ກົດລະບຽບຂອງພັກກອມມູນິດຈີນ
(GMT+08:00) 2012-11-16 16:56:32 cri
ໝວດທີⅣ
ອົງການຈັດຕັ້ງຂອງພັກຢູ່ຂັ້ນທ້ອງຖິ່ນ
ມາດຕາ24 ກອງປະຊຸມໃຫຍ່ຜູ້ແທນຂັ້ນແຂວງ, ເຂດປົກຄອງຕົນເອງແລະກຳແພງນະຄອນ, ກອງປະຊຸມໃຫຍ່ຜູ້ແທນຂອງນະຄອນ ແລະກິ່ງແຂວງທີ່ມີຄຸ້ມ, ກອງປະຊຸມໃຫຍ່ຜູ້ແທນຂອງນະຄອນທີ່ບໍ່ມີຄຸ້ມແລະຄຸ້ມໃນນະຄອນຂອງພັກ, 5 ປີໃດຈັດຂຶ້ນເທື່ອໜຶ່ງ.
ກອງປະຊຸມໃຫຍ່ຜູ້ແທນຂັ້ນຕ່າງໆຂອງທ້ອງຖິ່ນ ແມ່ນຄະນະກຳມະການຂອງພັກຂັ້ນຕົນເປັນຜູ້ຮຽກໂຮມ. ພາຍໃຕ້ສະພາບການພິເສດ, ໂດຍໄດ້ຮັບການອະນຸມັດຈາກຄະນະກຳມະການຂັ້ນເທິງຖັດ ຕົນ, ສາມາດຈັດຂຶ້ນໄວກວ່າຫຼືຊ້າກວ່າ.
ຈຳນວນແລະວິທີເລືອກຕັ້ງຜູ້ແທນຂອງກອງປະຊຸມຜູ້ແທນຂັ້ນຕ່າງໆ ຂອງທ້ອງຖິ່ນຂອງພັກ, ແມ່ນຄະນະກຳມະການພັກຂັ້ນຕົນເປັນຜູ້ຕົກລົງ, ແລະລາຍງານຕໍ່ຄະນະກຳມະການຂັ້ນເທິງເພື່ອໄດ້ຮັບການອະນຸມັດ.
ມາດຕາ25 ໜ້າທີ່ກອງປະຊຸມໃຫຍ່ຜູ້ແທນຂັ້ນຕ່າງໆຢູ່ທ້ອງຖິ່ນຂອງພັກ:
1. ຮັບຟັງແລະສຳຫຼວດພິຈາລະນາບົດລາຍງານການເມືອງຂອງຄະນະກຳມະການຂັ້ນຕົນ;
2. ຮັບຟັງແລະສຳຫຼວດພິຈາລະນາບົດລາຍງານຂອງຄະນະກຳມະການກວດກາວິໄນຂັ້ນຕົນ;
3. ພິຈາລະນາບັນຫາສຳຄັນໃນຂອບເຂດຂອງທ້ອງຖິ່ນຕົນແລະອອກມະຕິ;
4. ເລືອກຕັ້ງຄະນະກຳມະການພັກຂັ້ນຕົນ, ເລືອກຕັ້ງຄະນະກຳມະການກວດກາວິໄນພັກຂັ້ນຕົນ.
ມາດຕາ26 ຄະນະກຳມະການຂັ້ນແຂວງ, ເຂດປົກຄອງຕົນເອງ, ກຳແພງນະຄອນ, ນະຄອນທີ່ມີຄຸ້ມແລະກິ່ງແຂວງຂອງພັກ, ສະໄໝລະ 5 ປີ. ກຳມະການແລະກຳມະການສຳຮອງຂອງຄະນະກຳມະການເຫຼົ່ານີ້ຕ້ອງມີອາຍຸພັກ 5 ປີຂຶ້ນໄປ.
ຄະນະກຳມະການຂອງເມືອງ, ເມືອງປົກຄອງຕົນເອງ, ນະຄອນທີ່ບໍ່ມີຄຸ້ມແລະຄຸ້ມໃນນະຄອນ, ສະໄໝລະ 5 ປີ. ກຳມະການແລະກຳມະການສຳຮອງຂອງຄະນະກຳມະການເຫຼົ່ານີ້ຕ້ອງມີອາຍຸພັກ 3 ປີຂຶ້ນໄປ.
