ກົດລະບຽບຂອງພັກກອມມູນິດຈີນ
(GMT+08:00) 2012-11-16 16:56:32 cri
ໝວດທີⅨ
ຈຸພັກ
ມາດຕາ46 ຢູ່ກົງຈັກສູນກາງແລະທ້ອງຖິ່ນ, ອົງການຈັດຕັ້ງມະຫາຊົນ, ອົງການຈັດຕັ້ງເສດຖະ ກິດ, ອົງການຈັດຕັ້ງວັດທະນະທຳແລະອົງການນຳຂອງອົງການຈັດຕັ້ງອື່ນໆທີ່ບໍ່ແມ່ນການຈັດຕັ້ງຂອງພັກ, ສາມາດສ້າງຕັ້ງຈຸພັກ. ຈຸພັກເສີມຂະຫຍາຍບົດບາດແກນນຳ. ໜ້າທີ່ຂອງຈຸພັກ, ຕົ້ນຕໍແມ່ນຜັນຂະຫຍາຍແລະຈັດຕັ້ງປະຕິບັດແນວທາງ, ທິດທາງແລະນະໂຍບາຍຂອງພັກ, ພິຈາລະນາແລະອອກມະຕິຕົກລົງບັນຫາສຳຄັນໃນໜ່ວຍງານຕົນ; ເຮັດວຽກງານຄຸ້ມຄອງພະນັກງານໃຫ້ດີ; ສາມັກຄີພະນັກ ງານນອກພັກແລະມະຫາຊົນໃຫ້ດີ, ສຳເລັດໜ້າທີ່ທີ່ພັກແລະລັດມອບໝາຍໃຫ້; ຊີ້ນຳວຽກງານກົງຈັກແລະການຈັດຕັ້ງພັກຂອງໜ່ວຍງານສັງກັດຕົນ.
ມາດຕາ47 ສະມາຊິກຂອງຈຸພັກ, ແມ່ນການຈັດຕັ້ງພັກທີ່ອະນຸມັດສ້າງຕັ້ງຈຸພັກເປັນຜູ້ຕົກລົງ. ຈຸພັກມີເລຂາທິການ, ຖ້າມີຄວາມຈຳເປັນຍັງສາມາດຈັດໃຫ້ມີຮອງເລຂາທິການ.
ຈຸພັກຕ້ອງຢູ່ພາຍໃຕ້ການນຳພາຂອງການຈັດຕັ້ງພັກທີ່ອະນຸມັດການສ້າງຕັ້ງຈຸພັກ.
ມາດຕາ48 ກົງຈັກທີ່ນຳພາໜ່ວຍງານສັງກັດເປັນເອກະພາບກັນ ສາມາດສ້າງຕັ້ງຄະນະພັກ, ວິທີສ້າງ, ສິດແລະໜ້າທີ່ວຽກງານຂອງຄະນະພັກ, ໃຫ້ສູນກາງພັກກຳນົດເປັນຕ່າງຫາກ.
ໝາດທີⅩ
ການພົວພັນລະຫວ່າງພັກກັບຄະນະຊາວໜຸ່ມກອມມູນິດ
ມາດຕາ49 ຄະນະຊາວໜຸ່ມກອມມູນິດຈີນແມ່ນອົງການຈັດຕັ້ງມະຫາຊົນຂອງຊາວໜຸ່ມກ້າວໜ້າ ທີ່ນຳພາໂດຍພັກກອມມູນິດຈີນ, ແມ່ນໂຮງຮຽນສຳລັບຊາວໜຸ່ມທັງຫຼາຍຮຽນຮູ້ສັງຄົມນິຍົມທີ່ມີສີສັນພິເສດຂອງຈີນແລະລັດທິກອມມູນິດໃນພາກພຶດຕິກຳ, ແມ່ນຜູ້ຊ່ວຍແລະກອງໜູນຫຼັງຂອງພັກ. ຄະນະກຳມະການສູນກາງຊາວໜຸ່ມກອມມູນິດນຳພາໂດຍຄະນະກຳມະການສູນກາງພັກ. ອົງການຈັດຕັ້ງຂັ້ນຕ່າງໆຂອງທ້ອງຖິ່ນຂອງຄະນະຊາວໜຸ່ມກອມມູນິດ ນຳພາໂດຍຄະນະກຳມະການຂອງພັກຂັ້ນຕົນ, ພ້ອມກັນນັ້ນ, ກໍນຳພາໂດຍການຈັດຕັ້ງຂັ້ນເທິງຂອງຄະນະຊາວໜຸ່ມກອມມູນິດ.
ມາດຕາ50 ຄະນະກຳມະການຂັ້ນຕ່າງໆຂອງພັກຕ້ອງເພີ່ມທະວີການນຳພາຕໍ່ຄະນະຊາວໜຸ່ມກອມມູນິດ, ເອົາໃຈໃສ່ການຄັດເລືອກແລະສຶກສາອົບຮົມຕໍ່ພະນັກງານຊາວໜຸ່ມ. ພັກຕ້ອງເດັດດ່ຽວສະໜັບສະໜູນຄະນະຊາວໜຸ່ມດຳເນີນວຽກງານຢ່າງມີຊີວິດຊີວາແລະມີຫົວຄິດປະດິດສ້າງ ໂດຍອີງຕາມຈຸດພິເສດແລະຄວາມຕ້ອງການຂອງຊາວໜຸ່ມທັງຫຼາຍ, ເສີມຂະຫຍາຍບົດບາດກອງຕະລຸມບອນຂອງຄະນະຊາວໜຸ່ມແລະເປັນຂົວຕິດຕໍ່ພົວພັນຊາວໜຸ່ມທັງຫຼາຍຢ່າງເຕັມສ່ວນ.
ເລຂາທິການຄະນະຊາວໜຸ່ມລະດັບເມືອງແລະລະດັບບໍ່ຮອດເມືອງ, ເລຂາທິການຄະນະຊາວໜຸ່ມຂອງວິສາຫະກິດແລະໜ່ວຍງານວິຊາການ, ຖ້າແມ່ນສະມາຊິກພັກ, ສາມາດເຂົ້ານັ່ງຟັງກອງປະຊຸມຄະນະກຳມະການແລະຄະນະປະຈຳຄະນະກຳມະການຂອງພັກຂັ້ນຕົນ.
