ກົດລະບຽບຂອງພັກກອມມູນິດຈີນ
(GMT+08:00) 2012-11-16 16:56:32 cri
ຖ້າການເລືອກຕັ້ງຂອງກອງປະຊຸມໃຫຍ່ຜູ້ແທນຂັ້ນຕ່າງໆຂອງທ້ອງຖິ່ນແລະກອງປະຊຸມໃຫຍ່ຜູ້ແທນຂັ້ນຮາກຖານຂອງພັກເກີດມີສະພາບການຜິດກັບລະບຽບການຂອງພັກ, ພາຍຫຼັງຄະນະກຳມະ ການຂັ້ນເທິງສຳຫຼວດແລະຢືນຢັນສະພາບການແລ້ວ, ຄວນອອກມະຕິຄຳສັ່ງປະກາດການເລືອກຕັ້ງເປັນໂມຄະແລະໃຊ້ມາດຕະການທີ່ສົມຄູ່ກັນ, ແລະລາຍງານຕໍ່ຄະນະກຳມະການຂັ້ນເທິງອີກເພື່ອສຳຫຼວດພິຈາລະນາແລະອະນຸມັດ, ແລ້ວປະກາດປະຕິບັດຢ່າງເປັນທາງການ.
ຜູ້ແທນຂອງກອງປະຊຸມຜູ້ແທນຂັ້ນຕ່າງໆຂອງພັກປະຕິບັດຕາມລະບຽບການ ເປັນຜູ້ແທນຕາມສະໄໝ.
ມາດຕາ12 ຄະນະກຳມະການຂັ້ນສູນກາງແລະທ້ອງຖິ່ນຂອງພັກສາມາດຮຽກໂຮມກອງປະຊຸມຜູ້ແທນໃນເວລາຈຳເປັນ, ພິຈາລະນາແລະຕົກລົງບັນຫາສຳຄັນທີ່ຕ້ອງການແກ້ໄຂຢ່າງທັນການ. ລາຍຊື່ແລະວິທີກຳນົດລາຍຊື່ຂອງຜູ້ແທນທີ່ເຂົ້າຮ່ວມກອງປະຊຸມຜູ້ແທນ ໃຫ້ຄະນະກຳມະການທີ່ຮຽກໂຮມ ກອງປະຊຸມເປັນຜູ້ຕົກລົງ.
ມາດຕາ13 ສ້າງຕັ້ງການຈັດຕັ້ງພັກຫຼືຍົກເລີກການຈັດຕັ້ງທີ່ມີຢູ່ແລ້ວຂອງພັກ, ຕ້ອງແມ່ນການ ຈັດຕັ້ງຂັ້ນເທິງຂອງພັກເປັນຜູ້ຕົກລົງ.
ຢູ່ລະຫວ່າງສອງກອງປະຊຸມໃຫຍ່ຜູ້ແທນທ້ອງຖິ່ນຂັ້ນຕ່າງໆແລະຂັ້ນຮາກຖານຂອງພັກ, ການ ຈັດຕັ້ງຂັ້ນເທິງຂອງພັກເຫັນວ່າມີຄວາມຈຳເປັນ, ສາມາດຍົກຍ້າຍແລະບົ່ງຕົວແຕ່ງຕັ້ງຜູ້ຮັບຜິດຊອບຂອງການຈັດຕັ້ງຂັ້ນລຸ່ມ.
ຄະນະກຳມະການສູນກາງແລະທ້ອງຖິ່ນຂອງພັກສາມາດບົ່ງຕົວແຕ່ງຕັ້ງການຈັດຕັ້ງຕົວແທນ.
ຄະນະກຳມະການສູນກາງແລະຂັ້ນແຂວງ, ເຂດປົກຄອງຕົນເອງແລະກຳແພງນະຄອນຂອງພັກປະຕິບັດລະບຽບການກວດກາແບບລາດຕະເວນ.
ມາດຕາ14 ການນຳຂັ້ນຕ່າງໆຂອງພັກອອກມະຕິຕໍ່ບັນຫາສຳຄັນທີ່ກ່ຽວຂ້ອງກັບການຈັດຕັ້ງຂັ້ນລຸ່ມ, ຕາມທຳມະດາແລ້ວ, ຕ້ອງຂໍຄວາມເຫັນຂອງການຈັດຕັ້ງຂັ້ນລຸ່ມ. ຕ້ອງຮັບປະກັນໃຫ້ການຈັດຕັ້ງຂັ້ນລຸ່ມສາມາດປະຕິບັດພາລະໜ້າທີ່ຂອງຕົນຢ່າງເປັນປົກກະຕິ. ສຳລັບບັນຫາທີ່ຢູ່ໃນຂອບເຂດສິດຂອງການຈັດຕັ້ງຂັ້ນລຸ່ມ, ຖ້າບໍ່ມີສະພາບການພິເສດ, ການຈັດຕັ້ງຂັ້ນເທິງຢ່າແຊກແຊງວຽກງານເຫຼົ່ານີ້.
ມາດຕາ15 ກ່ຽວກັບບັນຫານະໂຍບາຍສຳຄັນທີ່ມີລັກສະນະທົ່ວປະເທດ, ມີແຕ່ສູນກາງພັກຈິ່ງມີສິດອອກມະຕິ, ການຈັດຕັ້ງພັກຂອງພາກສ່ວນຕ່າງໆແລະທ້ອງຖິ່ນຕ່າງໆສາມາດປະກອບຄວາມຄິດຄວາມເຫັນ, ແຕ່ບໍ່ສາມາດອອກມະຕິແລະເປີດເຜີຍເຈດຈຳນົງຕໍ່ພາຍນອກຕາມລຳພັງໃຈ.
ການຈັດຕັ້ງຂັ້ນລຸ່ມຂອງພັກຕ້ອງປະຕິບັດຕາມມະຕິຂອງການຈັດຕັ້ງຂັ້ນເທິງຢ່າງເດັດຂາດ. ຖ້າການຈັດຕັ້ງຂັ້ນລຸ່ມເຫັນວ່າມະຕິຂອງການຈັດຕັ້ງຂັ້ນເທິງບໍ່ສອດຄ່ອງກັບສະພາບຕົວຈິງຂອງທ້ອງຖິ່ນຕົນແລະພາກສ່ວນຕົນ, ສາມາດຮຽກຮ້ອງໃຫ້ປ່ຽນແປງມະຕິ; ຖ້າການຈັດຕັ້ງຂັ້ນເທິງຍຶດໝັ້ນມະຕິເດີມ, ການຈັດຕັ້ງຂັ້ນລຸ່ມຕ້ອງປະຕິບັດຕາມ, ແລະບໍ່ສາມາດເປີດເຜີຍຄວາມເຫັນແຕກຕ່າງກັນ, ແຕ່ມີສິດລາຍງານຕໍ່ການຈັດຕັ້ງຂັ້ນເທິງອີກຂັ້ນໜຶ່ງ.
