ຊຸກຍູ້ໃຫ້ເສດຖະກິດແຫ່ງຊາດໄດ້ຮັບການພັດທະນາເປັນຢ່າງດີແລະວ່ອງໄວ.
ສີ່ຫຼັກການພື້ນຖານ ຄື: ຍຶດໝັ້ນເດີນໄປຕາມເສັ້ນທາງສັງຄົມນິຍົມ, ຍຶດໝັ້ນຜະເດັດການປະຊາທິ ປະໄຕປະຊາຊົນ, ຍຶດໝັ້ນການນຳພາໂດຍພັກກອມມູນິດຈີນ, ຍຶດໝັ້ນລັດທິມາກ-ເລນິນແນວຄິດເໝົາເຈີຕົງ ແມ່ນກົກເຄົ້າຂອງການສ້າງຕັ້ງປະເທດ. ໃນທົ່ວຂະບວນການສ້າງສາສັງຄົມນິຍົມແບບທັນສະໄໝ, ຕ້ອງຍຶດໝັ້ນສີ່ຫຼັກການພື້ນຖານ, ຄັດຄ້ານການຫັນເປັນແບບເສລີນາຍທຶນ.
