ກົດລະບຽບຂອງພັກກອມມູນິດຈີນ
(GMT+08:00) 2012-11-16 16:56:32 cri
ໝາດທີⅧ
ອົງການກວດກາວິໄນຂອງພັກ
ມາດຕາ43 ຄະນະກຳມະການກວດກາວິໄນຂອງພັກດຳເນີນວຽກງານຢູ່ພາຍໃຕ້ການຊີ້ນຳຂອງຄະນະກຳມະການສູນກາງພັກ. ຄະນະກຳມະການກວດກາວິໄນຂັ້ນຕ່າງໆຂອງທ້ອງຖິ່ນແລະຂັ້ນຮາກຖານດຳເນີນວຽກງານ ຢູ່ພາຍໃຕ້ການນຳພາຂອງຄະນະກຳມະການຂັ້ນຕົນແລະຄະນະກຳມະການກວດກາວິໄນຂອງຂັ້ນເທິງຖັດຕົນ.
ອາຍຸການແຕ່ລະສະໄໝຂອງຄະນະກຳມະການກວດກາວິໄນຂັ້ນຕ່າງໆຂອງພັກເທົ່າກັນກັບຄະ ນະກຳມະການຂອງພັກຂັ້ນຕົນ.
ກອງປະຊຸມຄົບຄະນະຂອງຄະນະກຳມະການກວດກາວິໄນສູນກາງພັກ, ເລືອກຕັ້ງຄະນະປະຈຳ, ເລຂາທິການແລະຮອງເລຂາທິການ, ແລະລາຍງານຕໍ່ຄະນະກຳມະການສູນກາງເພື່ອໄດ້ຮັບການອະ ນຸມັດ. ກອງປະຊຸມຄົບຄະນະຂອງຄະນະກຳມະການກວດກາວິໄນຂັ້ນຕ່າງໆຂອງທ້ອງຖິ່ນຂອງພັກ, ເລືອກຕັ້ງຄະນະປະຈຳ, ເລຂາທິການ, ຮອງເລຂາທິການ, ແລະຮັບຜ່ານໃນຄະນະກຳມະການຂອງພັກຂັ້ນຕົນ, ແລະລາຍງານຕໍ່ຄະນະກຳມະການຂອງພັກຂັ້ນເທິງເພື່ອໄດ້ຮັບການອະນຸມັດ. ຄະນະກຳມະ ການຮາກຖານພັກຈັດຕັ້ງຄະນະກຳມະການກວດກາວິໄນ ຫຼື ຈັດໃຫ້ມີກຳມະການກວດກາວິໄນ, ແມ່ນການຈັດຕັ້ງພັກຂັ້ນເທິງຖັດຕົນຕົກລົງຕາມສະພາບຕົວຈິງ. ຄະນະກຳມະການໜ່ວຍພັກໃຫຍ່ແລະຄະ ນະກຳມະການໜ່ວຍພັກຈັດຕັ້ງໃຫ້ມີກຳມະການກວດກາວິໄນ.
ຄະນະກຳມະການກວດກາວິໄນສູນກາງພັກອີງຕາມຄວາມຮຽກຮ້ອງຕ້ອງການດ້ານວຽກງານ, ສາມາດບົ່ງຕົວແຕ່ງຕັ້ງໜ່ວຍກວດກາວິໄນຫຼືກຳມະການກວດກາວິໄນໄປປະຈຳຢູ່ໃນການຈັດຕັ້ງພັກແລະອົງການປົກຄອງຂອງລັດຂັ້ນສູນກາງ. ຫົວໜ້າໜ່ວຍກວດກາວິໄນພັກ ຫຼື ກຳມະການກວດກາວິໄນພັກ ສາມາດນັ່ງຟັງກອງປະຊຸມທີ່ກ່ຽວຂ້ອງຂອງອົງການນຳຂອງພັກໃນໜ່ວຍງານຕົນ. ວຽກງານຂອງເຂົາເຈົ້າຕ້ອງໄດ້ຮັບການສະໜັບສະໜູນຈາກອົງການນຳຂອງພັກໃນໜ່ວຍງານຕົນ.
ມາດຕາ44 ໜ້າທີ່ຕົ້ນຕໍຂອງຄະນະກຳມະການກວດກາວິໄນຂັ້ນຕ່າງໆຂອງພັກ: ປົກປັກຮັກສາກົດລະບຽບຂອງພັກແລະລະບຽບການອື່ນໆພາຍໃນພັກ, ກວດກາສະພາບການປະຕິບັດແນວທາງ, ທິດທາງ, ນະໂຍບາຍແລະມະຕິຂອງພັກ, ຊ່ວຍຄະນະກຳມະການຂອງພັກ ເພີ່ມທະວີການກໍ່ສ້າງແບບແຜນຂອງພັກແລະຮັບຜິດຊອບວຽກງານຕ້ານການສໍ້ລາດບັງຫຼວງ.
