ກົດລະບຽບຂອງພັກກອມມູນິດຈີນ
(GMT+08:00) 2012-11-16 16:56:32 cri
ໝວດທີⅤ
ການຈັດຕັ້ງຮາກຖານພັກ
ມາດຕາ29 ວິສາຫະກິດ, ບ້ານໃນຊົນນະບົດ, ອົງການປົກຄອງ, ໂຮງຮຽນ, ສະຖາບັນຄົ້ນຄວ້າວິທະຍາສາດ, ຄຸ້ມຖະໜົນ, ອົງການຈັດຕັ້ງມະຫາຊົນແລະອົງການຈັດຕັ້ງສັງຄົມ, ກົມກອງຂອງກອງທັບປົດປ່ອຍປະຊາຊົນຈີນແລະໜ່ວຍງານຮາກຖານອື່ນໆ, ຖ້າມີສະມາຊິກພັກສົມບູນ 3 ຄົນຂຶ້ນໄປ, ລ້ວນແຕ່ຄວນສ້າງຕັ້ງການຈັດຕັ້ງຮາກຖານພັກ.
ການຈັດຕັ້ງຮາກຖານພັກ, ອີງຕາມຄວາມຕ້ອງການດ້ານວຽກງານແລະຈຳນວນສະມາຊິກພັກ, ໂດຍໄດ້ຮັບການອະນຸມັດຈາກການຈັດຕັ້ງພັກຂັ້ນເທິງຖັດຕົນ, ຕ່າງຈັດຕັ້ງຄະນະກຳມະການຮາກຖານພັກ, ຄະນະກຳມະການໜ່ວຍພັກໃຫຍ່, ຄະນະກຳມະການໜ່ວຍພັກ. ຄະນະກຳມະການຮາກຖານແມ່ນກອງປະຊຸມໃຫຍ່ສະມາຊິກພັກຫຼືກອງປະຊຸມໃຫຍ່ຜູ້ແທນເປັນຜູ້ເລືອກຕັ້ງ, ຄະນະກຳມະການໜ່ວຍພັກໃຫຍ່ແລະຄະນກຳມະການໜ່ວຍພັກ ແມ່ນກອງປະຊຸມໃຫຍ່ສະມາຊິກພັກເປັນຜູ້ເລືອກຕັ້ງ, ສະເໜີຊື່ຂອງຜູ້ສະໝັກຮັບເລືອກຕັ້ງກຳມະການຕ້ອງຂໍຄວາມເຫັນຈາກສະມາຊິກພັກ ແລະ ມະຫາຊົນຢ່າງກວ້າງຂວາງ.
ມາດຕາ30 ຄະນະກຳມະການຮາກຖານພັກສະໄໝລະ 3-5 ປີ, ຄະນະກຳມະການໜ່ວຍພັກໃຫຍ່ແລະຄະນະກຳມະການໜ່ວຍພັກສະໄໝລະ 2 ຫຼື 3 ປີ. ພາຍຫຼັງເລືອກຕັ້ງເລຂາ, ຮອງເລຂາຂອງຄະນະກຳມະການຮາກຖານ, ຄະນະກຳມະການໜ່ວຍພັກໃຫຍ່, ຄະນະກຳມະການໜ່ວຍພັກແລ້ວ, ຄວນລາຍງານຕໍ່ການຈັດຕັ້ງພັກຂັ້ນເທິງຖັດຕົນເພື່ອໄດ້ຮັບການອະນຸມັດ.
ມາດຕາ31 ການຈັດຕັ້ງຮາກຖານພັກແມ່ນປ້ອມສູ້ຮົບໃນອົງການຈັດຕັ້ງຮາກຖານທາງສັງຄົມຂອງພັກ, ແມ່ນພື້ນຖານຂອງວຽກງານທັງໝົດແລະກຳລັງສູ້ຮົບຂອງພັກ, ເຊິ່ງມີໜ້າທີ່ພື້ນຖານດັ່ງລຸ່ມນີ້:
1. ໂຄສະນາແລະປະຕິບັດຕາມແນວທາງ, ທິດທາງແລະນະໂຍບາຍຂອງພັກ, ໂຄສະນາແລະປະຕິບັດຕາມມະຕິຂອງສູນກາງພັກ, ການຈັດຕັ້ງຂັ້ນເທິງແລະການຈັດຕັ້ງຂັ້ນຕົນ, ເສີມຂະຫຍາຍ ບົດບາດແບບຢ່າງແລະນຳໜ້າຂອງສະມາຊິກພັກຢ່າງເຕັມສ່ວນ, ບຸກໜ້າບືນຕົວແລະຍາດເອົາຜົນ ງານທີ່ດີ, ສາມັກຄີແລະຈັດຕັ້ງສະມາຊິກພັກແລະມະຫາຊົນນອກພັກ, ພະຍາຍາມສຳເລັດໜ້າທີ່ຂອງໜ່ວຍງານຕົນ.