ການຮຽກໂຮມກອງປະຊຸມໃຫຍ່ຜູ້ແທນຂັ້ນຕ່າງໆຢູ່ທ້ອງຖິ່ນຂອງພັກໄວກວ່າຫຼືຊ້າກວ່າ, ອາຍຸການຂອງຄະນະກຳມະການທີ່ກອງປະຊຸມໃຫຍ່ເຫຼົ່ານີ້ເປັນຜູ້ເລືອກຕັ້ງນັ້ນ ກໍມີການປ່ຽນແປງທີ່ສົມຄູ່ກັນ.
ຈຳນວນກຳມະການ ແລະ ກຳມະການສຳຮອງຂອງຄະນະກຳມະການຂັ້ນຕ່າງໆຂອງທ້ອງຖິ່ນຂອງພັກ, ແມ່ນຄະນະກຳມະການຂັ້ນເທິງຖັດຕົນເປັນຜູ້ຕົກລົງ. ຖ້າກຳມະການຄະນະກຳມະການຂັ້ນຕ່າງໆຂອງທ້ອງຖິ່ນຂອງພັກຂາດຈຳນວນ, ຈະເພີ່ມຕື່ມກຳມະການສຳຮອງເປັນກຳມະການຕາມລຳ ດັບໂດຍອີງຕາມການລົງຄະແນນສຽງ.
ກອງປະຊຸມຄົບຄະນະຂອງຄະນະກຳມະການຂັ້ນຕ່າງໆຂອງທ້ອງຖິ່ນຂອງພັກ, ຢ່າງໜ້ອຍຕ້ອງ ຮຽກໂຮມປີລະ 2 ເທື່ອ.
ຄະນະກຳມະການຂັ້ນຕ່າງໆຂອງທ້ອງຖິ່ນຂອງພັກ ປະຕິບັດຄຳຊີ້ນຳຂອງການຈັດຕັ້ງພັກຂັ້ນເທິງແລະມະຕິຂອງກອງປະຊຸມໃຫຍ່ຜູ້ແທນພັກຂັ້ນຕົນ, ນຳພາວຽກງານຂອງທ້ອງຖິ່ນຕົນແລະລາຍງານວຽກງານຕໍ່ຄະນະກຳມະການພັກຂັ້ນເທິງເປັນປະຈຳ ຢູ່ລະຫວ່າງສອງກອງປະຊຸມໃຫຍ່ຜູ້ແທນ.
ມາດຕາ27 ກອງປະຊຸມຄົບຄະນະຂອງຄະນະກຳມະການຂັ້ນຕ່າງໆຂອງທ້ອງຖິ່ນຂອງພັກ, ເລືອກຕັ້ງຄະນະກຳມະການປະຈຳ, ເລຂາທິການແລະຮອງເລຂາທິການຂັ້ນຕົນ, ແລະລາຍງານຕໍ່ຄະນະກຳມະການພັກຂັ້ນເທິງຖັດຕົນອະນຸມັດ. ຄະນະປະຈຳຂອງຄະນະກຳມະການຂັ້ນຕ່າງໆຂອງທ້ອງຖິ່ນຂອງພັກປະຕິບັດໜ້າທີ່ຄະນະກຳມະການ ຢູ່ລະຫວ່າງສອງກອງປະຊຸມຄົບຄະນະຂອງຄະນະ ກຳມະການ; ສືບຕໍ່ຮັບຜິດຊອບຊີ້ນຳວຽກງານປະຈຳ ໃນໄລຍະຮຽກໂຮມກອງປະຊຸມຜູ້ແທນສະໄໝໜ້າ, ຈົນຮອດເວລາຄະນະປະຈຳຂອງຄະນະກຳມະການຊຸດໃໝ່ກຳເນີດເກີດຂຶ້ນ.
ຄະນະປະຈຳຂອງຄະນະກຳມະການຂັ້ນຕ່າງໆຂອງທ້ອງຖິ່ນຂອງພັກ ຕ້ອງລາຍງານວຽກງານຕໍ່ ກອງປະຊຸມຄົບຄະນະເປັນປະຈຳ, ເພື່ອຮັບການຕິດຕາມ.
ມາດຕາ28 ຄະນະກຳມະການນະຄອນຂອງພັກແລະຄະນະກຳມະການທຽບເທົ່າ, ແມ່ນອົງການຕົວແທນທີ່ຄະນະພັກແຂວງ ແລະ ເຂດປົກຄອງຕົນເອງບົ່ງຕົວແຕ່ງຕັ້ງຢູ່ໃນຂອບເຂດຫຼາຍເມືອງ, ເມືອງປົກຄອງຕົນເອງແລະນະຄອນ, ໂດຍອີງໃສ່ການມອບສິດຂອງຄະນະພັກແຂວງແລະເຂດປົກ ຄອງຕົນເອງ, ນຳພາວຽກງານທ້ອງຖິ່ນຕົນ.