ຄະນະກຳມະການກວດກາວິໄນຂັ້ນຕ່າງໆຕ້ອງດຳເນີນການສຶກສາອົບຮົມສະມາຊິກພັກໃຫ້ປະ ຕິບັດຕາມລະບຽບວິໄນຂອງພັກ, ອອກມະຕິເພື່ອປົກປ້ອງລະບຽບການຂອງພັກ; ຕິດຕາມການໃຊ້ສິດອຳນາດຂອງພະນັກງານການນຳຂອງພັກ; ສຳຫຼວດກວດກາແລະຊຳລະແກ້ໄຂຄະດີທີ່ອ່າວສຳຄັນແລະສັບສົນກ່ຽວກັບການຈັດຕັ້ງພັກແລະສະມາຊິກພັກລະເມີດກົດລະບຽບຂອງພັກ ແລະ ລະບຽບການຕ່າງອື່ນໆພາຍໃນພັກ, ອອກມະຕິຕົກລົງຫຼືຍົກເລີກການລົງວິໄນຕໍ່ສະມາຊິກພັກໃນຄະດີເຫຼົ່ານີ້; ຮັບເອົາການກ່າວຟ້ອງແລະການເວົ້າແກ້ຕົວຂອງສະມາຊິກພັກ; ຮັບປະກັນສິດທິຂອງສະມາຊິກພັກ.
ຄະນະກຳມະການກວດກາວິໄນຂັ້ນຕ່າງໆຕ້ອງລາຍງານບັນຫາແລະຜົນການຊຳລະແກ້ໄຂຄະດີທີ່ສຳຄັນຫຼືສັບສົນທີ່ສຸດ ຕໍ່ຄະນະກຳມະການຂອງພັກຂັ້ນຕົນ. ພ້ອມກັນນັ້ນ, ຄະນະກຳມະການກວດກາວິໄນຂັ້ນຕ່າງໆຂອງທ້ອງຖິ່ນຂອງພັກແລະຄະນະກຳມະການກວດກາວິໄນຂັ້ນຮາກຖານຂອງພັກຕ້ອງລາຍງານຕໍ່ຄະນະກຳມະການກວດກາວິໄນຂັ້ນເທິງຖັດຕົນ.
ຄະນະກຳມະການກວດກາວິໄນຂັ້ນຕ່າງໆ ຄົ້ນພົບກຳມະການຄະນະກຳມະການຂອງພັກຂັ້ນຕົນມີການກະທຳທີ່ລະເມີດວິໄນຂອງພັກ, ຄວນດຳເນີນການສຳຫຼວດແລະຢືນຢັນເບື້ອງຕົ້ນ, ຖ້າຕ້ອງການຕັ້ງຄະດີ, ຄວນລາຍງານຕໍ່ຄະນະກຳມະການຂອງພັກຂັ້ນຕົນເພື່ອໄດ້ຮັບການອະນຸມັດ, ຖ້າກ່ຽວພັນເຖິງກຳມະການປະຈຳ, ພາຍຫຼັງລາຍງານຕໍ່ຄະນະກຳມະການພັກຂັ້ນຕົນແລ້ວຍັງລາຍງານຕໍ່ຄະນະກຳມະການກວດກາວິໄນຂັ້ນເທິງຖັດຕົນເພື່ອໄດ້ຮັບການອະນຸມັດ.
ມາດຕາ45 ຄະນະກຳມະການກວດກາວິໄນຂັ້ນເທິງມີສິດກວດກາວຽກງານຂອງຄະນະກຳມະ ການກວດກາວິໄນຂັ້ນລຸ່ມ, ແລະມີສິດອະນຸມັດແລະດັດແປງມະຕິຕໍ່ຄະດີຂອງຄະນະກຳມະການກວດ ກາວິໄນຂັ້ນລຸ່ມ. ຖ້າຕ້ອງດັດແປງມະຕິຂອງຄະນະກຳມະການກວດກາວິໄນຂັ້ນລຸ່ມ ທີ່ໄດ້ຮັບການອະນຸມັດຈາກຄະນະກຳມະການຂອງພັກຂັ້ນຕົນແລ້ວ, ການດັດແປງແບບນີ້ຍັງຕ້ອງໄດ້ຮັບການອະນຸ ມັດຈາກຄະນະກຳມະການຂອງພັກຂັ້ນເທິງອີກຂັ້ນໜຶ່ງ.
ຖ້າຄະນະກຳມະການກວດກາວິໄນຂັ້ນຕ່າງໆຂອງທ້ອງຖິ່ນແລະຄະນະກຳມະການກວດກາວິໄນຂັ້ນຮາກຖານຂອງພັກມີຄວາມເຫັນຕ່າງກັນຕໍ່ມະຕິແກ້ໄຂຄະດີຂອງຄະນະກຳມະການຂອງພັກຂັ້ນຕົນ, ສາມາດຮຽກຮ້ອງໃຫ້ຄະນະກຳມະການກວດກາວິໄນຂັ້ນເທິງຖັດຕົນສືບສວນຄະດີຄືນໃໝ່; ຖ້າພົບເຫັນຄະນະກຳມະການຫຼືກຳມະການຄະນະກຳມະການຂັ້ນຕົນມີສະພາບລະເມີດວິໄນຂອງພັກ, ຄະນະກຳ ມະການຂອງພັກຂັ້ນຕົນບໍ່ແກ້ໄຂ ຫຼື ບໍ່ແກ້ໄຂຢ່າງຖືກຕ້ອງ, ມີສິດຮ້ອງຟ້ອງຕໍ່ຄະນະກຳມະການກວດ ກາວິໄນຂັ້ນເທິງຖັດຕົນ, ເພື່ອຊ່ວຍຊຳລະແກ້ໄຂ.