2. ຈັດຕັ້ງສະມາຊິກພັກຕັ້ງໜ້າຮ່ຳຮຽນລັດທິມາກ-ເລນິນ, ແນວຄິດເໝົາເຈີຕົງ, ທິດສະດີເຕິງສຽວຜິງ, ແນວຄິດສຳຄັນ "ສາມຕົວແທນ" ແລະທັດສະນະພັດທະນາແບບວິທະຍາສາດ, ຮ່ຳຮຽນແນວທາງ, ທິດທາງ, ນະໂຍບາຍແລະມະຕິຂອງພັກ, ຮຽນຄວາມຮູ້ພື້ນຖານຂອງພັກ, ຮຽນຄວາມຮູ້ດ້ານວິທະຍາສາດ, ວັດທະນະທຳ, ກົດໝາຍແລະວິຊາການ.
3. ສຶກສາອົບຮົມ, ຄຸ້ມຄອງ, ຕິດຕາມແລະຮັບໃຊ້ສະມາຊິກພັກ, ຍົກຄຸນທາດຂອງສະມາຊິກພັກໃຫ້ສູງຂຶ້ນ, ເພີ່ມທະວີຄວາມຈົງຮັກພັກດີຕໍ່ພັກ, ດຳເນີນຊີວິດພັກຢ່າງເຂັ້ມງວດ, ດຳເນີນການຕິຊົມຕົນເອງແລະຕິຊົມກັນ, ປົກປັກຮັກສາແລະປະຕິບັດລະບຽບວິໄນຂອງພັກ, ຕິດຕາມສະມາຊິກພັກປະຕິບັດຕາມພັນທະຂອງຕົນຢ່າງແທ້ຈິງ, ປົກປ້ອງສິດຂອງສະມາຊິກພັກ, ເພີ່ມທະວີແລະປັບປຸງການຄຸ້ມຄອງຕໍ່ສະມາຊິກພັກຍົກຍ້າຍ.
4. ພົວພັນກັບມະຫາຊົນຢ່າງແໜ້ນແຟ້ນ, ຮັບຮູ້ຄວາມຕິຊົມແລະຄວາມເຫັນຂອງມະຫາຊົນທີ່ມີຕໍ່ສະມາຊິກພັກແລະວຽກງານຂອງພັກເລື້ອຍໆ, ປົກປ້ອງສິດແລະຜົນປະໂຫຍດອັນຊອບທຳຂອງມະຫາ ຊົນ, ເຮັດວຽກດ້ານແນວຄິດການເມືອງຂອງມະຫາຊົນໃຫ້ດີ.
5. ເສີມຂະຫຍາຍຄວາມຫ້າວຫັນແລະແນວຄິດປະດິດສ້າງຂອງສະມາຊິກພັກແລະມະຫາຊົນຢ່າງເຕັມສ່ວນ, ຊອກຄົ້ນ, ອົບຮົມບົ່ມສ້າງແລະນຳສະເໜີຜູ້ມີຄວາມຮູ້ຄວາມສາມາດໃນໝູ່ສະມາຊິກພັກແລະມະຫາຊົນ, ສົ່ງເສີມແລະສະໜັບສະໜູນເຂົາເຈົ້າອຸທິດສະຕິປັນຍາແລະຄວາມສະຫຼາດສ່ອງໃສຂອງຕົນໃນພາລະກິດປະຕິຮູບແລະໄຂປະຕູສູ່ພາຍນອກ ແລະການສ້າງສາທັນສະໄໝຂອງສັງຄົມ ນິຍົມ.
6. ດຳເນີນການສຶກສາແລະອົບຮົມບົ່ມສ້າງຕໍ່ມະຫາຊົນຜູ້ກ້າວໜ້າທີ່ສະໝັກເຂົ້າເປັນສະມາຊິກພັກ, ເຮັດວຽກງານຂະຫຍາຍສະມາຊິກພັກເປັນປະຈຳ, ເອົາໃຈໃສ່ຂະຫຍາຍສະມາຊິກພັກໃນການຜະລິດ, ແນວໜ້າການເຮັດວຽກແລະໃນໝູ່ຊາວໜຸ່ມ.
7. ຕິດຕາມພະນັກງານການນຳທີ່ເປັນສະມາຊິກພັກ ແລະພະນັກງານອື່ນໆປະຕິບັດຕາມກົດ ໝາຍກົດບັນຍັດຂອງລັດ, ປະຕິບັດຕາມກົດລະບຽບທາງເສດຖະກິດການເງິນແລະລະບຽບການບຸກ ຄະລາກອນຂອງລັດຢ່າງເຂັ້ມງວດ, ບໍ່ໃຫ້ຍຶດຜົນປະໂຫຍດຂອງລັດ, ຂອງລວມໝູ່ແລະຂອງມະຫາ ຊົນ.
8. ສຶກສາສະມາຊິກພັກແລະມະຫາຊົນຕໍ່ຕ້ານທ່າອຽງຫຍໍ້ທໍ້ດ້ວຍຄວາມຕື່ນຕົວ, ຕໍ່ສູ້ກັບການ ກະທຳຜິດກົດໝາຍແລະການກະທຳຕ້ອງໂທດທຸກຢ່າງຢ່າງເດັດດ່ຽວ.
